Арганізатары нацыянальнага адбору на міжнародны дзіцячы конкурс песні «Еўрабачанне-2018» атрымалі ад ахвотных ужо каля 40 заявак (па стане на раніцу 29 чэрвеня). Аднак, як расказалі «Звяздзе» ў Белтэлерадыёкампаніі, традыцыйна большасць прэтэндэнтаў адпраўляе свае бандэролі ў апошнія дні прыёму, таму гэта лічба не канчатковая.
«Сярод анкет, якія мы ўжо атрымалі, ёсць як сольныя выканаўцы, так і калектывы, прычым многія ўдзельнікі спрабуюць свае сілы не першы раз, — зазначае кіраўнік прэс-службы медыяхолдынга Святлана Смалонская-Краскоўская. — Акрамя заявак, шэраг выканаўцаў і іх прадстаўнікоў звяртаецца па кансультацыі наконт тых ці іншых пунктаў конкурснага палажэння, і мы бачым, што актыўнасць патэнцыйных удзельнікаў даволі высокая, — разлічваем, што канчатковая колькасць заявак будзе не меншай, чым у папярэднія гады». Прыкладам, у 2017 і 2016 гадах да праслухоўвання былі дапушчаны па 45 удзельнікаў, у 2015-м — 41 артыст.
Жывое праслухоўванне сёлетніх кандыдатаў пройдзе ў самай вялікай студыі БТРК ужо 6 ліпеня. Па яго выніках прафесійнае журы вызначыць ад 7 да 10 удзельнікаў, якія працягнуць барацьбу за права прадставіць нашу краіну на дзіцячым «Еўрабачанні» і ў верасні выступяць у фінальным гала-канцэрце. Пераможца ж адбору будзе вызначаны сумесна ў ходзе галасавання журы і гледачоў.
Нагадаем, гаспадыняй дзіцячага «Еўрабачання-2018» другі раз выступіць Беларусь — міжнародны конкурс пройдзе 25 лістапада ў «Мінск-Арэне».
Вікторыя ЦЕЛЯШУК
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».