Два з шэрагу мацнейшых футбольных грандаў пачалі чэмпіянат свету па футболе ў нядзелю і абодва не атрымалі выдатную адзнаку, а чэмпіён нават праваліў іспыт.
Мала хто сумняваўся ў перамозе каманды Германіі над зборнай Мексікі ў групе F, але насамрэч адбылося ўсё наадварот – чэмпіёны свету праігралі свой першы матч на сёлетнім мундзіялі. Мабыць, немцы слаба настроіліся на гэтую сустрэчу, у пачатку матча іх гульня зусім не паходзіла на чэмпіёнскую, і такія абставіны ў рэшце рэшт і прывялі да гала ў іх вароты -- мяч забіў Ірвінг Ласана. Пасля гэтага нямецкая машына абрушыла ўсю сваю моц на вароты ацтэкаў, але тыя выстаялі, а каманда Іяхіма Лёва сур’ёзна панізіла свой статус аднаго з галоўных фаварытаў турніра.
З гэтай нагоды, дарэчы, вось якая падзея адбылася ў час гульні ў самой Мексіцы. Сейсмолагі зафіксавалі ў сталіцы краіны Мехіка землятрасенне штучнай прыроды ў момант, калі нацыянальная каманда забіла гол у вароты Германіі. "Землятрасенне, зафіксаванае ў Мехіка, мела штучную прыроду. Магчыма, з-за масавых скачкоў падчас гола зборнай Мексікі на мундыялі. Як мінімум два датчыкі ў горадзе адзначылі яго", - гаворыцца ў паведамленні сеткі маніторынгу землятрасенняў SIMMSA. Дадзеныя мексіканскіх сейсмолагаў пацвярджаюць іх калегі з Чылі.
Толькі на цэнтральнай плошчы Мехіка, Сакала, у нядзелю сабралося каля 75 тысяч чалавек, каб паглядзець матч з Германіяй, і іх спадзяванні спраўдзіліся, а вось маставой і асфальту давялося цяжка.
Пяціразовыя чэмпіёны свету бразільцы свой матч з камандай Швейцарыі ў групе Е пачалі вельмі магутна і забілі гол ужо на 20-й хвіліне, вызначыўся Філіпе Каўціньё. Аднак швейцарцаў гэта толькі раззлавала, і праз некаторы час яны вельмі актыўна кінуліся адагрывацца, што для лацінаамерыканцаў стала нечаканасцю. Іх суперзорка Неймар, зразумела, шмат разоў прымушаў парушаць еўрапейцаў на сабе правілы і стаміўся падымацца з газона і скардзіцца суддзі, але, тым не менш, пайшоў з поля без забітага гола.
А вось Швейцарыя свайго дабілася – гол Сцівена Цубера з вуглавога збянтэжыў бразільцаў, і хоць яны і накінуліся на вароты саперніка амаль усёй камандай, яшчэ раз забіць не змаглі. Толькі нічыя для футбалістаў з радзімы караля футбола Пеле, і ўсе фаварыты сёлетняга чэмпіянату пакуль не паказваюць тых вынікаў, якую ад іх чакаюць.
У даволі сумным матчы дзвюх другіх каманд групы Е зборная Сербіі з лікам 1:0 абыграла зборную Коста-Рыкі. Гульню крыху выратаваў прыгожы гол са штрафнога Аляксандра Каларава.
Іван КУПАРВАС
Фота rsport.ria.ru
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!