Вы тут

Як на аграсядзібе «У хутарской цішы» лечаць сном на вуллях


Незвычайную аздараўленчую методыку гаспадары сядзібы ў вёсцы Вішневічы Людміла і Васіль Паўлючыкі засвоілі зусім нядаўна. Падобны вопыт у Беларусі ўжо ёсць. Напрыклад, у Віцебску лячэнне біяполем пчол укаранілі ў абласным скурна-венералагічным дыспансеры. Лічыцца, што апітэрапія спрыяе станоўчаму абмену рэчываў арганізма, зніжае стрэсы, захворванні нервовай сістэмы, паляпшае сон.


Хутар каля вёскі Вішневічы можна назваць «пчаліным». З чатырох дамоў у трох ёсць пасекі. Праўда, дом, які Паўлючыкі вырашылі купіць, быў увесь у бур'яне, затое спрыяльныя ўмовы для пчол — зацішша, вецер не гуляе, шмат ценю ад высокіх ліп-меданосаў.

— Мы разглядалі шмат варыянтаў, бо прапаноў на рынку «сялянскай нерухомасці» нямала, — заўважае Людміла Якаўлеўна, — але спыніліся на гэтым варыянце, каб стварыць для пчол усе ўмовы.

Такую філасофію Паўлючыкі засвоілі ад вядомага на Ваўкавышчыне пчаляра Анатоля Жылінскага. Менавіта ён дапамог навічкам-пчалярам заняцца гэтай справай. У выніку — вясковы закінуты дом атрымаў другое жыццё, тут створана прыгожая аграсядзіба. Але галоўнае — ёсць магчымасць атрымаць незвычайную, але, кажуць, вельмі карысную, працэдуру.

На драўлянай платформе стаіць каля двух дзясяткаў пчаліных вулляў, па ўсім відаць, тут практыкуюць перавозныя пасекі. А вось невялічкі домік у глыбіні саду — стацыянарны. Здаецца, што гэта звычайны летнік, але на самай справе, тут — «лячэбніца». Каб падысці да яе, трэба прыняць меры засцярогі, таму гаспадыня раздае ўсім спецыяльныя маскі з доўгай сеткай. Адразу ўсе становяцца падобныя на сапраўдных пчаляроў. Цяпер можна зайсці ўсярэдзіну доміка. Тут невялікі пакойчык з двума тапчанамі і столікам. Аказваецца, тапчаны ўстаноўлены на вуллях, усяго іх чатыры, па два на кожны тапчан. Пчолы сюды не заляцяць, бо ляткі для іх знаходзяцца на вуліцы, затое яны сваім гулам і вібрацыяй вельмі спрыяльна дзейнічаюць на біяполе чалавека.

— Гэта фізіяпрацэдура пчоламі, — тлумачыць Людміла Якаўлеўна. — мы ляжым на двух вуллях, дзе жыве да 200 тысяч пчол, атрымліваем мікрамасаж, здымаем стомленасць, нармалізуем паступова бронхалёгачную сістэму. Вібрацыя пчол поўнасцю супадае з вібрацыяй клетак чалавека, што дазваляе яму хутчэй прыйсці ў норму пасля стрэсавых сітуацый.

Гаспадыня частуе мёдам і мятнай гарбатай. Звяртае ўвагу на мёд у сотах. Ён самы карысны, бо ў ім акрамя самога мёду, ёсць пылок і пярга. Воск можна жаваць замест жуйкі, ён умацоўвае дзясны. У гаспадарцы нямала прылад для пчалярства. Напрыклад, у сянях стаіць медагонка — круглая металічная бочка, дзе пры дапамозе цэнтрабежнай сілы мёд аддзяляецца ад сотаў і выцякае цераз кран. Людміла расказала, што яны не змешваюць розныя гатункі мёду, а выкачваюць іх паасобку, нават у невялікіх аб'ёмах. Вельмі важна, каб мёд паспеў. Аб гэтым сведчыць плёнка на сотах (забрус). Пчолы зацягваюць соты, калі мёд спелы і без вільгаці.

— Вось бачыце, гэтыя соты з забрусам, значыць, мёд спелы, — паказвае рамку з сотамі Людміла, — каб гэтага дасягнуць, трэба больш часу. Некаторыя пчаляры не чакаюць, пакуль пчолы зацягнуць соты, забіраюць яго раней. У выніку з-за вільгаці мёд альбо слаіцца, альбо кісне і доўга не захоўваецца.

Дарэчы, пчолы сушаць мёд сваімі крыламі, ад чаго і ствараецца вібрацыя ў вуллях. Такім чынам, яны робяць сваю справу і «лечаць» людзей. Аздараўленчы кантакт паказаны амаль пры 20 захворваннях — ад бяссонніцы да лішняй вагі. Хоць ёсць і супрацьпаказанні, напрыклад, алергія, анкалогія, вострыя інфекцыйныя захворванні і іншыя.

Тых, хто жадае атрымаць незвычайныя працэдуры, з кожным годам усё больш, адзначае Людміла Паўлючык. Прыязджаюць цэлымі сем'ямі. Адна гадзіна «сну на вуллях» тут каштуе пяць рублёў. Для ўзнаўлення ўсяго арганізма рэкамендуецца прайсці 5—10 сеансаў, але кажуць, што і 20 працэдур не зашкодзіць.

Загаловак у газеце: Пчолы супраць стрэсу

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».