Летнія канікулы «Жывой класікі»

Рэспубліканскі конкурс юных чытальнікаў «Жывая класіка» стаў адным з самых папулярных у беларускіх школьнікаў і прываблівае ўсё большую колькасць удзельнікаў. Сёлета да мастацкага чытання любімых твораў айчыннай класікі далучыліся амаль 15 тысяч юных беларусаў. Гэта сведчыць пра цікавасць маладога пакалення да літаратуры і пацвярджае жаданне вывучаць лепшыя творы.

Вялікай падзеяй стаў паўфінал конкурсу, які, як вядома, прайшоў у сярэдзіне чэрвеня ў Нацыянальнай бібліятэцы Беларусі. І ў той дзень старонкі многіх кніг па-сапраўднаму ажылі: дзеці захапляльна прэзентавалі свае выступленні. Не толькі пранікнёна і шчыра дэкламавалі, але і тэатралізавана прадстаўлялі вобразы сваіх герояў. Многія выканаўцы прысвяцілі выступленні Году малой радзімы. Напрыклад, для Дар’і Ананіч пераможным стаў твор Г. Клішэвіч «За цябе мая вёска, малюся».

— Вельмі складана было вызначыцца з пераможцамі, — запэўнівае першы намеснік старшыні Саюза пісьменнікаў Беларусі Алена Стэльмах, старшыня журы паўфіналу конкурсу. — Заўважна, што ў Беларусі падрастае таленавітая моладзь. Як натуральна гучала з вуснаў чытальнікаў родная мова! І ў гэтым таксама важнасць конкурсу — далучаць дзяцей да нацыянальнай духоўнай спадчыны. Дзякуй за гэта бацькам, настаўнікам, якія дапамагаюць чытальнікам вызначыцца з творамі ў вялікім кніжным свеце.

Уражаныя пісьменнікі — лаўрэат Нацыянальнай прэміі Рэспублікі Беларусь Мікола Мятліцкі, лаўрэат Нацыянальнай літаратурнай прэміі Міхась Пазнякоў — адзначылі асобных выканаўцаў сваімі кнігамі. А ў выкананні паэта-песенніка Кастуся Цыбульскага прагучалі яго кранальныя песні пра Радзіму.

Конкурсны дзень у Нацыянальнай бібліятэцы быў насычаны. Сталі вядомы імёны пераможцаў паўфіналу, а самі яны трапілі ў эфір сталічнага тэлебачання — аднаго з сузаснавальнікаў конкурсу.

Варта нагадаць, што 12 лепшых чытальнікаў паедуць у сталіцу сёлетняга Дня беларускага пісьменства Іванава, каб там паказаць узоры свайго выканаўчага майстэрства. Але «Жывая класіка» не страчвае актуальнасці нават падчас школьных канікул! Па краіне крочыць традыцыйная акцыя «Лета з добрай кнігай», і юныя чытальнікі адчуваюць роднае беларускае слова.

Марыя ЛІПЕНЬ