У Рэспубліканскім конкурсе юных чытальнікаў «Жывая класіка» ўзялі ўдзел больш за 15 тысяч беларускіх школьнікаў.
Сёлета «Жывая класіка» напоўнілася дзіцячым шматгалоссем — прысвячэннем малой радзіме. Сярод вялікай колькасці твораў айчыннай літаратуры, прысвечаных тэме радзімазнаўства, юныя чытальнікі пры дапамозе педагогаў выбіралі самы шчыры і пранікнёны твор на іх погляд. З ім яны дэбютавалі ў школе, пасля трымалі выпрабаванне на раённым узроўні, перамагалі ў вобласці. І вось нарэшце 14 чэрвеня самыя ўмелыя выканаўцы — а гэта 30 юных чытальнікаў з розных куткоў краіны — былі запрошаны ў Нацыянальную бібліятэку Беларусі. Там адбыўся паўфінал конкурсу і сталі вядомыя імёны тых, хто возьме ўдзел у фінальнай частцы «Жывой класікі» падчас Дня беларускага пісьменства ў Іванаве. Такіх шчасліўчыкаў аказалася 12.
— Для таго каб выбраць любімы твор, неабходна добра ведаць літаратуру, — заўважае старшыня журы паўфіналу конкурсу, першы намеснік старшыні Саюза пісьменнікаў Беларусі Алена Стэльмах. — Удзел у «Жывой класіцы» сведчыць пра тое, што дзеці не толькі чытаюць, але і вобразна мысляць, падбіраючы той ці іншы твор для агучвання. Для журы асалода бачыць тое, як вучні, што спаборнічаюць у чатырох узроставых катэгорыях (ад першакласнікаў да выпускнікоў), таленавіта дэманструюць і свае тэатральныя здольнасці. Героі твораў класікаў і сучасных аўтараў ажываюць у вобразах юных чытальнікаў. У праватнасці, пераможца кожны, хто любіць роднае: мову, зямлю, Бацькаўшчыну.
За аснову конкурсных выступленняў узяты творы Я. Коласа, Я. Купалы, У. Караткевіча, А. Куляшова, М. Пазнякова, У. Ліпскага.
Варта нагадаць, што дэвіз конкурсу «Чытаем шмат, чытаем разам, ствараем сябе і краіну» самым лепшым чынам прываблівае школьнікаў да кнігі, заахвочвае да чытання, абуджае любоў да Радзімы.
Марыя ЛІПЕНЬ
Мерапрыемства праводзіцца на добраахвотнай аснове.
Не выявіць ні секунды абыякавасці.