Калі пералічваюць вядомых пісьменнікаў, якія нарадзіліся на Уздзеншчыне, — сярод першых называюць Кандрата Крапіву. Сапраўды, кожны з нас лёгка прыгадае хоць бы некалькі п'ес, баек, працытуе радкі.
Здаецца, усё ўжо даўно занатавана і вывучана, што датычыцца біяграфіі класіка. Але яго прапраўнук Глеб Александровіч (вучань мінскай гімназіі № 23) па-свойму прадоўжыў вывучаць спадчыну знакамітага продка.
«Мінскія адрасы Кандрата Крапівы» — так назваў хлопец сваю навукова-даследчую работу. Ён удакладніў, у які час і дзе пражываў у сталіцы Кандрат Крапіва, з якімі справамі, творчымі пошукамі быў звязаны кожны з гэтых перыядаў жыцця пісьменніка. Навуковым кіраўніком юнага даследчыка стала ўнучка Кандрата Крапівы — кандыдат мастацтвазнаўства Алена Атраховіч.
Днямі яны разам наведалі вёску Нізок Уздзенскага раёна — малую радзіму Кандрата Крапівы. Хата, дзе нарадзіўся будучы класік, зразумела, да нашых дзён не захавалася. Але месца на якім яна стаяла, тут ведае кожны.
Сваю навукова-даследчую работу Глеб перадаў у літаратурны музей Кандрата Крапівы Уздзенскай сярэдняй школы № 2 (там у фондах захоўваецца 250 рэдкіх экспанатаў). Алена Атраховіч падарыла копіі архіўных дакументаў, кнігі Кандрата Крапівы, малюнкі мастака Анатоля Александровіча да зборніка твораў класіка.
Падарункам для музея стала і калекцыя фотаздымкаў, якую даслала газета «Звязда». Фатаграфіі расказваюць, як герояў баек вядомага пісьменніка адлюстроўваюць юныя мастакі, скульптары, майстры дэкаратыўна-прыкладнога мастацтва.
Яўген ПЯСЕЦКІ
Фота аўтара
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
