Вы тут

Летні адпачынак можна правесці з ваенна-патрыятычным ухілам


Летні адпачынак можна правесці і з ваенна-патрыятычным ухілам. На 361-й базе аховы і абслугоўвання цэнтральных органаў ваеннага кіравання ўжо трэці год запар арганізавалі ваенна-патрыятычны профільны атрад.


«У атрадзе 17 вучняў з дзвюх школ Заводскага раёна сталіцы. У нас праходзіць адна змена сёлета з 2 да 26 чэрвеня. Для дзяцей мы арганізавалі заняткі па ўсіх ваенных дысцыплінах. Аднак для іх усё арганізавана ў гульнявой форме, каб лепш засвойвалі інфармацыю», — расказаў начальнік аддзялення ідэалагічнай работы 361-й базы аховы і абслугоўвання цэнтральных органаў ваеннага кіравання, капітан Юрый Трасцянка.

За адным з такіх заняткаў карэспандэнту «Звязды» ўдалося паназіраць асабіста. Яшчэ ўчарашнія сямі- і васьмікласнікі з усёй сур'ёзнасцю і ўдумлівасцю знаёміліся з індывідуальным стралковым узбраеннем. Інструктары расказвалі ім аб тактыка-тэхнічных характарыстыках, вучылі збіраць і разбіраць аўтамат Калашнікава, ладаваць магазіны патронамі. Дзеці прымяралі бронекамізэлькі і каскі.

Далей, нягледзячы на невялікі дождж, «вайскоўцы» мужна праходзілі паласу перашкод з інструктарам, які падказваў і дапамагаў ім. Не абмінулі і трэніроўку па навучанні асновам рукапашнага бою. Усё як у салдат. І гэта нягледзячы на тое, што сярод удзельнікаў атрада былі дзяўчынкі. Варта адзначыць, што некаторыя з іх збіралі аўтаматы хутчэй за юнакоў і добра сябе праявілі на паласе перашкод.

«Ёсць і шэраг культурных мерапрыемстваў: наведванне музея гісторыі Вялікай Айчыннай вайны, комплексу «Лінія Сталіна», музея зброі часці, дзе экспанаты можна трымаць у руках. У планах ёсць таксама экскурсіі ў Хатынь і на Курган Славы», — дадаў Юрый Трасцянка.

Адзін з удзельнікаў ваенна-патрыятычнага атрада Даніла Пятроў, вучань 124-й школы, у свой 15-ы дзень нараджэння вырашыў пачаць раніцу з заняткаў у атрадзе. Кажа, што без сяброў свята не тое, а яны не любяць прапускаць ваенна-патрыятычны лагер. Ды і сам юнак вельмі любіць гісторыю, а з прычыны таго, што зброя з'яўляецца яе неад'емнай часткай, вельмі ёй цікавіцца. Лішні раз папрактыкавацца ў разборцы аўтамата для яго ў радасць.

Кіраўнік профільнага ваенна-патрыятычнага атрада, выкладчык музыкі і сусветнай мастацкай культуры 124-й школы Мінска Галіна Казачок расказала, што сабраць групу было нескладана. «Толькі 10 чалавек трэба было набраць ад нашай школы, а ахвотных было ўдвая больш. Ішлі найлепшыя. У нас нават быў конкурс», — растлумачыла кіраўнік атрада. Таксама, па яе словах, у лагеры ў дзяцей практычна няма пропускаў, яны забываюць пра гаджэты. Часу на іх проста няма — заняткі выклікаюць у вучняў вялікую цікавасць.

Ілья КРЫЖЭВІЧ

Загаловак у газеце: Адпачынак асаблівага прызначэння

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.