У Ваўкавыску будуецца бальніца

Будаўніцтва сучасных карпусоў новай бальніцы амаль завершана, зараз вядзецца ўстаноўка абсталявання. У прыватнасці, манціруецца новы рэнтген-апарат.

Новыя карпусы з'явіліся непадалёк ад старой бальніцы ў Ваўкавыску. Існуючая ўстанова — не тыпавы медыцынскі аб'ект, а прыстасаваныя памяшканні. Некалі тут знаходзіўся пагранічны атрад, які атрымаў іншую прапіску, а ваенны гарадок аддалі пад лячэбны аб'ект. Але з цягам часу нагрузка на аддзяленні ўзрасла і прыспела неабходнасць будаўніцтва новай бальніцы, якая адпавядала б усім сучасным нормам. Такім чынам, пры садзейнічанні абласных улад было прынята рашэнне пабудаваць новы лячэбны корпус на 260 месцаў.

Як расказала галоўны ўрач Ваўкавыскай раённай бальніцы Алена ГРЫЦКЕВІЧ, новыя карпусы размеркаваны пад неўралагічнае, траўматалагічнае, хірургічнае, кардыялагічнае, тэрапеўтычнае і іншыя аддзяленні. На першым паверсе размесцяцца прыёмны пакой і дыягнастычныя кабінеты, на чацвёртым — аперацыйны блок з чатырма аперацыйнымі пакоямі.

Ваўкавыская раённая бальніца з'яўляецца рэсурсным цэнтрам для пацыентаў з вострым парушэннем мазгавога кровазвароту, тут праходзяць лячэнне і рэабілітацыю хворыя з пяці раёнаў вобласці. Вядуцца тэлекансультацыі з Гродзенскай абласной клінічнай бальніцай, а год таму наладжана камунікацыйная сувязь з рэспубліканскімі лячэбнымі ўстановамі. У адміністрацыі раённай бальніцы спадзяюцца, што новая ўстанова дазволіць затрымаць на рабочых месцах маладых спецыялістаў, якія прыязджаюць сюды па размеркаванні. Тут зацікаўлены ў маладых кадрах, ім аплачваецца арэнда жылля, тыя, хто застаецца, маюць шанцы атрымаць кватэры.