Вы тут

«Гурток маленькіх мовазнаўцаў» працуе ў Віцебску


«Студыя «Цілі-Мілі-Трам» запрашае вучняў 1—3 класаў у «Гурток маленькіх мовазнаўцаў». Размаўляем і пішам на роднай мове, выхоўваем павагу да роднага слова. Цікавімся гісторыяй свайго краю. Знаёмімся з беларускім фальклорам (песні, казкі, гульні, загадкі). І ўсё гэта — з цудоўным настроем, усмешкамі і весялосцю». На такую аб'яву я выпадкова натрапіла падчас камандзіроўкі ў Віцебск. Убачыла яе на старонцы ў сацыяльнай сетцы супрацоўніцы абласной бібліятэкі Ларысы Рагачовай. І адразу ж патэлефанавала па напісаным там нумары.


Так і пазнаёмілася з дырэктарам дзіцячай развівальнай студыі і аўтарам гэтай цудоўнай ідэі Кацярынай АБЕЛЬСКАЙ. Што больш за ўсё здзівіла, сама яна не беларуска. Пераехала жыць у Віцебск з Расіі ў старшым класе, таму мову ў школе не вывучала. Тым не менш што ўсцешыла, шануе яе.

— Мне вельмі падабаецца беларуская мова. Магу свабодна на ёй чытаць, з задавальненнем наведваю спектаклі ў нашым драматычным тэатры і тэатры «Лялька». Хочацца, каб у Віцебску было больш месцаў, дзе можна было б паслухаць прыгожую літаратурную мову. Нядаўна прачыталі з сынам «Гімназію № 13» Андрэя Жвалеўскага ды Яўгеніі Пастэрнак на беларускай мове. Я наўмысна не набывала кнігу на рускай, чакала, пакуль перакладуць. Яна неймаверная. Ігнат доўга хадзіў і напяваў смешныя песні адтуль.Там вельмі шмат «смачных» момантаў.

Маладая мама хоча, каб яе сын добра ведаў не толькі рускую, але і беларускую мову.

— Магчыма, чулі пра білінгвальную перавагу? — тлумачыць Кацярына. — Чым больш моў ведае дзіця, тым лепш развіваецца яго кагнітыўная сфера — увага, мысленне. Гэта дапаможа потым у дарослым жыцці: у прыватнасці, прымаць рашэнне ў сітуацыі выбару, расстаўляць прыярытэты, адрозніць галоўнае ад другаснага. Ёсць шмат эксперыментальных даследаванняў, якія пацвярджаюць, што нават хвароба Альцгеймера ў старасці наўрад ці пагражае білінгвам. У беларусаў, якія маюць дзве дзяржаўныя мовы, ёсць цудоўны шанц выкарыстаць гэтую сітуацыю. Большасць сем'яў у нас у Віцебску размаўляе дома па-руску, наша не выключэнне. Таму я і вырашыла паспрабаваць адкрыць гурток маленькіх мовазнаўцаў. Весці заняткі будзе філолаг Юлія Лукашэвіч.

Паводле слоў Кацярыны Абельскай, некаторыя бацькі прыводзяць школьнікаў у «Цілі-Мілі-Трам», каб падцягнуць узровень ведання беларускай мовы. Праўда, попыт менавіта на гэты прадмет не надта вялікі. Прынамсі, у той дзень, калі я завітала ў студыю, на заняткі па мове прыйшло толькі два вучні 3 класа — Платон ды Ігнат. Тым не менш Кацярына не страчвае надзеі, што прыйсці ў «Гурток маленькіх мовазнаўцаў» знойдуцца ахвотныя. Прынамсі пад пастом Ларысы Рагачовай з'явіўся каментарый бабулі Святланы. «А ў чэрвені можна запісацца? Якраз мой унучак прыедзе ў Віцебск пагасціць».

І яшчэ... Падумалася, што цудоўна, калі б такія моўныя гурткі пачалі з'яўляцца для маленькіх беларусаў і ў іншых гарадах.

Надзея ДРЫЛА

Загаловак у газеце: Гурток маленькіх мовазнаўцаў

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.