22 Верасень, субота

Вы тут

«Цікавая і самабытная толькі нацыянальная культура»


Лаўрэаты прэміі Саюзнай дзяржавы ў галіне літаратуры і мастацтва назаўтра пасля ўручэння высокіх узнагарод сустрэліся з журналістамі.


— Як вы ставіцеся да сучаснай творчай моладзі, чым яна радуе, а чым, магчыма, засмучае і якія захады варта яшчэ зрабіць, каб дазволіць самарэалізавацца таленавітым маладым людзям? — запыталася «Звязда» ў лаўрэатаў.

— На мой погляд, трэба даць магчымасць моладзі часцей чуць добрую музыку, у тым ліку класічную, каб выхоўваць густ, — лічыць дырыжор Валерый Палянскі. — Тым больш што такая патрэба, безумоўна, ёсць, мяркуючы па тым, колькі маладой публікі я бачу на розных канцэртах: оперных, камерных, сімфанічнай музыкі.

— Сённяшняя моладзь, канешне, зусім іншая, чым трыццаць гадоў таму. Я магу сказаць па сваім сыне, якому 23, — у яго зусім іншыя інтарэсы, у тым ліку музычныя. Штосьці з гэтых песень падабаецца і мне, а штосьці я катэгарычна не прымаю, — дзеліцца кампазітар Алег Іваноў. — Асабліва тое, што часта даводзіцца бачыць, — другаснасць, прыпадабненне да чужых стыляў, напрыклад да амерыканскіх субкультур. Таму мая парада маладым творцам — падбіраць для сваіх песень словы простыя, блізкія і зразумелыя слухачам, адштурхоўвацца ад добрай мелодыі. А яна, у сваю чаргу, — я ўпэўнены ў гэтым, — мусіць грунтавацца на народнай традыцыі. Цікавая і самабытная толькі нацыянальная культура і нацыянальная мова — руская, беларуская, украінская, армянская — тая, у якой ты жывеш.

— Я падтрымаю калег у тым плане, што найперш у моладзі трэба развіваць добры густ, а для гэтага не абмяжоўвацца адной толькі папулярнай музыкай, шмат глядзець і слухаць, параўноўваць, — дадае балетмайстар Валянцін Елізар'еў. — На жаль, часта даводзіцца бачыць, у тым ліку і на сцэне «Славянскага базару», такія выступленні, якія, на мой погляд, не дацягваюць па мастацкім узроўні да міжнароднага фэсту. І каб была мая воля, я іх скараціў бы ўдвая ці нават больш. Гэта не значыць, што я супраць творчых эксперыментаў: у нас хапае таленавітай моладзі, якая шукае і прапаноўвае нешта новае. Аднак пэўную мастацкую планку трэба трымаць.

Вікторыя ЦЕЛЯШУК

Фота БЕЛТА

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.