Напярэдадні закрыцця тэатральнага сезона з 6 па 13 чэрвеня на сцэне Вялікага тэатра Беларусі пройдзе ўжо традыцыйны, пяты фестываль "Балетнае лета ў Вялікім". Сёлета гледачы ўбачаць найлепшыя спектаклі тэатра і маштабны гала-канцэрт, які аб'яднае зорак сусветнага балета з тэатраў Берліна, Дрэздэна, Лондана, Таліна, Масквы і Кіева, Вены і нават Пекіна. Іскрынкай праграмы стане адноўленая пастаноўка 1911 года — балет "Пятрушка" з легендарных "Рускіх сезонаў".
Як адзначыў знакаміты танцор і балетмайстар, народны артыст Расіі Андрыс Ліепа, нягледзячы на тое, што ён займаўся рэстаўрацыяй спектакля Ігара Стравінскага з 1993 года і зрабіў ужо больш як 30 пастановак у розных краінах, прэм'ера ў Мінску будзе асаблівай і максімальна блізкай да арыгінала. Напрыклад, нюансы народных танцаў прафесійным балетным танцорам дапамагаў засвоіць запрошаны кансультант з ансамбля танца Майсеева. Гэтаксама рупліва і далікатна падышоў пастаноўшчык да дэкарацый і касцюмаў, якія ўзнаўляліся па ўспамінах гледачоў і крытыкаў пачатку мінулага стагоддзя... Пастаноўка рыхтуецца трыма акцёрскімі складамі, але каму выпадзе адкрываць пяты сезон балетных вечароў — пакуль сакрэт, які раскрыецца толькі ў дзень прэм'еры, 6 чэрвеня.
6 і 7 чэрвеня следам за "Пятрушкай" тэатралы ўбачаць яшчэ два хіты "Рускіх сезонаў" — балеты "Шэхеразада" М. Рымскага-Корсакава і "Жар-Птушка" І. Стравінскага.
9 чэрвеня Вялікі тэатр прадставіць адну са сваіх візітных картак — "Спартака" А. Хачатурана. У далейшай праграме — прэм'ера сёлетняга тэатральнага сезона "Карсар" на музыку А. Адана, Ц. Пуні, Л. Дэліба, Р. Дрыга, П. Альдэнбургскага (10 чэрвеня), знакамітае "Лебядзінае возера" П. Чайкоўскага (11 чэрвеня) і леташняя прэм'ера — прытча пра каханне птушынае і чалавечае "Ор і Ора" М. Крылова (12 чэрвеня). Завершыць жа "Балетнае лета" зборны гала-канцэрт, у якім, паводле слоў мастацкага кіраўніка балета Вялікага тэатра Юрыя Траяна, нароўні з вядучымі танцорамі сусветна вядомых тэатраў возьме ўдзел практычна ўся харэаграфічная трупа Вялікага.
Білетаў на балетныя вечары ўжо амаль не дастаць. І гэта, бадай, найлепшая рэклама фестывалю, які за 5 гадоў ператварыўся сапраўды ў вялікую мастацкую падзею.
Вікторыя ЦЕЛЯШУК
Сітуацыя будзе толькі пагаршацца.
Канцэрт для дзяцей і моладзі, пластычны спектакль Ягора Дружыніна і «Рок-панарама».