Вы тут

У Футбольным манежы завяршыўся конкурс WorldSkіlls Belarus 2018


У Футбольным манежы завяршыўся рэспубліканскі конкурс прафесійнага майстэрства WorldSkіlls Belarus 2018 сярод маладых рабочых, навучэнцаў і студэнтаў.


Урачыстая цырымонія закрыцця прайшла ў спартыўным комплексе «Веладром» шматфункцыянальнага культурна-спартыўнага комплексу «Мінск-Арэна». Па словах рэктара Рэспубліканскага інстытута прафесійнай адукацыі Валерыя ГАЛУБОЎСКАГА, сёння ў прафесійнай адукацыі Беларусі ствараецца сітуацыя поспеху, у моладзі з'яўляецца магчымасць развіваць сваю кар'еру праз засваенне сучасных кампетэнцый.

Галоўны вынік конкурсу — гэта каласальны інтарэс гледачоў да працы цырульнікаў, кандытараў, кухараў, электраманцёраў, сталяроў, сантэхнікаў, плітачнікаў, муляраў і іншых прадстаўнікоў рабочых прафесій. Футбольны манеж за два дні наведалі некалькі тысяч школьнікаў — такім чынам рассякаецца яго прафарыентацыйная мэта. Дзве кампетэнцыі — «Хлебапячэнне» і «Кузаўны рамонт» — гледачы назіралі анлайн, таму што размясціць пад дахам Футбольнага манежа пякарню і аўтамайстэрню было немагчыма. Яшчэ дзве кампетэнцыі — «Зварачныя работы» і «Эксплуатацыя сельскагаспадарчых машын» — былі прадстаўлены побач з галоўнай пляцоўкай. Для апошняй Мінскі трактарны завод выдзеліў тры найноўшыя свае трактары. Упершыню на нацыянальным чэмпіянаце вызначалі найлепшых у кампетэнцыях «Геадэзія», «Аграномія», «Дашкольная адукацыя»...

Мерапрыемства аб'яднала намаганні прадстаўнікоў вытворчасці і адукацыі. Каласальную падтрымку конкурсу аказалі практычна ўсе галіновыя міністэрствы. «Гэта сведчыць аб тым, што WorldSkіlls — не проста гульні, а сур'ёзная платформа для ўзаемадзеяння», — падкрэсліў Валерый Галубоўскі.

Пераможцы былі вызначаныя ў кожнай з 37 прафесійных кампетэнцый. Сярод залатых прызёраў WorldSkіlls Belarus 2018 — пераможца ў намінацыі «Вэб-дызайн і распрацоўка» студэнт Беларускай дзяржаўнай акадэміі сувязі Аляксей Крупскі. Найлепшай у кампетэнцыі «Рэстаранны сэрвіс» прызнана студэнтка Магілёўскага дзяржаўнага ўніверсітэта харчавання Дар'я Ерафеенка. У намінацыі «Эксплуатацыя сельскагаспадарчых машын» — навучэнец Смілавіцкага сельскагаспадарчага прафесійнага ліцэя Павел Хмяльніцкі.

У фінале выступалі больш як тры сотні канкурсантаў з устаноў прафесійна-тэхнічнай, сярэдняй спецыяльнай і вышэйшай адукацыі, а таксама маладыя рабочыя прадпрыемстваў. Акрамя беларусаў, удзел у спаборніцтвах прынялі таксама прадстаўнікі з Расіі і Казахстана. Па выніках рэспубліканскага конкурсу будзе сфарміравана нацыянальная зборная, якая ў 2019 годзе прадставіць Беларусь на 45-м міжнародным чэмпіянаце WorldSkіlls Competіtіon у Казані.

Пераможцы вызначаліся таксама і на пляцоўках рэспубліканскага конкурсу JunіorSkіlls Belarus. Спаборніцтвы праводзіліся ў 10 кампетэнцыях (пераважна ў сферы ІТ) сярод школьнікаў ва ўзросце ад 10 да 17 гадоў.

У ліку юніёраў, якія заваявалі залаты медаль руху JunіorSkіlls, пераможцы ў намінацыі «Мабільная робататэхніка» (узроставая група 10—13 гадоў) — навучэнцы сталічнай гімназіі № 10 Мацвей Старавойтаў і Аляксандр Васілеўскі. У намінацыі «Графічны дызайн» (14—17 гадоў) залаты медаль заваяваў гімназіст з Віцебска Максім Цароў.

Былі выбраныя таксама і пераможцы DeafSkіlls — гэты рух аб'ядноўвае людзей з парушэннямі слыху, якія зацікаўлены ў павышэнні якасці жыцця, эканамічным і прафесійным развіцці. Золата ў намінацыі «Вэб-дызайн і распрацоўка» — у навучэнца Мінскага дзяржаўнага каледжа электронікі Антона Каратышэўскага, у намінацыі «Тэхналогія моды» — у навучэнкі Гомельскага дзяржаўнага прафесійна-тэхнічнага каледжа бытавога абслугоўвання Алены Коўшык. Прадстаўнікі профільных міністэрстваў, падпарадкаваных арганізацый і прадпрыемстваў уручылі пераможцам медалі, а таксама памятныя падарункі.

Надзея НІКАЛАЕВА

Фота Анатоля КЛЕШЧУКА

Загаловак у газеце: Не ўпусцілі свой шанц

Дадаць каментар

Выбар рэдакцыі

Грамадства

Школа заўтрашняга дня. У трэндзе — медыянавыкі, гейміфікацыя і сторытэлінг

Школа заўтрашняга дня. У трэндзе — медыянавыкі, гейміфікацыя і сторытэлінг

У мінулыя выхадныя сталічны бізнес-клуб «Імагуру» ўжо другі раз прымаў на сваіх плошчах педагагічную неканферэнцыю. 

Культура

Гісторыкі спадзяюцца знайсці дакладную дату заснавання Мірскага замка

Гісторыкі спадзяюцца знайсці дакладную дату заснавання Мірскага замка

Вызначыць дакладны час з'яўлення на Беларусі вядомага абарончага збудавання дагэтуль немагчыма, хоць розных гіпотэз існуе шмат.

Грамадства

«Ніколі не губляйце мару дзяцінства!»

«Ніколі не губляйце мару дзяцінства!»

Мы з Аленай Варановіч пазнаёміліся выпадкова, на вуліцы. Адразу разгаварыліся і знайшлі агульную мову. Тады за кубкам кавы яна сказала мне важныя словы: «Ніколі не губляй мару дзяцінства».

Спорт

Уладзімір Шантаровіч: Кажуць, я — геній, і мне гэта вельмі не падабаецца

Уладзімір Шантаровіч: Кажуць, я — геній, і мне гэта вельмі не падабаецца

Як трэнер пабудаваў сістэму, якая выхоўвае алімпійскіх чэмпіёнаў.