Вы тут

Юныя пчаляры ў Францыі


У пачатку ліпеня ў акрузе Нерак (Францыя) адбылася IX Міжнародная сустрэча маладых пчаляроў IMYB-2018. Гэта зямля слаўная тым, што яна ўваходзіць у зону, спрыяльную для пчалярства. Тут разам з каралевай Марго жыў некалі пэўны час Генрых Наварскі – будучы кароль Францыі Генрых IV Вялікі. Недалёка ад гэтага месца нарадзіўся прэзідэнт Францыі Арман Фальер (кіраваў краінай з 1906 па 1913 гг.). Сельскагаспадарчы ліцэй, які носіць яго імя, стаў цэнтрам Міжнароднай сустрэчы маладых пчаляроў.

Удзельнікамі IMYB-2018 былі 27 краін. У ліку пачаткоўцаў выступілі Грузія, Мальта, Паўночная Ірландыя, Фінляндыя, Эстонія. Беларусы прадстаўлялі сваю краіну на гэтым форуме ўжо ў пяты раз. У склад каманды ўвайшлі школьнікі з Полацка Аляксандр Скараходаў і Данііл Вохменцаў. Яны не аднойчы паспяхова ўдзельнічалі ў рэспубліканскіх і міжнародных спаборніцтвах. Упершыню быў у камандзе малодшы брат Аляксандра – дванаццацігадовы Міхаіл. Дапамагаючы бацьку, Андрэю Уладзіміравічу Скараходаву, на пчальніку і на занятках з юнымі пчалярамі, якія ён праводзіў, браты самі імкнуліся больш даведацца пра гэтую справу. І, вядома, палюбілі пчалярства.

Сёлетняя сустрэча – гэта каманднае і асабістае спаборніцтва па выкананні 13 заданняў. Гэта магчымасць паказаць, як добра ўдзельнікі ведаюць анатомію пчол і тэарэтычныя пытанні пчалярства, адрозніваюць карысныя для гэтых насякомых расліны, вызначаюць віды мёду і распазнаюць небяспечных для пчол насякомых і кляшчоў. Трэба таксама, каб юныя пчаляры ўмелі карыстацца адпаведным інструментарыем, правільна маглі збіць рамкі, скласці мнагакорпусны вулей, расставіць рамкі ў пчаліным гняздзе, рабіць адводкі, віраваць мёд і інш. Для суправаджаючых дарослых праводзіліся лекцыі і абмеркаванне пытанняў, якія тычацца пчалярства і працы з дзецьмі. А яшчэ ў кожнай каманды была магчымасць у вольнай форме расказаць пра сваю краіну. Пазнаёміць замежных калег з нашай радзімай дапамог у гэтым годзе відэаролік Юрыя Вялітчанкі «My mysterious Belarus» («Мая таямнічая Беларусь»).

Гісторыя удзелу беларусаў у Міжнародных сустрэчах маладых пчаляроў даволі паспяховая. На спаборніцтвах у Чэхіі ў 2016 годзе ў складзе міжнародных каманд прадстаўнікі з нашай краіны былі адзначаны першым, а ў Вялікабрытаніі ў 2017 годзе – першым і другім месцамі. На гэты раз, на жаль, у тройку лідараў члены беларускай каманды не ўвайшлі. Але і апошнімі па ведах і навыках нашы дзеці, вядома ж, не былі. У складзе міжнародных каманд хлопцы занялі восьмае, дзявятае і трынаццатае месца. Агульнакаманднае месца на гэты раз было дзясятым.

Але ўсё ж асноўнае ў гэтых сустрэчах – не спаборніцтва дзеля спаборніцтва. Мэта міжнародных сустрэч маладых пчаляроў – таксама і прапаганда пчалярства, прыцягненне ўвагі сусветнай грамадскасці да яго праблем, а самае важнае – далучэнне моладзі да гэтай справы. А яшчэ – навучанне калектыўнаму вырашэнню задач. Таму, у адрозненне ад першых міжнародных сустрэч, спаборнічаюць паміж сабой не толькі каманды пэўных краін, але і каманды, складзеныя з прадстаўнікоў розных дзяржаў, якія, да ўсяго, гавораць на розных мовах.

***

Добрым словам успамінаем арганізатараў IMYB-2018 у Францыі, дзякуючы якім гэтая сустрэча прайшла як свята, у атмасферы добразычлівасці і ўзаемаразумення. Мы ўдзячныя таксама Іржы і Надзі Піза, чэшскім калегам, якія прапанавалі калісьці Саюзу беларускіх пчаляроў пачаць сістэмную працу з моладдзю і ўдзел у міжнародным праекце.

