На пачатку тыдня ў беларускіх турыстаў былі сур'ёзныя складанасці з вылетам з Кіева. Былі адменены рэйсы ў Туніс, Шарм-эль-Шэйх, Алікантэ, Люблін, Тырану, затрымліваліся вылеты ў Анталію і Батумі. Справа датычылася авіякампаній BravoAіrways і AndaAіr. Як растлумачылі ў першай з іх, рэйсы давялося адмяніць, бо тураператар OASІS на працягу двух гадоў не выконваў перад ёй свае фінансавыя абавязкі і меў запазычанасць у 950 тысяч долараў.
Беларусам, якія трапілі ў гэту непрыемную сітуацыю, аказваюць садзейнічанне. А тым, хто толькі збіраецца ў адпачынак, Міністэрства спорту і турызму дае парады, як засцерагчыся ад падобных інцыдэнтаў.
Уважліва чытайце дагавор. Дагавор аказання турыстычных паслуг складаецца ў адпаведнасці з устаноўленай заканадаўствам тыпавой формай. Для іншых відаў паслуг тыпавая форма не прадугледжана.
Незалежна ад таго, набываеце вы пуцёўку ці заказваеце толькі браніраванне, кансультаванне, візавую падтрымку,
дагавор на гэта трэба заключыць у пісьмовай форме. Выключэнне — выпадкі, звязаныя з перавозкай ці размяшчэннем, дзе пацвярджэннем дагавора лічацца білеты або дакументы на засяленне (ваўчар, напрыклад). Але калі паслугі перавозкі і размяшчэння набываюцца ў комплексе з іншымі, то абавязкова патрэбна заключэнне дагавора з наступнай выдачай дакументаў для перавозкі і пражывання.
Перш чым ставіць свой подпіс, праверце наяўнасць наступных раздзелаў: кошт паслуг, тэрмін і парадак іх аплаты, правы і абавязкі бакоў, звесткі аб выканаўцы, заказчыку і трэціх асобах, для якіх набываюцца паслугі, праграма падарожжа. Аплата праводзіцца так, як прапісана ў дагаворы, яе факт павінен пацвярджацца касавым чэкам ці іншым плацежным дакументам. Яго абавязаны вам выдаць: гэта прадугледжвае закон «Аб абароне правоў спажыўцоў».
Калі фірма дапамагае вам аформіць візу, яна мусіць пракансультаваць вас, як правільна запаўняць дакументы, і папярэдзіць пра прычыны, з-за якіх могуць адмовіць адкрыць візу.
Арыгіналы дакументаў, неабходных для аказання турпаслуг, а таксама валюту для аплаты збору пры аказанні візавай падтрымкі перадаюць па акце аб прыёме-перадачы дакументаў, які складаецца ў двух экзэмплярах. Адзін кампанія пакідае сабе, другі аддае вам.
Перад зваротам у турфірму варта азнаёміцца з інфармацыяй пра яе ў адкрытых крыніцах: перш-наперш, ці існуе такая кампанія ўвогуле? Звесткі можна атрымаць на афіцыйным сайце Адзінага дзяржаўнага рэгістра юрыдычных асоб і індывідуальных прадпрымальнікаў www.egr.gov.by. Не лішнім будзе праверыць звесткі пра фірму ў рэестры суб'ектаў турыстычнай дзейнасці, які вядзе дэпартамент па турызме міністэрства, — http://mst.by/ru/tourіsts-belarus-ru/ Гэту інфармацыю можна таксама атрымаць, патэлефанаваўшы ў дэпартамент па нумары 8 017 327 23 25. На пытанні адкажа галоўны юрысконсульт аддзела маркетынгу і якасці турыстычных паслуг Аляксандр Крэчатаў.
Наталля ЛУБНЕЎСКАЯ
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
