У выдавецтве «Чатыры чвэрці» выйшла кніга публіцыстыкі і мастацкіх твораў бабруйскага пісьменніка Міколы Давідовіча «Падрэзанае крыло».
У кнігу ўвайшлі аповесць, цыкл апавяданняў, публіцыстыка. З апошняга асабліва вылучаецца душэўнай замілаванасцю цыкл «Мае землякі — бортнікаўцы».
Бортнікі — вёска, у якой нарадзіўся пісьменнік. З любасцю вымалёўвае ён характары сяльчан. Яго героі — людзі з няпростым лёсам, акурат такія, пра каго можна сказаць: «У яго падрэзанае крыло». Камбайнер Васіль Бурак, які заўсёды заканчваў працу на жніве апошнім, журналіст Аляксей Антановіч, вясковы хлопец Іван Маёраў... Чытаю пра нялёгкую штодзённасць гэтых людзей і думаю, што і ў маёй роднай вёсачцы калісьці былі каларытныя цікавыя сяляне — землякі, пра якіх можна і трэба б было напісаць — дзеля памяці, дзеля нашчадкаў. Але неяк не атрымалася... Міколу Давідовічу гэта ўдалося, відаць, найперш таму, што ён умее пільна і ўдумліва назіраць за рухам жыцця іншых людзей.
Цікавая серыя публіцыстычных нарысаў змешчана ў кнізе пад назвай «Які ты, наш сучаснік?» Пісьменнік акцэнтуе ўвагу на складаных жыццёвых момантах: настаўнік Іван Пятровіч гандлюе гароднінай, якую выгадаваў на ўласным падворку; бабуля Тоня, каб дапамагчы дачцэ гадаваць дзяцей, працуе кандуктарам; дзяўчына Наталля абрала шлях служэння Богу — стала манахіняй; бабруйчанін Васіль Баранчук знайшоў сябе ў прадпрымальніцтве, пры гэтым ён чулы, шчыры вернік... Усіх гэтых людзей, перакананы аўтар, аб’ядноўвае ўпэўненасць: цяжкасці ёсць, але яны часовыя...
Мікола Давідовіч — творца, які глядзіць на свет удумліва, адзначае дробныя, але ж значныя па сваёй сутнасці рухі ў ім, робіць высновы і дорыць магчымасць нам, чытачам, зірнуць на гэты свет яго вачыма.
Віктар КУНЦЭВІЧ, кіраўнік секцыі паэзіі Магілёўскага абласнога аддзялення СПБ
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.