Вы тут

Каледж запатрабаваных прафесій


У Гродзенскім дзяржаўным прафесійным тэхналагічным каледжы ствараецца рэсурсны цэнтр, дзе змогуць практыкавацца будучыя кухары і кандытары. Новая сучасная база дазволіць весці падрыхтоўку навучэнцаў іншых устаноў па гэтых спецыяльнасцях, а таксама павышаць кваліфікацыю ўсім работнікам дадзенага напрамку.


Мяркуецца, што рэсурсны цэнтр пачне дзейнічаць у новым навучальным годзе. Але і цяпер відаць, што двухпавярховая прыбудова амаль поўнасцю гатовая, застаецца толькі ўстанавіць неабходнае абсталяванне для кулінарных лабараторый. Як расказаў дырэктар каледжа Леанід Бялей, гэта работа вядзецца, ужо аб'яўлены тэндар на закупку.

— Мы бачым вялікую запатрабаванасць такіх спецыялістаў, як кухар і кандытар. Апошнім часам у рэгіёне актыўна адкрываюцца аб'екты грамадскага харчавання, і там патрэбны кадры. Папулярнасць прафесіі відаць і па конкурсе ў наш каледж, у мінулым годзе конкурс на спецыяльнасць «Грамадскае харчаванне» склаў больш за тры чалавекі на месца, а каб яго прайсці, сярэдні бал атэстата павінен быць не ніжэйшы за сем, — адзначыў Леанід Іосіфавіч.

У каледжы набіраюць чатыры групы кухараў — гэта 110 чалавек. А ўсяго тут займаюцца 650 навучэнцаў з усёй вобласці. Можна сказаць, што рэсурсны цэнтр створаны на даволі трывалай навучальнай базе. Тут рыхтуюць высокапрафесійных спецыялістаў. Аб гэтым сведчаць і дасягненні на шматлікіх конкурсах — як рэспубліканскіх, так і міжнародных.

— Вопыт удзелу ў конкурсах вельмі карысны для навучэнцаў, майстроў вытворчага навучання, педагогаў. Гэта добры імпульс у самаўдасканаленні, пошуку новага, магчымасць пазнаёміцца з сусветным вопытам, — лічыць намеснік дырэктара па вучэбнай рабоце Ірына Брушко. — А калі ў 2014 годзе Беларусь далучылася да міжнароднага руху WоrldSkіlls, які папулярызуе рабочыя прафесіі праз конкурсы прафесійнага майстэрства, нашы навучэнцы адразу ўключыліся ў спаборніцтва.

І вынікі не прымусілі доўга сябе чакаць. У каледжы па праве ганарацца сваёй «залатой» Златай Шпак, якая атрымала перамогу на рэспубліканскім этапе прэстыжнага конкурсу ў намінацыі «Кандытарскае мастацтва» і трапіла ў склад нацыянальнай каманды на міжнародным чэмпіянаце, які праходзіў у Арабскіх Эміратах у 2017 годзе. За дасягненні яна сёлета ўвайшла ў лік адораных навучэнцаў і студэнтаў, якія атрымалі падтрымку спецыяльнага фонду Прэзідэнта. Таксама варта адзначыць поспехі будучых кандытараў на міжнародным чэмпіянаце кандытарскага майстэрства «Арт-клас» 2017 года. Залатыя медалі атрымалі адразу два навучэнцы каледжа — Аляксей Курыльчык (работа з шакаладу) і Ірына Лукашун (мастацкая нарэзка гародніны і садавіны). А ўжо сёлета прызёрам на міжнародным конкурсе ў Варшаве стала Аляксандра Васільчык, якая зрабіла салодкую кампазіцыю з шакаладу «Цудоўнае далёка».

— Мы рыхтуем не толькі кухараў і кандытараў, — тлумачыць Леанід Бялей. — У каледжы ёсць магчымасць набыць прафесію бармена, афіцыянта, прадаўца, кантралёра-касіра. Навучанне можна працягваць на ўзроўні сярэдняй спецыяльнай адукацыі і засвоіць прафесіі тавараведа, тэхніка-тэхнолага.

Дарэчы, з адкрыццём рэсурснага цэнтра ў тэхналагічным каледжы могуць павысіць кваліфікацыю работнікі сферы грамадскага харчавання і гандлю, а беспрацоўныя — набыць спецыяльнасць. Такі дагавор ёсць з гарадскім Цэнтрам занятасці. Плануецца пашырыць работу кандытарскага цэха і рэалізоўваць прадукцыю ў горадзе. Аб тым, што тут з такой задачай справяцца, сумнявацца не прыходзіцца. Большасць навучэнцаў не проста праходзяць практыку, а ўладкаваны на працоўныя месцы з заработнай платай, што сведчыць аб іх прафесіяналізме.

Дарэчы, у новым рэсурсным цэнтры размясціліся не толькі кабінеты для вучобы і лабараторыі грамадскага харчавання. Тут яшчэ па-сучаснаму абсталяваны бібліятэка, лінгафонны кабінет, ёсць танцавальная зала. Прыемна ўражваюць вялікія «французскія» вокны, якія адкрываюць прыгожую гарадскую панараму, у тым ліку і 9-павярховы інтэрнат каледжа. Кожны, хто прыязджае на вучобу ў Гродна, знаходзіць у ім камфортнае жыллё.

Маргарыта УШКЕВІЧ

Выбар рэдакцыі

Грамадства

Пераможца «Жанчыны года-2018»: З трыма дзецьмі можа справіцца кожная пара

Пераможца «Жанчыны года-2018»: З трыма дзецьмі можа справіцца кожная пара

Тры гады таму прозвішча Трыкоза ўжо было на слыху.

Грамадства

Рагачук: Дзеці ў пясочніцах на касцях гуляць не будуць

Рагачук: Дзеці ў пясочніцах на касцях гуляць не будуць

Кіраўнік Брэсцкага гарвыканкама адмеркаваў рэзанансную тэму раскопак на тэрыторыі гета.

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.