Вы тут

Як у Гродне ўсталявалі экалагічную паркоўку


Недахоп парковачных месцаў — праблема кожнага буйнога горада, у тым ліку і Гродна. Таму аўтамабілі ставяць на тратуары і на газоны. Многім жыхарам гэта не падабаецца, яны звяртаюцца ў праваахоўныя органы. Але гэта мала вырашае праблему. На жыллёвым рамонтна-эксплуатацыйным прадпрыемстве Кастрычніцкага раёна Гродна прынялі рашэнне пабудаваць у сваім раёне новую пляцоўку, прытым не звычайную, асфальтаваную, а экалагічную.


Работа пачалася ў рамках месячніка па санітарнай уборцы і добраўпарадкаванні тэрыторыі, а завяршылася падчас рэспубліканскага суботніка. «Гэта паркоўка на прыдамавой тэрыторыі жылых дамоў па вуліцы Вольгі Соламавай знаходзіцца ў зоне даступнасці, — расказала начальнік каштарысна-дагаворнага аддзела УЖРЭП Алена СМІРНОВА. — Тут не толькі вырашаецца праблема парковачных месцаў, але і выкарыстаны новыя экалагічныя тэхналогіі».

Экапаркоўка — праект унікальны. У чым яго сэнс? Па словах спецыялістаў, пляцоўка выкладзена пліткай і нагадвае соты. На іх кладзецца ўтрамбаваны грунт. Такім чынам, паркоўка, з аднаго боку, выглядае як газон, з другога — роўная і трывалая. Для рэалізацыі праекта на Гродзенскім смеццесартавальным заводзе выраблена спецыяльная плітка з расплаўленага пластыку і пяску. На гэтую пляцоўку яе пайшло 110 квадратных метраў.

На прадпрыемстве лічаць, што экапаркоўкі ў параўнанні з бетоннымі пляцоўкамі маюць шэраг пераваг. Па-першае, нескладаны мантаж і кароткія тэрміны будаўніцтва. Другі важны момант — даўгачаснасць. Як паведаміла Алена Смірнова, такая паркоўка эксплуатуецца да 50 гадоў. І, што таксама немалаважна, — экалагічнасць, бо другасныя рэсурсы не ўтылізуюцца, а ў выніку перапрацоўкі зноў выкарыстоўваюцца. Эстэтыка ствараецца з дапамогай газоннай травы. Такія зялёныя паркоўкі ўпрыгожваюць многія гарады Еўропы. Гродзенскія камунальнікі не збіраюцца ставіць кропку на гэтым праекце. Тут лічаць, што трэба і надалей развівацца ў гэтым кірунку. «Гэта нават танней, чым звычайная плітка, бо мы працуем гспадарчым спосабам, — адзначае Алена Смірнова, — а праблема парковак па-ранейшаму застаецца вострай, таму ідэя экапарковак, думаю, мае добрыя перспектывы. Трэба толькі напрацаваць вопыт, і справа пойдзе хутчэй. Патрэбу ў такіх аўтамесцах маюць раёны старых забудоў, дзе невялікія дворыкі, таму важна мець там такі зялёны газон-паркоўку».

На прадпрыемстве зазначылі, што ў раёне вядзецца значная работа па добраўпарадкаванні парковачных месцаў. Напрыклад, зараз пад знос ідуць трухлявыя і пустуючыя будынкі ў Занёманскай частцы горада. Больш за месяц вывозілі смецце з тэрыторыі былога гарбарнага завода па вуліцы Гарнавых. Тут будзе пляцоўка для транспарту амаль на 100 месцаў, у тым ліку, турыстычных аўтобусаў. У першую чаргу пляцоўкай змогуць карыстацца тыя, хто прыедзе ў філармонію. Гэты аб'ект таксама чакае ўводу ў дзеянне. Што датычыцца паркоўкі, тут ужо прыступілі да работы. Паколькі яна размесціцца ў ахоўнай зоне тытунёвай фабрыкі, там таксама прадугледжаны шэраг экалагічных бонусаў, у тым ліку і ачышчальныя збудаванні.

Загаловак у газеце: Зялёныя соты пад аўто

Выбар рэдакцыі

Калейдаскоп

Вясёлыя гісторыі чытачоў

Вясёлыя гісторыі чытачоў

Пра куфэрак и вяртанне блуднага мужа.

Эканоміка

У сельскай гаспадарцы трэба кардынальна мяняць павышэнне кваліфікацыі

У сельскай гаспадарцы трэба кардынальна мяняць павышэнне кваліфікацыі

«МС» пагутарыла з вядомым у Беларусі вучоным-аграрыем.

Грамадства

Андрэй Кароль: Студэнтаў трэба задзейнічаць у кухні па «прыгатаванні» ведаў

Андрэй Кароль: Студэнтаў трэба задзейнічаць у кухні па «прыгатаванні» ведаў

Рэктар БДУ пра нешаблоннае мысленне, эўрыстычнае навучанне і адмаўленне ад маналогу.