Група дружбы «Францыя — Беларусь» адзначае 25-годдзе з дня заснавання

Актывізацыя інвестыцыйнага і рэгіянальнага супрацоўніцтва, павелічэнне тавараабароту з балансам экспарту і імпарту, узгадненне дзеянняў на міжнароднай арэне — гэтыя і іншыя пытанні абмяркоўвалі парламентарыі ў Савеце Рэспублікі на сустрэчы з групай дружбы Нацыянальнага сходу Францыі.

Узначальвае дэлегацыю з Пятай рэспублікі старшыня групы дружбы «Францыя — Беларусь» дэпутат парламента Крыстаф Лежэн. Ён адзначыў зацікаўленасць у сумесных праектах у галіне машынабудавання, сельскай гаспадаркі і анансаваў візіт у нашу краіну французскіх аграрыяў.

— Размова ішла пра галіну пераапрацоўкі малака, сумесныя праекты па далейшай рэалізацыі будаўніцтва заводаў, прадпрыемстваў пераапрацоўчай прамысловасці. Што датычыцца турызму, я прыбыў сюды разам са спадаром Крыстафам Бланшэ — гэта намеснік старшыні групы дружбы «Францыя — Беларусь». Ён таксама адказвае за турыстычную галіну ў Нацыянальнай асамблеі Францыі і ў яго акрузе Нармандыі. Мы хацелі б развіваць гэты напрамак, у тым ліку сельскагаспадарчы турызм. І нельга забываць аб адукацыйных і культурных праектах, — кажа Крыстаф Лежэн.

У юбілейны год на чарговы візіт французскіх калег ускладаюць асаблівыя надзеі. І зроблена ўжо шмат. Тавараабарот радуе станоўчай дынамікай — за студзень — май 2018-га яго аб'ём склаў 121 712 тысяч долараў (112 % у параўнанні з аналагічным перыядам мінулага года). У 2017-м у Беларусь з Францыі паступілі інвестыцыі ў памеры 4,7 млн долараў. Усяго ў нашай краіне працуюць 40 арганізацый з інвестыцыямі з Пятай рэспублікі.

— Сёння мы экспартуем тавараў і паслуг на суму каля 100 млн долараў, а на 200 млн долараў пакупаем па імпарце. Таму стаіць задача — у наступныя тры-чатыры гады сальда значна палепшыць. Мы часта сустракаемся з парламенцкімі дэлегацыямі. А што хацелася б пазітыўнае адзначыць па сённяшняй размове з парламентарыямі Францыі, — абмяркоўваліся канкрэтныя эканамічныя праекты не толькі гандлёвага, але і інвестыцыйнага супрацоўніцтва, — паведаміў старшыня Савета Рэспублікі Міхаіл Мясніковіч.

У чацвёртым квартале гэтага года ў Мінску зноў чакаюць дэпутатаў з Францыі. На сустрэчы будзе абмяркоўвацца і прымацца канкрэтнае рашэнне па распрацоўцы дарожнай карты супрацоўніцтва.

Марыя ДАДАЛКА