Вы тут

Самыя высокія заробкі на Гомельшчыне — у Рэчыцкім раёне


У Рэчыцкім раёне апошнім часам рэалізаваны шэраг інвестыцыйных праектаў, якія значна ўплываюць на развіццё Гомельскай вобласці ў цэлым. Напрыклад, у агракамбінаце «Холмеч» пабудавана малочнатаварная ферма на 1000 галоў. У КСУП «Дзяржынскі-агра» завяршаецца будаўніцтва фермы на 600 галоў дойнага статка. ААТ «Рэчыцадрэў» працягвае мадэрнізацыю вытворчасці ДСП. Тут завершана будаўніцтва завода смол, які мае стратэгічнае значэнне для прадпрыемства. РУП «ВА «Беларуснафта» рэалізаваны ў поўным аб'ёме інвестыцыйны праект па будаўніцтве самай магутнай у Рэспубліцы Беларусь фотаэлектрычнай станцыі. Рэчыцкім райжылкамгасам завершаны работы па будаўніцтве новай кацельні ў гарадскім пасёлку Зарэчча. Летась у эканоміку раёна інвеставана каля 285 мільёнаў рублёў. Пры гэтым, адзначае старшыня Рэчыцкага раённага выканаўчага камітэта Віталь Панчанка, унёсак раёна ў аб'ём інвестыцый Гомельскай вобласці вельмі істотны — каля 10 %.


Фота БелТА.

— Па большасці прагнозных паказчыкаў мы ідзём з адчувальнай станоўчай дынамікай і сёлета. Асаблівая ўвага ўдзяляецца развіццю прамысловага комплексу, дзе фарміруецца больш як 60 % выручкі ад рэалізацыі тавараў, работ, паслуг. Між тым летась тэмп росту прамысловай прадукцыі склаў 124 %. Валаўтваральныя прадпрыемствы ААТ «Речыцадрэў» і ААТ «Рэчыцкі метызны завод» паказваюць высокія тэмпы аб'ёмаў вытворчасці прадукцыі, што станоўча адбіваецца на эканоміцы рэгіёна ў цэлым. На тэрыторыі раёна паспяхова працуюць прадпрыемствы, створаныя з удзелам капіталу Аўстрыі, Кіпра, Расіі, Германіі і іншых краін. Летась у раён паступіла каля $2,8 млн прамых замежных інвестыцый на чыстай аснове.

— Відаць, усё гэта разам спрыяе і стварэнню працоўных месцаў у Рэчыцы?

— На зноў створаныя працоўныя месцы за кошт з'яўлення новых прадпрыемстваў і вытворчасцяў летась было працаўладкавана 425 чалавек, за кошт пашырэння дзейнасці існуючых — 345. За першы квартал сёлета — 106 чалавек. Дарэчы, у Рэчыцкім раёне самыя высокія заробкі на Гомельшчыне. Сярэдні паказчык за чатыры месяцы года складае амаль 936 рублёў.

Рэчыцкі раён экспартуе ў 36 краін свету больш за 48 % прадукцыі, якая тут вырабляецца. Важнае значэнне для экспарту раёна мае вынік дзейнасці метызнага завода. Яго доля складае каля 83 %. Шмат работ у Расіі выконваюць супрацоўнікі ААТ «Буравая кампанія «Дэльта».

Малое прадпрымальніцтва ў Рэчыцкім раёне актыўна спрыяе фарміраванню канкурэнтнага асяроддзя, росту вытворчасці спажывецкіх тавараў, развіццю сферы паслуг, стварэнню новых працоўных месцаў. Цяпер у нас зарэгістравана 2242 суб'екты малога і сярэдняга бізнесу. У гэтай сферы занята каля 16 % насельніцтва раёна. Ад недзяржаўнага сектара ў бюджэт раёна толькі летась мы атрымалі больш 20 млн рублёў, ці звыш 20 % ад агульнай сумы паступленняў.

Фота БелТА.

— І ўсё ж, асноўнай галіной эканомікі раёна была і застаецца сельская гаспадарка...

— Прагнозны паказчык па тэмпе росту вытворчасці валавой прадукцыі аграпрамысловы комплекс раёна сёлета забяспечыў на 108,2 % пры прагнозе 106,2 %. За студзень — красавік у сельскагаспадарчых арганізацыях Рэчыцкага раёна ў разліку на аднаго работніка памер выручкі склаў 12,1 тыс. рублёў. Гэта на 30,8 % вышэй за ўзровень 2017 года. Увогуле ж, сёлета, як і раней, будзем забяспечваць ўстойлівае развіццё тэрыторыі і павышэнне ўзроўню жыцця насельніцтва. Каб гэта адбывалася, трэба павышаць эфектыўнасць дзейнасці прадпрыемстваў: скарачаць выдаткі вытворчасці пры адначасовым павелічэнні аб'ёмаў выпуску. Важна імкнуцца да росту рэнтабельнасці продажаў, а таксама агульнай прыбытковасці прадпрыемстваў.

