Вы тут

Вынікі другога дня наведвання Прэзідэнтам Брэсцкай вобласці


У суботу Аляксандр Лукашэнка наведаў Брэсцкую пагранічную групу, якая ахоўвае мяжу з Польшчай і Украінай працягласцю больш за 349 кіламетраў. Спачатку кіраўніку дзяржавы далажылі аб стане спраў на ўчастку, паказалі тэхніку, а таксама спартыўную залу, у якой займаюцца вайскоўцы.


Фота: БЕЛТА

За мір у Беларусі, рэгіёне, на планеце

Пазней на ўрачыстым пастраенні асабовага складу Брэсцкай пагранічнай групы і курсантаў Інстытута пагранічнай службы Аляксандр Лукашэнка павіншаваў прысутных са стагоддзем утварэння органаў пагранічнай службы Беларусі.

Кіраўнік дзяржавы са шкадаваннем адзначыў, што сёння ў свеце па-ранейшаму трывожна і непрадказальна. Ваеннае проціборства адбываецца практычна на ўсіх кантынентах планеты, таксама нагнятаецца сілавое супрацьстаянне, у тым ліку непасрэдна на мяжы з Беларуссю.

"Прычым вы, як ніхто іншы, ведаеце, што ўзброеныя сутыкненні пачынаюцца менавіта на граніцы, — адзначыў беларускі лідар. — Няпростыя мiжнародныя абставiны і небяспека тэрарыстычных актаў прымушаюць бесперапынна падтрымліваць высокі ўзровень баявой гатоўнасці пагранічных органаў".

Аляксандр Лукашэнка таксама дадаў, што для павышэння баяздольнасці і мабільнасці пагранічныя войскі аснашчаюцца найноўшымі ўзорамі тэхнікі і ўзбраення. Акрамя таго, абсталёўваюцца рубяжы, будуюцца сучасныя комплексы застаў, паляпшаюцца бытавыя ўмовы асабовага складу.

Прэзідэнт падкрэсліў: сёння беларускія памежнікі фактычна стаяць на варце не толькі нацыянальных інтарэсаў сваёй краіны, але і рэгіянальнай, а таксама міжнароднай бяспекі.

"Знаходзячыся на ключавых транзітных шляхах, якія вядуць на Поўнач і Поўдзень, у Еўропу і Азію, Беларусь з'яўляецца надзейным партнёрам многіх дзяржаў у папярэджанні і спыненні трансгранічнай злачыннасці, нелегальнага бізнесу і іншых негатыўных працэсаў, — адзначыў беларускі лідар. — Нашым вайскоўцам удалося значна знізіць наплыў нелегальных мігрантаў у дзяржавы Еўрасаюза".

Аляксандр Лукашэнка таксама дадаў, што сістэматычна на мяжы выяўляюцца асобы, якія знаходзяцца ў міжнародным вышуку, сумесна з іншымі праваахоўнымі органамі рэгулярна выкрываюцца каналы наркатрафіка.

"Вы — носьбіты слаўных баявых традыцый, і павінны заўсёды памятаць пра гэта. Вам не трэба казаць, што порах трэба трымаць сухім. Вы яго кожны дзень, кожную гадзіну, суткамі трымаеце сухім. Менавіта пагранічныя войскі — адны з нешматлікіх, а можа быць і адзіныя, якія ўвесь час знаходзяцца ў поўнай баявой гатоўнасці. Гэтую гатоўнасць неабходна падтрымліваць на належным узроўні і ўсебакова павышаць сваё майстэрства", — сказаў Прэзідэнт.

Ён дадаў, што гарантаваць надзейную бяспеку на граніцы без падтрымкі мясцовага насельніцтва немагчыма, таму неабходна ўвесь час узаемадзейнічаць з жыхарамі памежжа.

Перамога — савецкага народа

Пасля гэтага Прэзідэнт адправіўся ў Брэсцкую крэпасць, дзе ўсклаў кветкі да манумента, а потым адказаў на пытанні журналістаў.

Першае пытанне датычылася таго, што Беларусь нібыта займаецца гістарычным сепаратызмам — такія паведамленні з'яўляюцца ў прэсе саюзнікаў. Кіраўнік дзяржавы адзначыў, што сочыць за гэтай тэмай, пасля чаго выказаўся даволі рэзка і крытычна:

"Камусьці карціць, што дзіўна — у Расіі, прыватызаваць гэтую Перамогу. Як быццам не было на вайне іншых — беларусаў, украінцаў, грузін, армянаў, таджыкаў, туркменаў... Увесь Савецкі Саюз ваяваў, — падкрэсліў Прэзідэнт. — Загінулі нават не сотні і не тысячы, а сотні тысяч. Мы кожнага трэцяга скалечылі і страцілі. Уся Беларусь — гэта помнік. Тысячы спаленых вёсак, ні ў чым не вінаватых людзей, старых, дзяцей".

І агульнай святыняй для многіх народаў з'яўляецца Брэсцкая крэпасць, дадаў Аляксандр Лукашэнка. Паводле яго слоў, дзяліць Перамогу — гэта ліць ваду на млын сапернікаў і праціўнікаў. Прэзідэнт падкрэсліў, што вельмі негатыўна ўспрымае падобныя заявы, што хтосьці гэтую Перамогу заваяваў у адзіночку.

Пачалі ўжо чапляцца і да свят, што праводзяцца ў Беларусі, традыцый, дадаў кіраўнік дзяржавы. Напрыклад, акцыя "Беларусь памятае" — Прэзідэнт нагадаў, што і ў савецкай час існавалі шэсці ветэранаў да помнікаў з партрэтамі загінулых і дзяржаўнымі сімваламі, каб ушанаваць памяць.

