Раналду абыграў і Марока

Раналду абыграў і Марока

Чэмпіёны Еўропы партугальцы ў групе В атрымалі першую перамогу на чэмпіянаце свету — з лікам 1:0 яны абыгралі каманду Марока. Гол у пачатку матча забіў, ну, зразумела ж, Крышціяну Раналду, і гэта быў яго 85-ы мяч за зборную. Потым еўрапейцы відавочна эканомілі сілы і не вельмі актыўнічалі ў жаданні забіць яшчэ, хоць у таго ж Раналду і яго калег былі шанцы. Мараканцы ж мелі некалькі магчымасцяў, але іх падводзілі то нежаданне дзяліцца мячом з партнёрамі, то грубасць, то выканальніцкае майстэрства. У выніку зборная Марока стала яшчэ адной камандай пасля Саудаўскай Аравіі, якой на чэмпіянаце засталося згуляць толькі адзін матч. А ў сеціве жартуюць, што з камандай Партугаліі змагацца можна, а вось з Раналду — не.

Гуляй, Расія!

Свята на вуліцы гаспадароў чэмпіянату свету даволі эфектна працягнулася — у другім матчы групавога турніру ў групе А ў аўторак увечары каманда Расіі з лікам 3:1 перамагла зборную Егіпта.

8:1 — такая розніца мячоў расіян за першыя гульні і дзве перамогі амаль забяспечылі гаспадарам турніру выхад у 1/8 фіналу. Перашкодзіць ім гэта зрабіць можа толькі каманда Саудаўскай Аравіі, калі атрымае перамогі над Уругваем і Егіптам, але такі варыянт хіба з вобласці фантастыкі. І балельшчыкі, і футбольныя спецыялісты з розных краін мяркуюць (і нават просяць прабачэння за негатыўныя каментарыі), што з камандай Расіі нешта здарылася, бо менавіта такой яскравай гульні ад яе ніхто не чакаў.

Тым не менш гэта толькі хоць і нечаканая, але цудоўная прычына для агульнай радасці для ўсіх расіян, што яны і робяць — гуляе амаль уся краіна, а не толькі гарады, дзе праходзяць матчы. Праўда, у 1/8 фіналу каманду Расіі будуць чакаць Партугалія або Іспанія, але пакуль на вуліцы гаспадароў чэмпіянату свету вялікае свята, якое яны сапраўды заслужылі сваёй гульнёй.

Іван КУПАРВАС