  • Рэчыцкі раён — адзін з самых буйных у Гомельскай вобласці. Яго плошча — каля 2700 квадратных кіламетраў. Насельніцтва складае звыш 98 тысяч чалавек.
  • Горад Рэчыца заснаваны на месцы селішча племені дрыгавічоў на гандлёвым шляху з «варагаў у грэкі». Першы раз згадваецца ў Гусцінскім летапісе пад 1213 годам.
  • Сапраўднай вялікай падзеяй для Рэчыцы і раёна стала адкрыццё ў 1964 годзе Рэчыцкага радовішча нафты. На тэрыторыі Палескай упадзіны адкрыта 61 радовішча нафты.

Фота БелТА.

  • У Рэчыцкім раёне — 82 установы адукацыі. Па выніках 2017—2018 навучальнага года атэстаты асобага ўзору з узнагароджаннем залатым і сярэбраным медалём атрымалі 32 навучэнцы.
  • У 2018 годзе спартсменам раёна прысвоена: 2 званні майстра спорту Рэспублікі Беларусь, 3 званні кандыдатаў у майстры спорту Беларусі, 26 спартсменаў раёна ўключаны ў нацыянальныя каманды Рэспублікі Беларусь.
  • У Рэчыцкім раёне — 80 устаноў культуры. Сёлета выхаванцы школ мастацтваў сталі пераможцамі і прызёрамі 56 конкурсаў і фестываляў музычнага і выяўленчага мастацтва, заваявалі больш за 300 узнагарод.

Славутасці Рэчыцкага раёна

Успенскі сабор

Будаўніцтва гэтага сабора пачалося ў 1841 годзе і толькі ў 1864-м зноў аднавілася. У 1872 годзе ён быў дабудаваны і асвячоны. У 1934 годзе сабор закрылі, а яшчэ праз некалькі гадоў ператварылі ў «Дом сацыялістычнай культуры». Сабор застаўся без купалаў, яго інтэр'ер быў цалкам зменены, да храма прыбудавалі драўляны будынак. У 60-я гады памяшканне стала безгаспадарным. Толькі ў 1999 годзе сабор вярнулі вернікам. Цяпер Успенскаму сабору прысвоены статус гісторыка-культурнай каштоўнасці Беларусі. Ён ганарыцца сваім іканастасам, які пяціярусны, уключае дваццаць чатыры абразы. У 2011 годзе ў храме з'явіліся два ківоты ў гонар святога Мікалая і Казанскай Божай Маці.

Троіцкі касцёл

Сёння ён уяўляе яркі прыклад неагатычнай архітэктуры пачатку ХХ стагоддзя. Упершыню каталіцкі касцёл у Рэчыцы быў пабудаваны ў 1634 годзе. Храм упрыгожваў горад да 1756 года, калі быў пабудаваны новы драўляны Троіцкі касцёл і манастыр пры ім. У 1842 годзе рэчыцкія дваране падалі просьбу пра будаўніцтва новага — мураванага — касцёла на тым жа месцы. Але будаўніцтва было завершана толькі ў 1903 годзе.

Троіцкі сабор ведаў розныя часы. У гады савецкай улады будынак выкарыстоўваўся ў якасці склада, электрастанцыі, піўной, вітаміннага бара. У 1998 годзе касцёл прызналі помнікам архітэктуры ХХ стагоддзя і ўключылі ў Дзяржаўны спіс гісторыка-культурных каштоўнасцяў Рэспублікі Беларусь. У 1999 годзе яго вярнулі вернікам. Цяпер касцёл з'яўляецца адным з упрыгожанняў горада.

 Іры­на АСТАШ­КЕ­ВІЧ

Загаловак у газеце: Узровень жыцця насельніцтва — асноўны клопат

Выбар рэдакцыі

Грамадства

Асноўная задача — захаваць біялагічную сям'ю

Асноўная задача — захаваць біялагічную сям'ю

«Звязда» звярнулася па каментарыі аб рэалізацыі Дэкрэта Прэзідэнта № 18 да старшынь профільных камісій абедзвюх палат Нацыянальнага сходу Беларусі.

Грамадства

Аповед жанчыны, якая здолела вярнуць дачку з сацыяльнага прытулку

Аповед жанчыны, якая здолела вярнуць дачку з сацыяльнага прытулку

Жанчыну, якая здолела не толькі вярнуць дзіця з прытулку, але і далей выхоўвае яго, знайсці аказалася не проста. 

Грамадства

Чаму зараз варта далей трымацца ад вадаёмаў?

Чаму зараз варта далей трымацца ад вадаёмаў?

Люты больш нагадвае пазачарговы вясновы месяц.

Грамадства

Якую літаратуру здаюць у букіністычныя крамы?

Якую літаратуру здаюць у букіністычныя крамы?

Калі звычайныя кнігарні працуюць па формуле «кніга — чалавек», то букіністычныя трымаюцца на прынцыпе «людзі — кнігі — людзі».