24 Верасень, панядзелак

Вы тут

Калі сэрца спявае


У Мінску прайшоў дабрачынны канцэрт для састарэлых і людзей з асаблівасцямі развіцця.

Учора ў сталічным доме-інтэрнаце для састарэлых і інвалідаў адбывалася свята, і гэта адчувалася нават не таму, што ад увахода сустракала музыка і нябачнай ніткай вяла ва ўнутраны дворык, які ператварыўся адначасова ў сцэну і глядзельную залу пад адкрытым небам. Святочны настрой чытаўся перадусім на тварах прысутных — соцень слухачоў канцэрта «Ад сэрца да сэрца», што ўжо шмат гадоў запар ладзяць тут напачатку лета прадзюсарскі цэнтр народных артыстаў Беларусі Ядвігі Паплаўскай і Аляксандра Ціхановіча «Профіартвідэан» сумесна з дабрачынным фондам «Спірас» імя Аляксандра Ціхановіча.


...Многія гледачы — і тыя, хто з дапамогай валанцёраў прыехаў сюды з іншых гарадоў, і жыхары мінскага дома-інтэрната — відавочна рыхтаваліся да сустрэчы з артыстамі загадзя: прынеслі блакноты для аўтографаў, апранулі найлепшыя ўборы і туфлікі з абцасамі, павязалі святочныя хусткі і гальштукі... Яно і зразумела: для тых, хто амаль увесь час праводзіць у сценах дома-інтэрната, магчымасць трапіць на вялікі жывы канцэрт выпадае гады ў рады, і гэта без перабольшання свята. Таму гледачы сустракалі і праводзілі апладысментамі кожнага выканаўцы, падпявалі і «Купалінку», і сучасныя эстрадныя хіты Тэа, Аляксея Хлястова, Вольгі Жукавай, Дзмітрыя Каралёва ды іншых артыстаў, і класічнае «O, sole mіo!», па-дзіцячы шчыра радаваліся і танцавалі пад завадныя рытмы — нават на інвалідных крэслах. А даўнюю сяброўку дома-інтэрната Анастасію Ціхановіч жыхары і персанал тут наогул сустракаюць як родную.

— Галоўная мэта канцэртаў «Ад сэрца да сэрца», традыцыю якіх заклаў некалі яшчэ мой тата, — проста падарыць радасць людзям з няпростымі лёсамі, але адкрытымі сэрцамі, якія вымушаны пастаянна жыць у доме-інтэрнаце, — зазначае Анастасія Ціхановіч. — І гэта вельмі важна для нас, бо дзякуючы такім сустрэчам мы вучымся любові, міласэрнасці, радавацца кожнаму імгненню жыцця. Хачу падзякаваць усім артыстам, якія год ад году ўдзельнічаюць у праекце — кола артыстаў пашыраецца, многія загадзя цікавяцца, ці адбудзецца сёлетні канцэрт. І гэта вельмі прыемна чуць: значыць, наша справа працягнецца, спадзяюся, яшчэ на доўгія гады.

«Я ўжо чатыры гады ўдзельнічаю ў праекце і штораз адчуваю, як раскрываецца сэрца, — прызнаецца заслужаная артыстка Беларусі Алена Ланская. — Людзі з асаблівасцямі развіцця не ўмеюць падладжвацца, хітрыць, яны шчырыя як дзеці, і калі ім падабаецца, яны спяваюць і танцуюць, а калі не — разварочваюцца і сыходзяць. Гэтыя канцэрты паказваюць, чаго ты варты як артыст, і я рада, што нас тут заўжды чакаюць і так цёпла сустракаюць». Дырэктар дома-інтэрната Эльміра Шэрметава дадае, што падобныя музычныя сустрэчы маюць і тэрапеўтычны эфект, бо нясуць толькі светлыя, станоўчыя эмоцыі.

Акрамя летняга канцэрта, нагадала Анастасія Ціхановіч, прадзюсарскі цэнтр «Профіартвідэан» і дабрачынны фонд «Спірас» цягам года ладзяць для людзей з абмежаванымі магчымасцямі і асаблівасцямі развіцця шматлікія дабрачынныя акцыі, культурныя і спартыўныя мерапрыемствы, а таксама зімовую музычную праграму, дзе па магчымасці збіраюць пастаяльцаў дамоў-інтэрнатаў з розных куткоў Беларусі. Сёлета ж да ліку акцый дабавілася яшчэ адна. У студзені, у дзень памяці Аляксандра Ціхановіча прайшла акцыя «Любоў у падарунак», падчас якой 300 мінчан атрымалі падарункі-сэрцайкі, зробленыя ўласнаручна людзьмі, якія пражываюць у спецыялізаваных дамах-інтэрнатах. А ўзамен зрабілі ім простыя падарункі — кнігі, музычныя дыскі, цукеркі, паштоўкі з цёплымі словамі і частку ўласнай душы.

Вікторыя ЦЕЛЯШУК

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.