Вы тут

Юбілей сяброўскай кафедры


Юбілей сяброўскай кафедры

28 мая ў тэлеаудыторыі Інстытута журналістыкі БДУ адсвяткавалі 20-годдзе кафедры літаратурна-мастацкай крытыкі — той самай кафедры, з якой у часопіса “Маладосць” наладжаны вельмі трывалыя і ўзаемавыгодныя — будзем называць рэчы сваімі імёнамі — формы партнёрства і супрацоўніцтва, творчага і делавога.


Маецца на ўвазе рубрыка Cathedra, у якую пішуць выкладчыкі і студэнты, і сумесны конкурс “БрамаМар”, і тое, што студэнты кафедры з першых курсаў становяцца аўтарамі часопіса, а некаторыя ў другой палове навучання маюць патэнцыял стаць рэдактарамі. У якасці прыкладу варта згадаць рэдактара аддзела і аўтара рубрыкі “НеФармат” Святлану Курганаву, якая яшчэ чакае атрымання дыплома, але ўжо “размеркавана” у “Маладосць”. Або Марыю Страх, якая піша ў “Маладосць” як карэспандэнт, а ў сваёй, як кажуць, альма-матэр дарма што студэнтка — з’яўляецца галоўным рэдактарам выдання “Пікнік на абочыне”. Яго выпуск, прысвечаны юбілею кафедры, склалі інтэрв’ю, якія студэнты ўзялі ў выкладчыкаў. Хлопцы і дзяўчаты распавялі, як яны гэта рабілі, як адказна ставіліся да гутарак з мэтрамі і як, даючы волю творчасці, атрымлівалі майстар-класы ад тых, каму яны амаль ужо калегі.

З таго, што не менш уразіла на святочным мерапрыемстве, варта назваць віктарыну, падчас якой прысутным трэба было адказаць на нетрывіяльныя, як было абвешчана, пытанні пра выкладчыкаў кафедры. Яны і праўда нетрывіяльныя: хто ведаў, што Таццяна Дзмітрыеўна Арлова вучылася на агранамічных курсах? Што Людміла Пятроўна Саянкова стажыравалася ў Гарвардзе? Што Арцём Мікалаевіч Кавалеўскі ведае галасы ўсіх птушак? Хто з выкладчыкаў працаваў на метэастанцыі? Хто можа з двух сапсаваных веласіпедаў за вечар скласці адзін спраўны? Хто мае свой сайт?

Яшчэ адна разыначка юбілейнай імпрэзы — віншаванне ад студэнтаў спецыяльнасці “Рэдагаванне”. Увогуле, усе студэнты праявілі ў віншаваннях крэатыўнасць, інакш не быў бы гэта юбілей гэтай кафедры. Але будучыя рэдактары… Шыкоўная, таленавітая перапеўка еўравізійнай “Навсегда” прымусіла гаварыць пра сябе ў калідорах і на лесвіцах, калі ўжо нават і торт быў з’едзены. Звычайны юбілейны салодкі трохпавярховік са свечкамі, якія задзімаліся ўсімі прысутнымі, калі кожны загадаў сваё жаданне. З кожным кавалачкам гэтага пана ў марцыпане трапіла ў прысутныя душы святая вера ва ўласныя сілы і поспехі, і ў тое, што ўсё загаданае збудзецца, калі з асалодаю з’есці кавалак за гэта слаўнае, прыгожае, маляўнічае, урачыстае і ганаровае, плённае і шчаслівае 20-годдзе.

З днём нараджэння, кафедра!

“М”ы

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.