Вы тут

Дэлегацыя Беларусі ўдзельнічае ў мерапрыемствах Камітэта ААН па космасе


Мерапрыемствы, прысвечаныя пяцідзесяцігоддзю Сусветнай канферэнцыі ААН па даследаванні і выкарыстанні касмічнай прасторы ў мірных мэтах “ЮНІСПЕЙС +50” праходзяць у Вене. Для ўдзелу ў іх у сталіцу Аўстрыі прыехалі прадстаўнікі больш чым 60 краін свету.


Фота: crosti.ru

Кіраўнік дэлегацыі Рэспублікі Беларусь, намеснік Старшыні Прэзідыума НАН Беларусі акадэмік Сяргей Кілін выступіў на пасяджэнні сімпозіуму. “Сёння патрэбы Беларусі ў касмічных здымках з прасторавым дазволам 2 метры поўнасцю задаволены. Пры гэтым маецца свабодны рэсурс Беларускага касмічнага апарата, які мы маглі б прапанаваць спажыўцам з іншых краін. Патрэбы Беларусі ў тэлекамунікацыйных паслугах таксама цалкам забяспечаны”, — падкрэсліў Сяргей Кілін.

Ён запрасіў усе зацікаўленыя бакі выкарыстоўваць створаныя ў Беларусі магчымасці для рэалізацыі прарыўных інвестыцыйных праектаў у галіне даследавання і выкарыстання касмічнай прасторы ў мірных мэтах.

У сваім выступленні кіраўнік беларускай дэлегацыі звярнуў увагу на тое, што 9—15 верасня гэтага года Мінск будзе прымаць 31-ы Планетарны кангрэс Асацыяцыі ўдзельнікаў касмічных палётаў (ASE). У ім прымуць удзел больш як 100 касманаўтаў і астранаўтаў з усяго свету. Лозунгам кангрэсу абраныя яркія словы, сказаныя нашым земляком, касманаўтам Алегам Навіцкім падчас яго палёту на МКС: “Мы ствараем касмічную будучыню”.

Згодна з інфармацыяй Камітэта ААН па выкарыстанні касмічнай прасторы ў мірных мэтах, больш як 60 краін эксплуатуюць зараз уласныя касмічныя спадарожнікі. Гадавыя аб'ёмы выдаткаў на касманаўтыку з гадамі няўхільна ўзрастаюць. У 2015 годзе аб'ём сусветнай касмічнай эканомікі, што ўтвараецца камерцыйнымі і дзяржаўнымі прадпрыемствамі на нацыянальным, рэгіянальным і глабальным узроўнях, склаў 323 мільярда долараў ЗША. Па прычыне росту стратэгічнага значэння касманаўтыкі больш увагі стала надавацца прынцыпам кіравання сусветнай касмічнай дзейнасцю, яе бяспецы і ўстойлівасці.

Правядзенне ЮНІСПЕЙС + 50, як разлічваюць арганізатары, павінна спрыяць пашырэнню супрацоўніцтва дзяржаў па прыярытэтных кірунках. Сярод іх — глабальнае партнёрства ў галіне касмічных даследаванняў і інавацыйнай дзейнасці, актывізацыя абмену інфармацыяй аб аб'ектах і падзеях у космасе, пашырэнне касмічнага супрацоўніцтва ў інтарэсах сусветнай аховы здароўя і іншыя.

Надзея НІКАЛАЕВА

Выбар рэдакцыі

Спорт

Фігурыст Юрый Гуліцкі: Думаю, турнір у Мінску будзе класны

Фігурыст Юрый Гуліцкі: Думаю, турнір у Мінску будзе класны

У дваццатых чыслах студзеня ў Мінску ўпершыню пройдзе маштабны турнір па фігурным катанні.

Грамадства

Дзе шукаць рэчы, забытыя ў грамадскім транспарце

Дзе шукаць рэчы, забытыя ў грамадскім транспарце

​Кожны з нас хоць раз у жыцці адчуваў сябе «машкай-разявашкай».

Калейдаскоп

На «Песні года Беларусі» артысты прызнаваліся ў любові да родных мясцін

На «Песні года Беларусі» артысты прызнаваліся ў любові да родных мясцін

У мінулую пятніцу ў Мінску прайшоў заключны канцэрт «Песні года Беларусі».