Нацыянальны фестываль беларускай паэзіі і песні ў Маладзечне мяняе фармат. Акрамя традыцыйна адмысловых канцэртаў маэстра Міхаіла Фінберга, не менш відовішчнай абяцае быць творчая праграма Саюза пісьменнікаў Беларусі. Чым парадуе маладзечанскага гледача паэтычная гасцёўня, якая распачне работу 9 чэрвеня а 11 гадзіне, расказвае першы намеснік старшыні СПБ Алена Стэльмах:
— Перш за ўсё нас кранае магчымасць гэтым знакавым днём пабываць на радзіме класіка беларускай літаратуры Янкі Купалы. Вязынка — калыска будучага Песняра. На гэтай жыватворчай зямлі асабліва адчуваецца існасць малой радзімы, якую зварушлівым словам паэт праславіў на ўвесь свет. Менавіта з наведвання Купалаўскага мемарыяльнага запаведніка «Вязынка» для творчай групы СПБ распачнецца фестывальная праграма.
Па-другое, цешыць, што дзея адбудзецца на галоўнай сцэне Палаца культуры г. Маладзечна. «Мой пачатак і мой выток» — такая назва яднае самых розных паэтаў. Усе выступоўцы праз свае вершы данясуць да гледача асабістае адчуванне значнасці месца, адкуль пачаўся іх шлях у вялікае жыццё.
Першым на сцэну выйдзе Нацыянальны акадэмічны народны хор Рэспублікі Беларусь імя Г. І. Цітовіча. У яго выкананні прагучаць песні на словы знакамітых беларускіх паэтаў, якія прыгожым мастацкім словам уганароўваюць сваю Айчыну. Да іх далучацца знакамітыя паэты — лаўрэаты Дзяржаўнай прэміі Рэспублікі Беларусь Мікола Мятліцкі, Міхась Башлакоў, лаўрэат Нацыянальнай літаратурнай прэміі Рэспублікі Беларусь Міхась Пазнякоў.
Народная артыстка Рэспублікі Беларусь Таццяна Мархель прачытае ўзнёслыя радкі з купалаўскіх твораў. На сцэну выйдзе і таленавітая моладзь — лаўрэат Нацыянальнай літаратурнай прэміі ў намінацыі «Дэбют» Маргарыта Латышкевіч, паэтэса і перакладчыца Юлія Алейчанка.
Да таго ж у паэтычнай гасцёўні адбудзецца своеасаблівае падарожжа па Беларусі. Выступяць на фэсце і прадстаўнікі ўсіх аддзяленняў СПБ. Будуць гучаць пранікнёныя радкі пра родную мову, хлеб, Бацькаўшчыну...
Паэт-песеннік Кастусь Цыбульскі падорыць песню-прысвячэнне «Сэрца вёскі маёй». У выкананні Людмілы Кебіч прагучыць аўтарская песня «Зялёны горад», у якой яна ўхваляе Маладзечна, горад, дзе вучылася. Творцы назапасілі і вясёлых вершаў ды мелодый, бо, як вядома, вёска — гэта яшчэ і скарбонка народнага гумару.
Удзельнікам паэтычнай гасцёўні стане таксама пераможца Мінскага абласнога этапу Рэспубліканскага конкурсу юных чытальнікаў «Жывая класіка» Вікторыя Дзільман, вучаніца сярэдняй школы No 2 г. Мар’іна Горка. У яе выкананні прагучыць верш Якуба Коласа «Мой дом».
Выступленні паэтаў будуць суправаджаць танцавальныя калектывы г. Маладзечна. Асновай для відэараду стануць фотаздымкі члена СПБ Уладзіслава Цыдзіка, якія ён прадставіць з падрыхтаванай да выхаду кнігі «Бачу Беларусь такой».
Між іншым, вядучыя праграмы, як уласна і аўтары яе сцэнарыя, — вядомыя паэты, медыйныя персоны Таццяна Сівец і Навум Гальпяровіч.
Акрамя таго, Саюз пісьменнікаў Беларусі рыхтуе да Нацыянальнага фестывалю яшчэ адзін творчы сюрпрыз. У дзіцячай музычнай школе мастацтваў г. Маладзечна а 15 гадзіне паэты Мікола Мятліцкі, Кастусь Цыбульскі, Навум Гальпяровіч, Марыя Кобец і Уладзімір Цанунін прадставяць прэзентацыі родных мясцін, якія ўсё жыццё чаруюць іх дзіўнымі паэтычнымі вобразамі. «Спавітыя лёсам з Радзімай» — так гавораць пра сябе творцы і будуць рады бачыць на імпрэзе маладзечанцаў і гасцей.
Паэтаў запросіць у студыю і маладзечанскае тэлебачанне, каб далучыць да святочнай атмасферы Нацыянальнага фестывалю беларускай паэзіі і песні шырокае кола гледачоў.
Марыя ЛІПЕНЬ
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.