Вы тут

У БДУ падала дакументы абітурыентка з агульнай сумай балаў 400!


У прыёмнай камісіі Беларускага дзяржаўнага ўніверсітэта поўным ходам ідзе падача абітурыентамі дакументаў. У першы дзень яе работы сюды завітаў ужо 1121 чалавек, сярод іх 50 пераможцаў рэспубліканскіх і міжнародных алімпіяд і 2 лаўрэаты Спецыяльнага фонду Прэзідэнта Рэспублікі Беларусь па падтрымцы таленавітай  моладзі.


Першымі афіцыйна аформіць намер стаць студэнтам прыходзяць маладыя людзі з вельмі высокімі баламі, якія не сумняваюцца ў сваіх шанцах. Так, напрыканцы першага дня абітурыенты, якія маюць у суме больш як 391 бал, падалі дакументы на факультэт міжнародных адносін (ФМА), факультэт прыкладной матэматыкі і інфарматыкі і юрыдычны факультэт. Традыцыйна лідыруе па колькасці ўладальнікаў максімальных вынікаў факультэт міжнародных адносін, якому належаць леташнія рэкорды па прахадных балах: 384 балы -- на спецыяльнасцях "міжнароднае права" і "міжнародныя адносіны" і 381 -- на  спецыяльнасці "лінгвакраіназнаўства".

І вось новы абсалютны рэкорд ФМА: выпускніца пінскай гімназіі № 3 Анастасія ЖАЎНЕРЫК, якая падала сюды свае дакументы, мае ў суме 400 балаў! ЦТ па англійскай мове і грамадазнаўстве  дзяўчына здала на сто балаў. Плюс у яе залаты медаль і дыплом рэспубліканскай алімпіяды па беларускай мове. 

Між іншым, адказны сакратар прыёмнай камісіі Вячаслаў МАЛАФЕЕЎ лічыць, што прахадныя балы застануцца на ўзроўні мінулага года: "Рост прахадных балаў летась быў звязаны з пэўнымі карэкціроўкамі, што ўносіліся ў заданні цэнтралізаванага тэсціравання. Паводле ацэнак многіх выкладчыкаў, якія працуюць у сістэме даўніверсітэцкай падрыхтоўкі і былі задзейнічаны ў перыяд правядзення рэпетыцыйнага тэсціравання, узровень складанасці заданняў гэтага года не адрозніваецца ад леташніх заданняў, таму мы мяркуем, што асноўныя паказчыкі цэнтралізаванага тэсціравання будуць супастаўныя з вынікамі ЦТ 2017 года. Адпаведна, прахадныя балы сёлета не павінны істотна змяніцца".

У маладых людзей, якія збіраюцца паступаць у Белдзяржуніверсітэт, ёсць магчымасць загадзя запоўніць і раздрукаваць заяву і электронную анкету, а таксама загрузіць сваю фатаграфію. Выкарыстанне асабістага кабінета скарачае час падачы і прыёму дакументаў. Абітурыент наўпрост звяртаецца ў сакратарыят прыёмнай камісіі абранага факультэта з гатовым пакетам, абыходзячы папярэднія этапых афармлення дакументаў

Да таго ж абітурыент, які стварыў на сайце БДУ асабісты кабінет, на працягу прыёмнай кампаніі ў анлайн-рэжыме можа адсочваць на сваім камп'ютары, планшэце або смартфоне інфармацыю аб бягучым прахадным бале на абраную спецыяльнасць.  Акрамя таго, уладальнікам асабістага кабінета прадастаўляецца свабодны і бясплатны доступ да інфармацыйных рэсурсаў прыёмнай камісіі і факультэтаў БДУ -- на тэрыторыі ўніверсітэцкага гарадка БДУ даступная бесправадная Wi-Fi-сетка ABIT.

Усяго БДУ плануе прыняць на навучанне сёлета 5142 чалавекі, у тым ліку 2 122 --  на дзённую бюджэтную форму навучання і 226 -- на завочную бюджэтную форму. На скарочаны тэрмін атрымання адукацыі для выпускнікоў устаноў сярэдняй спецыяльнай адукацыі выдзелена 404 месцы, з іх на дзённую форму - 46 і 358 - на завочную.

Да 17 ліпеня з выбарам спецыяльнасці павінны вызначыцца ўсе абітурыенты, якія прэтэндуюць на бюджэтныя месцы, а таксама абітурыенты, якія паступаюць на платную форму навучання на спецыяльнасці, дзе прадугледжаны ўступныя іспыты. 17 ліпеня ў 18 гадзін дзверы прыёмнай камісіі зачыняцца.

А з 18 ліпеня распачынаюцца ўступныя выпрабаванні, якія праводзяцца непасрэдна ва ўстановах адукацыі. Маюцца на ўвазе экзамены па творчасці, фізічнай культуры, а таксама экзамены для абітурыентаў, якія паступаюць на аснове сярэдняй спецыяльнай адукацыі на скарочаныя тэрміны навучання. Уступныя іспыты арганізаваныя толькі ў адну сесію: як для асоб, што паступаюць за кошт сродкаў бюджэту, так і на платнай аснове, вось чаму і першым, і другім трэба падаць свае дакументы да 17 ліпеня.

Надзея НІКАЛАЕВА

Фота Ганны ЗАНКАВІЧ

Выбар рэдакцыі

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».

Грамадства

Як працуюць сапёры?

Як працуюць сапёры?

Больш за ўсё «сюрпрызаў» з часоў Вялікай Айчыннай вайны было знойдзена ў Докшыцкім, Талачынскім, Асіповіцкім і Лагойскім раёнах.