Прэзідэнт Беларусі Аляксандр Лукашэнка ўчора сустрэўся са старшынёй савета дырэктараў і ўладальнікам групы кампаній «Штадлер» Петэрам Шпулерам. Кіраўнік дзяржавы ўспомніў іх першую сустрэчу і абмеркаваў прапановы па новай будоўлі.
«Яна (вытворчасць. — Аўт.) працуе выдатна, як я інфармаваны, загрузка прадпрыемства ёсць, і планы па загрузцы павялічваюцца, — адзначыў Прэзідэнт. — І ведаю, што вы гатовыя прапанаваць новую будоўлю, новае прадпрыемства ці пашырэнне прадпрыемства. І для мяне гэта вельмі цікава».
Спадар Шпулер адзначыў, што з апошняй сустрэчы, якая прайшла 1 жніўня 2016 года, адбыўся шэраг пазітыўных змяненняў. У тым ліку быў атрыманы заказ ад «Аэраэкспрэса» ў Маскве, чые рэйсы злучаюць тры аэрапорты з цэнтрам горада. Цягнікі, вырабленыя ў Беларусі, зараз выконваюць гэтую важную задачу. Пасля сустрэчы з Прэзідэнтам Петэр Шпулер пракаментаваў для журналістаў нюансы гэтай здзелкі. Усяго было выраблена 24 двухпавярховыя саставы. Але з-за эканамічнага спаду заказчык змог набыць толькі 11 з іх. Тым не менш пакупнік быў знойдзены: дзевяць цягнікоў накіраваныя ў Азербайджан, а яшчэ чатыры — у Грузію.
Кіраўніцтва «Штадлера» тлумачыць, што бачыць патэнцыял і магчымыя змяненні на рынку СНД. Акрамя таго, іх цікавяць краіны Цэнтральнай Еўропы, куды ўжо былі пастаўкі. Не так даўно прадпрыемства выйграла тэндар на пастаўку трамваяў у Балівію. Уся партыя будзе створана ў Фаніпалі, і гэта першы заказ з Лацінскай Амерыкі.
Што датычыцца новай вытворчасці, Петэр Шпулер растлумачыў, што размова ідзе пра вытворчасць ператваральнікаў. Яны будуць у тым ліку экспартавацца ў краіны Заходняй Еўропы як асобны прадукт. Таксама плануецца пашырыць ужо існуючую вытворчасць вагонных кузаваў да 300 адзінак. Разам два праекты патрабуюць каля 25 мільёнаў еўра інвестыцый. А на наступным этапе ў планах пашырыць вытворчасць вагонных кузаваў да 450 адзінак у год. Гэта яшчэ 11 млн еўра. Дарэчы, на 1 мая з моманту пачатку рэалізацыі інвестыцыйнага праекта ў асноўны капітал «Штадлер Мінск» укладзена 83,8 млн рублёў.
Надзея АНІСОВІЧ
Фота БЕЛТА
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.