На жаль, усё гэта было страчана ў пачатку 90-х гадоў – падчас "нацыяналістычнага чаду", але, як адзначыў беларускі лідар, з яго прыходам на пасаду Прэзідэнта традыцыя шэсцяў і акцый па просьбе ветэранаў была адноўлена. Дарэчы, у іх Аляксандр Лукашэнка прымаў удзел асабіста, людзі ішлі з партрэтамі, нацыянальнымі чырвона-зялёнымі сцягамі — і тады яшчэ "Бессмяротнага палка" не было. "Дык нам што зараз, перакрэсліць нашу традыцыю, выкінуць нашы чырвона-зялёныя стужачкі і бегчы за кімсьці?" — спытаў ён у адказ.

Кіраўнік дзяржавы адзначыў, што сэнс і мэта абедзвюх акцый аднолькавыя — ушанаваць памяць загінулых, таму прыватызацыі быць не павінна, паколькі перамог савецкі народ. Аляксандр Лукашэнка пракаментаваў і іншы папрок у СМІ: нібыта ў нашай краіне ёсць свая перамога — 3 ліпеня замест 9 мая.

Прэзідэнт нагадаў, што ў нашай краіне на Дзень Перамогі ў юбілейныя даты праводзяцца ваенныя парады, тады як у астатнія гады парад праводзіцца 3 ліпеня — у дзень вызвалення Мінска ад нямецка-фашысцкіх захопнікаў, што сімвалізуе і вызваленне Беларусі ў цэлым. Ён таксама дадаў, што гэтая дата была зацверджана ў якасці Дня Незалежнасці на рэферэндуме.

Днямі пачуем новыя факты

Другое пытанне датычылася апошніх паведамленняў аб гучных карупцыйных справах — у прыватнасці затрымання памочніка Прэзідэнта — інспектара па Гродзенскай вобласці Сяргея Раўнейкі.

Паводле слоў Прэзідэнта, Раўнейка трапіў у поле зроку больш за паўтара года таму. Перш за ўсё тут спрацавалі дэкларацыі аб даходах: калі ішло кадравае вывучэнне, Аляксандр Лукашэнка пацікавіўся, адкуль у гэтага чалавека такая раскоша: аўтамабілі і кватэры — да дзясятка.

"Але падазрэнне падазрэннем, нейкія былі факты, — адзначыў Аляксандр Лукашэнка. — Некаторыя бізнесмены звязаны з чыноўнікамі, дык чыноўнік нешта ім робіць. А гэты, дапусцім, каб у Гродзенскай вобласці тытунём гандлявалі, кажа: вы мне плаціце за гэта. Паводзіў сябе як злачынец, самы сапраўдны бандыт".

Беларускі лідар расказаў, што для доказу злачынстваў быў патрэбны выключны факт — так і адбылося: гаворка пра тыя самыя 200 тыс. долараў. Дарэчы, падчас аперацыі, санкцыянаванай самім кіраўніком дзяржавы, Раўнейка быў затрыманы з гэтымі грашыма на руках.

Яшчэ Прэзідэнт расказаў, што днямі мы пачуем новыя факты. Некаторыя людзі ўжо знаходзяцца ў следчым ізалятары, а цяпер рыхтуюцца матэрыялы, якія перададуць сродкам масавай інфармацыі. Ён таксама дадаў, што яму непрыемна даведвацца аб падобных фактах. Кіраўнік дзяржавы нагадаў, што ў Пасланні народу і парламенту ён не тонка — буйна намякнуў, а яшчэ пазней сказаў, што на волі лепш жабраком, чым багатым у турме.

"З усімі будзе тое ж самае, калі будзе выяўлена", — падкрэсліў ён.

Пра работу з моладдзю

Апошняе пытанне датычылася БРСМ: што неабходна для больш эфектыўнай работы гэтай маладзёжнай арганізацыі ў сучасных умовах, спыталі ў Аляксандра Лукашэнкі.

Прэзідэнт адзначыў, што патрэбна жывая работа з моладдзю, каб не было ашуканства, фармалізму, бюракратыі, якія былi ўласцівыя таму камсамолу, у якім быў ён сам, трэба больш жывой справы. Бо, напрыклад, падобныя грамадскія арганізацыі дапамагаюць сфарміраваць той жа кадравы рэзерв. І ў цэлым такую структуру, як БРСМ, можна задзейнічаць у любы час, асабліва — у цяжкі, дадаў кіраўнік дзяржавы.

Беларускі лідар звярнуў увагу, што тыя ж камсамольцы ўнеслі вялікі ўклад у перамогу ў Вялікай Айчыннай вайне. Але сёння ў БРСМ не павінна быць тых недахопаў, што калісьці былі ў камсамола. Для гэтага не варта спяшацца, трэба не фарсіраваць падзеі і спакойна вызначыцца з напрамкамі будучай працы, лічыць Аляксандр Лукашэнка.

Паводле яго слоў, Адміністрацыі Прэзідэнта даручана пачаць цесную работу з БРСМ, каб рэструктурызаваць дзейнасць аб'яднання, вызначыць тыя самыя кірункі працы. Дарэчы, сам кіраўнік дзяржавы ў найбліжэйшы час асабіста сустрэнецца з кіраўніком гэтага і іншых грамадскіх аб'яднанняў, таксама на сустрэчы будуць прысутнічаць і найбольш актыўныя ўдзельнікі.

Уладзіслаў ЛУКАШЭВІЧ

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры у творчую майстэрню?

Як ператварыць звычайны ўрок беларускай літаратуры у творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.