Вы тут

У паўфінале «Жывой класікі» сабраліся найлепшыя чытальнікі


Паўфінал конкурсу юных чытальнікаў «Жывая класіка» гэтымі днямі прайшоў у Нацыянальнай бібліятэцы Беларусі. Сёлета ён прысвечаны Году малой радзімы. Таму ўдзельнікі выбіралі адпаведныя творы, якія апяваюць хараство роднай зямлі.


У журы ўвайшлі прадстаўнікі ўстаноў, што заснавалі конкурс, — Міністэрства інфармацыі, Міністэрства адукацыі, Саюза пісьменнікаў Беларусі, — а таксама іншыя творцы і грамадскія дзеячы. Першы намеснік старшыні Саюза пісьменнікаў Беларусі Алена СТЭЛЬМАХ зазначыла:

— Старонкі кніг нібы ажылі, бо гучалі самыя лепшыя вершы, самыя адметныя выбраныя ўрыўкі з прозы. Ажылі таксама і героі — усе ўдзельнікі вельмі вобразна і маляўніча падышлі да стварэння сваіх вобразаў, каб перадаць сэнс выбраных твораў. Хочацца пажадаць, каб тыя хваляванні, з якімі юныя чытальнікі завітвалі сюды, былі ўвасоблены ў добрыя вынікі рэспубліканскага конкурсу.

Чытальнікі ўсіх узростаў — і першакласнікі, і старэйшыя школьнікі па-свойму здзіўлялі майстэрствам чытання нашай класікі, сваёй яскравай эмацыянальнасцю, добра падабранымі вобразамі.

Члены журы звярталі ўвагу на тое, наколькі глыбока і пранікнёна чытальнік пагрузіўся ў твор, які быў ім абраны. Наколькі твор адпавядаў тэматыцы сёлетняга конкурсу — «Жывая класіка. Прысвячэнне малой радзіме». Вядома, члены журы мелі на ўвазе і той артыстызм, з якім выконваліся творы. Такім чынам, у кожнай узроставай катэгорыі былі абраны па тры пераможцы.

Уладзіслаў Пракапенка з Мінска чытаў верш Артура Вольскага «Дзедаў госць». Ён расказаў карэспандэнту «Звязды», як рыхтаваўся да конкурсу:

— Прачытаўшы гэты верш адзін раз, я вельмі добра сабе ўявіў усё, што ў ім адбываецца. Можна сказаць, што ён запаў мне ў душу, таму вырашыў яго прачытаць. Я ўявіў сабе, як дзейнічаюць героі, у якім памяшканні. Падобную хату, як у вершы, я бачу ў сваіх бабулі і дзядулі ў вёсцы Скрыбаўцы Шчучынскага раёна. Дзед з гэтага твора нагадаў мне ўласнага дзядулю. Увогуле я часта вучу на памяць і чытаю вершы. Мае любімыя паэты — Якуб Колас і Артур Вольскі. Я вельмі люблю беларускую літаратуру, бо яна напісана на нашай роднай мове... Калі я чытаю пра тое, дзе герой твора сумуе, то ў маёй душы таксама з'яўляецца сумны смайлік. А калі твор радасны — то і ў мяне ў душы радасны смайлік!

Фінал рэспубліканскага конкурсу «Жывая класіка» адбудзецца 2 верасня. Ён пройдзе ў межах Дня беларускага пісьменства, які сёлета будзе ладзіцца ў Іванаве.

Ніна ШЧАРБАЧЭВІЧ

Фота Ганны ЗАНКАВІЧ

Выбар рэдакцыі

Грамадства

Запусцілі найноўшы спецыялiзаваны комплекс для падрыхтоўкi судовых экспертаў

Запусцілі найноўшы спецыялiзаваны комплекс для падрыхтоўкi судовых экспертаў

Дзяржаўнаму камiтэту судовых экспертыз споўнiлася сем гадоў.

Грамадства

Як захаваць сэрца i сасуды здаровымi

Як захаваць сэрца i сасуды здаровымi

Адным з самых распаўсюджаных захворванняў у свеце з'яўляецца артэрыяльная гiпертэнзiя.

Грамадства

Валанцёр праекта «Дапамога бяздомным»: Цяпло i падтрымка нават праз ежу перадаюцца

Валанцёр праекта «Дапамога бяздомным»: Цяпло i падтрымка нават праз ежу перадаюцца

Яны кормяць гарачымi абедамi больш за сто чалавек, якiя апынулiся на абочыне жыцця.

Грамадства

Чаму трэба праводзiць цеплавую мадэрнiзацыю?

Чаму трэба праводзiць цеплавую мадэрнiзацыю?

У распараджэннi, падпiсаным на мiнулым тыднi кiраўнiком дзяржавы, ёсць пункт, якi датычыцца капрамонту жыллёвага фонду.