Вы тут

Cа сцэны Летняга амфітэатра гучалі розныя мовы свету


14 і 15 ліпеня са сцэны Летняга амфітэатра гучалі розныя мовы свету — удзельнікі ХХVІІ конкурсу выканаўцаў эстраднай песні стараліся пераўзысці адно аднаго ў выкананні «Славянскага хіта» (песня славянскіх аўтараў) і «Фестывальнага хіта» (сусветна вядомыя шлягеры), а таксама прызнаваліся ў любові да Беларусі і ў прыватнасці да віцебскай публікі.


Фота БЕЛТА

Артысты стараліся ўразіць і публіку, і журы. Адны выконвалі хіты савецкага часу, другія нечакана запісалі ў славянскія аўтары Віктара Цоя і Канстанціна Меладзэ, трэція арыентаваліся на сучасную музычную моду. Беларус Яўген Курчыч замахнуўся ні многа ні мала, як на «Крык птушкі» Уладзіміра Мулявіна — і, як абяцаў, за адведзеныя па рэгламенце чатыры хвіліны здолеў раскрыць і драматычны змест, і нерв, і прыгажосць уласнага голасу. Наогул, публіка падтрымлівала апладысментамі кожны нумар і прымала да сэрца міні-гісторыі, якія расказвалі пра ўдзельнікаў нязменныя вядучыя конкурсу Кацярына Раецкая і Дзяніс Дудзінскі. Жанчыны ў зале ледзь стрымлівалі слёзы і жадалі абавязковай удачы і літоўцу Гражвідасу, які марыць перамагчы праблемы са зрокам і калі-небудзь навучыцца вадзіць машыну, і малдаваніну Саміру Логінаву, які прысвяціў конкурсную песню «Абдымі» маме — яна некалькі месяцаў таму ляжала ў коме... З цеплынёй прынялі гледачы грузінку Тамрыко, чый строгі тата доўгі час не верыў у дачку і лічыў яе захапленне музыкай пустой справай — а пасля выступлення дачкі на ўвесь голас прызнаў, што памыляўся, і блаславіў на далейшы творчы шлях. Але журы ў гэты вечар не было асабліва шчодрым на ацэнкі: у лідары выйшлі прадстаўнікі Беларусі, Польшчы і Казахстана, якія атрымалі па 77 балаў.

У другі конкурсны дзень музычны калейдаскоп закруціўся з яшчэ большай сілай: удзельнікі з Беларусі і Італіі з галавой нырнулі ў рок, выканаўшы хіты Аеrоsmіth і Quееn, расіянка Аляксандра Карабешкіна, наадварот, прымерыла вобраз поп-ідала Брытні Спірс з яе «Оорs! І dіd іt аgаіn». Канкурсанты з Латвіі і Літвы перанеслі на сцэну «Славянскага базару» рытмы «Еўрабачання». Кубінка Рэбека Эмбель праспявала на іспанскай не менш страсны, чым у Глорыі Гейнар, маніфест «Я буду жыць!». Дарэчы, нягледзячы на адносна невысокія балы журы, дзяўчына дакладна ўвойдзе ў гісторыю конкурсу як уладальніца аднаго з самых яркіх сцэнічных вобразаў: у абодва конкурсныя дні спявачка выступала ў адмысловых галаўных уборах, нібыта пазычаных на бразільскім карнавале.

Марчэл Рошка з Румыніі стаў першым, хто набраў максімальныя 80 балаў. Следам усе «дзясяткі» паставіла міжнароднае журы Міле Ніціч з Украіны — хіт «Jе suіs mаlаdе» («Я хворая»), які многія любяць і памятаюць па выкананні Даліды і Лары Фабіян, артыстка не тое што праспявала, а пражыла на сцэне. Але асноўным сапернікам для румынскага спевака стала не яна, а прадстаўнік Казахстана Амрэ. За пранізлівую «Я сплю на ружах» з французскага мюзікла «Моцарт. Рок-опера» ён атрымаў 79 балаў — усяго аднаго (!) не хапіла да максімуму і перамогі. У выніку ў артыстаў з Казахстана і Румыніі аднолькавая сума балаў — па 156. Крыху менш — 154 — набрала ўкраінская спявачка, па 151 бале ў прадстаўніка Беларусі Яўгена Курчыча і Сільвіі з Польшчы. А значыць, інтрыга захоўваецца! Вырашылася яна толькі сёння на ўрачыстым канцэрце закрыцця фестывалю мастацтваў «Славянскі базар у Віцебску», калі былі ўручаныя ўсе ўзнагароды конкурсу.

Але на момант здачы нумара ў друк вынікі яшчэ былі невядомыя, і члены міжнароднага журы ў кулуарах гаварылі пра складаны выбар. «У сёлетніх канкурсантаў, можа, і не максімальны выканальніцкі ўзровень, але дакладна вельмі высокі. Мяне асабіста радуе, што многія спяваюць сэрцам — гэта самае важнае ў размове са слухачом», — зазначыў знакаміты італьянскі спявак Раберціна Ларэці.

Вікторыя ЦЕЛЯШУК

Загаловак у газеце: Інтрыга да апошняй ноты

Выбар рэдакцыі

Грамадства

Успаміны былой вязніцы пра Саласпілскі лагер смерці

Успаміны былой вязніцы пра Саласпілскі лагер смерці

Яна добра памятае той летні дзень. За акном сталі чутныя роў матацыклаў і нямецкая гаворка.

Грамадства

Першыя беларускія Соdе Сlub далучыліся да сусветнага руху

Першыя беларускія Соdе Сlub далучыліся да сусветнага руху

Як з дапамогай кода стварыць уласную анімацыю і «ажывіць» касмічны карабель? 

Грамадства

Як Віцебшчына развівае стасункі з Кітаем

Як Віцебшчына развівае стасункі з Кітаем

Наш карэспандэнт пастараўся згадаць самыя цікавыя прыклады сумеснай рэалізацыі праектаў.

Спорт

Анастасія Мірончык-Іванова: «Веру ў сябе і ў свае сілы»

Анастасія Мірончык-Іванова: «Веру ў сябе і ў свае сілы»

У спорце ёй двойчы прыходзілася пачынаць усё спачатку.