Вы тут

Якую ўнікальную дапамогу можна атрымаць у цэнтры сацыяльнага абслугоўвання


Васямнаццаць гадоў таму, адразу пасля адкрыцця, дзяржаўная ўстанова «Тэрытарыяльны цэнтр сацыяльнага абслугоўвання насельніцтва Маскоўскага раёна г. Мінска» складалася ўсяго з аднаго аддзялення, якое каардынавала дзейнасць сацыяльных работнікаў дома. Зараз жа цэнтр аказвае найшырэйшы спектр паслуг і істотна падтрымлівае ўсе тыя катэгорыі грамадзян, якім патрэбна асаблівая ўвага. Толькі за першы квартал 2018 года тэрытарыяльны цэнтр аказаў больш за 40 тысяч паслуг.


Ад­дзя­лен­не дзён­на­га зна­хо­джан­ня.

Так, як адзначыла дырэктар цэнтра Інеса ЖЫБУЛЬ, з верасня мінулага года на базе цэнтра дзейнічае паслуга дзённага знаходжання маладых людзей з цяжкімі і множнымі парушэннямі. Новаўвядзенне вырашае адразу дзве глабальныя задачы. Па-першае, у маладых людзей, якім цяжка самастойна перасоўвацца і абслугоўваць сябе, з'явілася магчымасць выйсці з замкнёнай прасторы дома або кватэры, паглыбіцца ў соцыум і атрымліваць комплекс сацыяльна-рэабілітацыйных паслуг. Па-другое, іх бацькі, якія раней былі прывязаныя да дзяцей не толькі эмацыянальна, але і фізічна, зараз могуць уладкавацца на працу ў дзённы час. Тым больш, відавочна, што такі фармат баўлення часу ідзе маладым людзям толькі на карысць — памяшканне, дзе яны знаходзяцца, аснашчана самым сучасным рэабілітацыйным абсталяваннем. З падапечнымі цэнтра працуюць не толькі спецыялісты па сацыяльнай рабоце, але і дэфектолагі, псіхолагі, эргатэрапеўты, якія дапамагаюць маладым людзям сацыялізавацца і паступова развіваць іх лепшыя здольнасці.

— Наконт гэтага ў нас ёсць вельмі натхняльны прыклад. У групу дзённага знаходжання трапіла дзяўчына, якая перасоўвалася толькі ў спецыяльных тэхнічных сродках са старонняй дапамогай. Але, бачачы вялікі патэнцыял, спецыялісты падчас заняткаў навучылі яе хадзіць самастойна. Цяпер дзяўчына можа не толькі перасоўвацца сама, але і дапамагаць іншым, — расказвае намеснік дырэктара цэнтра Таісія ЗЕНАВА.

Зараз аддзяленне наведвае васямнаццаць чалавек узростам ад 16 да 40 гадоў, у найбліжэйшы час група павінна папоўніцца яшчэ пяццю новымі наведвальнікамі.

Вялікую ўвагу супрацоўнікі цэнтра ўдзяляюць тэме процідзеяння хатняму гвалту. Дзейнічае мабільная гарачая лінія для пацярпелых, таксама сацыяльныя работнікі, якія часта бываюць у сем'ях, праходзяць спецыяльнае навучанне ў дасведчаных кваліфікаваных трэнераў на тэмы таго, як распазнаць хатні гвалт, як мець зносіны з пацярпелымі і куды іх накіроўваць па дадатковую дапамогу. Трохі памяняўся і ракурс успрымання праблемы. Усё часцей гаворыцца пра тое, што гвалт можа быць не толькі фізічным, але і псіхалагічным ці эканамічным, калі цалкам пазбаўляюць грашовых сродкаў або нават выганяюць з дому. Акрамя таго, значныя намаганні прыкладаюцца, каб прадухіляць хатні гвалт у дачыненні да пажылых людзей.

Сту­дыя «Па­літ­ра».

Дарэчы, на базе цэнтра запушчаны сумесны праект з Беларускім інстытутам правазнаўства «Юрыдычная клініка». Тыя, хто мае патрэбу, могуць атрымліваць бясплатна дапамогу выкладчыкаў і студэнтаў старшых курсаў, прычым не проста кансультацыйную, а паўнавартасныя паслугі адваката. Прыёмы прыходзяць два разы на тыдзень. Супрацоўнічае тэрытарыяльны цэнтр і з БДПУ імя М. Танка: тут адкрыты філіял кафедры сацыяльнай работы. Апроч таго, што студэнты атрымліваюць практычны вопыт, яны яшчэ і праводзяць каштоўную даследчую працу: супрацоўнікі цэнтра могуць прапаноўваць ім найбольш актуальныя тэмы для курсавых і дыпломных работ.

Добра вядомы па ўсёй Беларусі і нават за мяжой Тэрытарыяльны цэнтр сацыяльнага абслугоўвання насельніцтва Маскоўскага раёна г. Мінска дзякуючы такім праектам, як студыя «Палітра», дзе людзі з ментальнай інваліднасцю займаюцца мастацкай творчасцю, тэатр «Сонечныя дзеці», у якім займаюцца маладыя людзі з сіндромам Даўна. Вялікай папулярнасцю карыстаецца і «Лятучы клуб мам», арганізаваны па прыкладзе партнёраў з Польшчы. Гэта прастора, дзе сустракаюцца мамы, якія знаходзяцца ў адпачынку па доглядзе дзіцяці, альбо мамы, якія выхоўваюць дзяцей з інваліднасцю. Яны ўдзельнічаюць у майстар-класах па жаночым лідарстве, прадпрымальніцтве, хэнд-мэйдзе ды і проста гутараць аб сваіх надзённых перажываннях, каб не замыкацца ў сабе і адчуваць падтрымку блізкіх па духу людзей.

Дар'я КАСКО

Загаловак у газеце: Месца, дзе заўсёды зразумеюць і падтрымаюць...

Дадаць каментар

Выбар рэдакцыі

Культура

Хто ёсць хто на дзіцячым «Еўрабачанні»

Хто ёсць хто на дзіцячым «Еўрабачанні»

Ужо ў гэту нядзелю вырашыцца інтрыга

Грамадства

Вучоба можа быць у радасць, калі размаўляць з вучнем на адной мове

Вучоба можа быць у радасць, калі размаўляць з вучнем на адной мове

Уявіце сабе сітуацыю: вучань зрабіў у дыктоўцы 20 памылак... 

Эканоміка

Горадабудаўнічы пашпарт распрацуюць з улікам магчымых аб'ектаў будаўніцтва

Горадабудаўнічы пашпарт распрацуюць з улікам магчымых аб'ектаў будаўніцтва

Пра гэта гаворыцца ў новай рэдакцыі палажэння аб парадку падрыхтоўкі і выдачы дазвольнай дакументацыі на будаўніцтва аб'ектаў, зацверджанаг