Самыя незвычайныя гасцінічныя паслугі

Дзеля прыцягнення турыстаў супрацоўнікі гатэляў бясплатна або за дадатковыя грошы могуць аказваць часам вельмі дзіўныя паслугі. Самыя цікавыя з іх апісала Асацыяцыя тураператараў Расіі.

Калі кліент адчувае сябе адзінокім, яму няма з кім пагаварыць, ён можа за 3,5 еўра ўзяць напракат рыбку ў акварыуме. Штотыдзень бельгійскі гатэль аддае ў арэнду пару такіх рыб. Калі рыбка не «занятая», яна знаходзіцца ў вялікім акварыуме, дзе ёсць усё неабходнае.

Не сакрэт, што большасць людзей забіраюць з сабой з гатэля шампуні, гелі і іншыя рэчы. У некаторых брытанскіх гасцініцах вырашылі выкарыстаць гэтую асаблівасць паводзін пастаяльцаў і напісалі на бутэльках: «Найлепшы шампунь, які вы калісьці кралі» і «Запакуй мяне і вазьмі дадому». У іншым гатэлі пайшлі яшчэ далей, склаўшы для пастаяльцаў, якія выязджаюць, спецыяльную памятку «Не забывай», куды ўжо ўнесены адзенне, пашпарт, тэлефон, іншыя асабістыя рэчы, а таксама пункт «Што трэба ўкрасці з ваннай».

Калі кагосьці адолела бессань, можна патэлефанаваць у службу казак аднаго гатэля на Манхэтэне. На працягу 15 хвілін супрацоўнік на рэсепшэне будзе бясплатна чытаць казку на выбар, праўда, калі не будзе заняты ў той момант.

Калі раптам проста пасярод ночы вам вельмі захацелася піцы, а абслугоўванне ў нумары ўжо не працуе, ёсць гатэль, які прапануе ў сваёй даведцы кантакты мясцовых піцэрый, прычым рэйтынг іх пастаянна абнаўляецца на аснове водгукаў пастаяльцаў.

Раптам здарылася нечаканасць:  скончылася туалетная папера ў той самы момант? Аказваецца, усё вырашальна. У некаторых амерыканскіх гасцініцах дастаткова «паведаміць» пра гэта адмысловаму гатэльнаму робату, які адказвае выключна за раздачу рулонаў.

Іcнуе яшчэ гатэль, у якім ёсць «меню» пахаў на выбар. Заязджаючы ў пакой, можна выбраць водары па сваім настроі і мяняць іх раз у суткі. Ну, а тым кліентам, якія пакутуюць мікробафобіяй, варта адшукаць гатэль, што прапануе скарыстацца дыстанцыйнымі выключальнікамі, якія маюць антымікробнае пакрыццё.

Выходзіце з пакоя, падыходзіце да ліфта, а ён ужо чакае вас. Кнопка выкліку знаходзіцца ў калідоры, побач з вашым пакоем. Так што, зачыняючы дзверы нумара, вы тут жа можаце выклікаць ліфт.

Хто з дам не хваляваўся, гледзячы на белыя ручнікі, на якіх бачныя плямы ад макіяжу? Адна з гасцініц прапануе сваім пастаяльцам ручнікі колеру пудры, каб дамы менш перажывалі, а значыць, радзей мянялі ручнікі.

У некаторых гатэлях тэлевізар убудаваны ў спецыяльнае люстэрка, у той час як у іншых люстэрка паказвае надвор'е, каб пастаялец мог угадаць з гардэробам.