Вы тут

Што знаходзіцца на старонках серыі «Культурная спадчына Беларусі»?


Мастацтва не жыве ў творчым вакууме: дзеля існавання яму, бы паветра, патрэбныя грошы. Дапамога мецэнатаў — неацэнны ўнёсак у дзейнасць пісьменнікаў, мастакоў, музыкантаў ды іншых творцаў. Удзел у культурным жыцці краіны бяруць і ўстановы, якія, на першы погляд, не маюць да яго наўпроставага дачынення. Так, Банк развіцця з 2015 года ажыццяўляе сацыяльны праект «Культурная спадчына Беларусі», у межах якога з непасрэдным удзелам вядомага беларускага выдавецтва «Чатыры чвэрці» штогод выходзяць адмысловыя кнігі-альбомы, прысвечаныя выбітным з’явам і дзеячам нацыянальнай культуры і мастацтва. Пра мэты і перспектывы праекта распавяла намеснік старшыні праўлення Банка развіцця Наталля Ясінская.


— Першым выданнем праекта «Культурная спадчына Беларусі» стала кніга-альбом «Аляксандр Кішчанка. Летапісец ХХ стагоддзя», прысвечаная творчай дзейнасці народнага мастака Беларусі, уладальніка медаля Францыска Скарыны А. М. Кішчанкi. Прэзентацыя кнігі адбылася ў Нацыянальным мастацкім музеі Рэспублікі Беларусь. Новае выданне пазнаёміла чытача са шматграннай творчасцю вялікага майстра, які пакінуў глыбокі след у беларускай культуры. На наступны год мы звярнулі ўвагу аўдыторыі на багатую гісторыю сярэднепрыпяцкага Палесся: на старонках «Тураўскай рапсодыі» ў форме лірычнага апавядання, заснаванага на вядомых гістарычных фактах, раскрываецца роля Турава і Тураўшчыны як старажытнай калыскі айчыннай дзяржаўнасці і культуры. Другое выданне серыі прадставілі на прэс-канферэнцыі, прымеркаванай да 5-годдзя Банка развіцця, што падкрэсліла значнасць праекта «Культурная спадчына Беларусі» для кіраўніцтва банка. Напярэдадні святкавання 500-годдзя беларускага кнігадрукавання мы вырашылі далучыцца да актуальнай тэмы і адлюстраваць гэтую значную падзею ў межах нашага культурнага праекта. Трэцюю кнігу серыі прысвяцілі старажытнай Полацкай зямлі, радзіме ўсходнеславянскага першадрукара Францыска Скарыны і больш як тысячагадовай гісторыі Прыдзвіння. Прэзентацыя кнігі-альбома пад назвай «Сімфонія стагоддзяў» прайшла падчас адкрыцця новага будынка філіяла Банка развіцця ў горадзе Віцебску.

Выданні праекта «Культурная спадчына Беларусі» былі добра прынятыя як чытачамі, так і спецыялістамі ў галіне кніжнай справы. Усе кнігі серыі атрымалі ўзнагароды на рэспубліканскіх і міжнародных кніжных выстаўках. Першы альбом «Аляксандр Кішчанка. Летапісец ХХ стагоддзя» заваяваў «Залаты фаліянт» у намінацыі «АРТ-кніга» 55-га Нацыянальнага конкурсу «Мастацтва кнігі — 2016», які ладзіўся падчас XXIII Мінскай міжнароднай кніжнай выстаўкі-кірмашу. Другі альбом «Тураўская рапсодыя» адзначаны дыпломам І ступені ХІV Міжнароднага конкурсу дзяржаў — удзельніц Садружнасці Незалежных Дзяржаў «Мастацтва кнігі» ў намінацыі «Надрукавана ў Садружнасці», а таксама дыпломам І ступені 56-га Нацыянальнага конкурсу «Мастацтва кнігі — 2017» у намінацыі «За ўклад у захаванне духоўнай спадчыны». Сёлета ў гэтай намінацыі на XXV Мінскай міжнароднай кніжнай выстаўцы-кірмашы дыплом пераможцы і памятны знаксімвал «Малы залаты фаліянт» атрымала трэцяя кніга серыі «Сімфонія стагоддзяў».

Прызы і ўзнагароды, якія атрымалі кнігі-альбомы серыі «Культурная спадчына Беларусі» — вынік плённага супрацоўніцтва Банка развіцця з выдавецтвам «Чатыры чвэрці». Кіраўніцтва выдавецтва, яго калектыў на працягу ўжо дваццаці пяці гадоў ствараюць і ажыццяўляюць праекты, скіраваныя на адраджэнне нацыянальнай культуры, папулярызацыю мастацтва і літаратуры. Дзякуючы іх намаганням усе кнігі серыі «Культурная спадчына Беларусі» выйшлі ў свет з унікальнымі тэкставымі раздзеламі на беларускай, рускай і англійскай мовах, дапоўненыя маляўнічымі фатаграфіямі, архіўнымі дакументамі, картамі. Каб зрабіць выданні больш інфармацыйнымі, супрацоўнікі выдавецтва праводзяць велізарную навукова-даследчую працу, фатографы выязджаюць на аб’екты, і таму альбомы праекта займаюць годнае месца не толькі ў калекцыях аматараў культуры Беларусі, але і ў яе знатакоў.

— За паўсядзённым клопатам мы не павінны забыць пра тое, без чаго немагчыма ўявіць паўнавартаснае існаванне чалавека, — нацыянальную культуру. Сёння як ніколі важна памятаць гісторыю сваёй краіны і яе вялікіх сыноў, таму мы не збіраемся спыняцца на дасягнутым. Сёлета прадставім новую кнігу-альбом серыі «Культурная спадчына Беларусі», якая дасць магчымасць любому чытачу за межамі нашай краіны пазнаёміцца з гісторыка-культурнымі і прыроднымі каштоўнасцямі Беларусі, уключанымі ў Сусветную спадчыну ЮНЕСКА.

Цяпер кнігі-альбомы серыі «Культурная спадчына Беларусі» можна знайсці ва ўсіх буйных кнігарнях краіны, да таго ж новыя выданні штогод дасылаюць у дыпламатычныя прадстаўніцтвы, консульскія ўстановы і філіялы міжнародных арганізацый у якасці падарунка.

Дар’я ЧАРНЯЎСКАЯ

Загаловак у газеце: Мастацтва — у кнізе

Выбар рэдакцыі

Грамадства

Добраўпарадкаванне. У гарадах, на сельгаспрадпрыемствах, могілках, уздоўж трас і ў дварах

Добраўпарадкаванне. У гарадах, на сельгаспрадпрыемствах, могілках, уздоўж трас і ў дварах

Да канца года ў краіне павінны ліквідаваць усе міні-палігоны для адходаў.

Грамадства

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

З чым звязана такая восеньская зменлівасць надвор’я і калі чакаць першы снег.