Нядаўна ў Мінску прайшлі курсы павышэння кваліфікацыі па геалагічным картаванні, арганізаваныя Міністэрствам прыродных рэсурсаў і аховы навакольнага асяроддзя Беларусі. Іх прайшлі прадстаўнікі кіруючага апарата, начальнікі аддзелаў, якія адказваюць за касмічнае картаванне, за арганізацыю праектаў па здабычы і выкарыстанні карысных выкапняў Міністэрства мінеральных рэсурсаў Судана. З якой мэтай былі арганізаваны гэтыя курсы, якія далейшыя планы афрыканскай рэспублікі адносна нашай краіны?
Начальнік галоўнага ўпраўлення прыродных рэсурсаў Мінпрыроды Сяргей Мамчык расказаў, што спецыялісты з Судана прайшлі тэарэтычную і практычную часткі курсаў з выездамі на месцы.
— Курсы былі арганізаваны па ініцыятыве суданскага боку, якая была ім выказана падчас леташняга візіту дэлегацыі нашага міністэрства. Маючы вялікі вопыт у сферы геалагічнага картавання, мы расказалі аб тым, як працуе гэтая сістэма ў нашай краіне на кожным этапе збору геалагічнай інфармацыі (атрыманне касмічных здымкаў, іх апрацоўка, праверка даных у палявых умовах, складанне картаў з дапамогай сучасных ГІС-тэхналогій).
Спецыялісты з Судана зацікавіліся і арганізацыяй работы па ахове аб'ектаў для турызму ў Беларусі, паколькі сёння яны актыўна развіваюць новую праграму геапаркаў. Мы правялі гасцей па экалагічнай сцежцы заказніка «Налібоцкі», паказалі шмат цікавых месцаў, распавялі пра меры па ахове жывёльнага і расліннага свету.
Падчас праходжання курсаў госці наведалі РУП «ВА «Беларуснафта» Інстытута «БелНДПІнафта» ў Гомелі. Там на высокім узроўні знаходзіцца вывучэнне горных парод, а таксама захоўваюцца многія экзэмпляры (цікава, што керн захоўваецца на вышыні 4-павярховага дома), якія дастаюць па QR-кодзе.
Судан — краіна, якая гістарычна актыўна займаецца здабычай золата. Праблема ў тым, што золата ў гэтай краіне змяшчаецца ў рудзе ў дробнай фракцыі («пыляватае» золата). Для таго каб яго здабыць з пароды, неабходна выцягнуць пустую пароду, атрымаць канцэнтрат. З гэтага канцэнтрату звычайна золата атрымліваюць шляхам амальгамавання (метад здабывання металаў з руд растварэннем у ртуці). Гэта небяспечна як для прыроды, так і для здароўя старацеляў. З мэтай змены тэхналогіі госці наведалі ААТ «НВА Цэнтр», дзе ім расказалі пра бязртутнае абагачэнне парод, у якіх змяшчаецца золата, і якое можа прымяняцца і ў Судане.
Для афрыканскай дэлегацыі было важна азнаёміцца з нашымі геаінфармацыйнымі тэхналогіямі, атрыманнем касмічных здымкаў, паколькі гэта асноўная крыніца геаінфармацыі ў Судане сёння. Здымкі беларускага касмічнага апарата цяпер складуць канкурэнцыю амерыканскім і кітайскім. Гасцей зацікавілі і іншыя тэхналогіі па здабычы солі, рудных і каштоўных металаў, рэдказямельных элементаў, храмітаў.
Намеснік міністра прыродных рэсурсаў і аховы навакольнага асяроддзя Рэспублікі Беларусь Аляксандр Корбут выказаў спадзяванне, што ў далейшым такія курсы будуць праходзіць на пастаяннай аснове:
— Мы атрымалі спрыяльны вопыт для дзвюх краін і паклалі пачатак вялікага супрацоўніцтва. За гэты кароткі час немагчыма паказаць усе славутыя мясціны краіны, але мы спадзяёмся, што госці атрымалі ўяўленне аб нашай зямлі, сфарміравалі добрае ўражанне.
Вольга ПРАЛЮК
Мерапрыемства праводзілася на добраахвотнай аснове.
Не выявіць ні секунды абыякавасці.