У ходзе мерапрыемства адбылося некалькі афіцыйных сустрэч з прадстаўнікамі ўлады на ўзроўні дэпартаменту і рэгіёну. Бо міжнародная сустрэча рыхтавалася і праходзіла не толькі пад патранажам Міністэрства сельскай гаспадаркі, але і пры яго непасрэднай падтрымцы. Кіраўнікі добра разумеюць, што 30-40% ураджаю, не лічачы іншых выгодаў, людзі маюць дзякуючы пчолам. Таму і дапамога пчалярам на дзяржаўным узроўні ўспрымаецца як належнае.

На жаль, мы не можам пахваліцца падобным стаўленнем беларускіх уладаў да пчалярства. Некаторыя нашы кіраўнікі ведаюць пра ролю пчол у прыродзе, разумеюць важнасць іх для чалавека і наваколля. Але асноўная частка уладаў, як і насельніцтва ў цэлым, бачаць каштоўнасць гэтых насякомых толькі ў мёдзе. Яны нават не разумеюць, што колькасць гэтага прадукту, атрыманага ў краіне, паказвае, перш за ўсё, на грандыёзную працу, якую зрабілі пчолы. Дзякуючы ёй захоўваецца навакольны свет, і мы ўсе маем магчымасць жыць у гэтым свеце.

Падрыхтоўка і сам удзел беларускай каманды ў гэтым міжнародным форуме знайшлі падтрымку толькі ў нешматлікіх кіраўнікоў арганізацый, пчаляроў, людзей, якія вітаюць занятак дзяцей пчалярствам і разумеюць важнасць удзелу маладых пчаляроў у падобных праектах. Саюз беларускіх пчаляроў выказвае падзяку ТАА «Данейро», КФГ «Пчаляр Полаччыны», асацыяцыі «Пчала і мёд», ТАА «Краіка», пчалярам Л.М. Кузьменка, Н.Л. Кучко, В.А. Барташэвічу, Васіленку А.А. і іншым. Мы таксама дзякуем БРУСП «Белдзяржстрах» за дапамогу ў камплектацыі сувеніраў. Асаблівая ўдзячнасць – заснавальніку дабрачыннага фонду «Вяртанне» Паўлу Падкарытову за матэрыяльную дапамогу на апошнім этапе падрыхтоўкі да паездкі.

Дзякуем таксама юным пчалярам, якія ўдзельнічалі ў конкурсе, і ўсім, хто аказаў падтрымку дзіцячаму пчалярству, выдаткаваўшы сілы і асабісты час. Хочацца асабліва выдзеліць працу каардынатара маладзёжнага пчалярства А.В. Скараходава.

***

Юбілейная X Міжнародная сустрэча маладых пчаляроў будзе праходзіць у наступным годзе ў Славакіі. Ці прыме ўдзел у ёй беларуская каманда, залежыць ад многіх фактараў. Важна працягваць працу ўжо дзеючых і ініцыяваць стварэнне новых школ, гурткоў, лекторыяў і іншых цэнтраў зносін з будучымі пчалярамі. Унутраныя конкурсы дапамогуць выявіць лепшых дзяцей для ўдзелу ў рэспубліканскім і міжнародным конкурсах. Але, вядома, патрэбна матэрыяльная падтрымка і ўдзел у гэтым працэсе як грамадскіх арганізацый і фізічных асоб, так і дзяржаўных структур.

Многія аспекты, у тым ліку і пытанні лепшай, дзякуючы пчалярству, адаптацыі ў грамадстве выхаванцаў дзіцячых дамоў-інтэрнатаў, разгледжаны ў падрыхтаваным Саюзам беларускіх пчаляроў Палажэнні аб маладзёжным пчалярстве. Хацелася б, каб усе, каму неабыякавы лёс Беларусі, зразумелі, што яе будучыня цесна звязана таксама і з развіццём пчалярства. Дзякуючы ўдзелу ў ім энергічных, моцных, з добрымі прафесійнымі ведамі і навыкамі, здольных генерыраваць новыя ідэі маладых людзей.

Сяргей МЫЦЬКО

Выбар рэдакцыі

Эканоміка

Падрыхтаваны праект новага ўказа аб аднаўляльных крыніцах энергіі

Падрыхтаваны праект новага ўказа аб аднаўляльных крыніцах энергіі

Так званая «зялёная» энергетыка ў апошнія гады развіваецца ў нашай краіне хуткімі тэмпамі.

Палітыка

Уладзімір Макей: Прыярытэту «эканамічнай дыпламатыі» патрабуе час

Уладзімір Макей: Прыярытэту «эканамічнай дыпламатыі» патрабуе час

Гэтымi днямi дыпламатычная служба Беларусi адзначае векавы юбiлей. 

Культура

Стары замак у Гродне пачалі ўпрыгожваць скульптурна-мастацкімі элементамі

Стары замак у Гродне пачалі ўпрыгожваць скульптурна-мастацкімі элементамі

У хуткім часе на ўязной арцы з'явіцца барэльеф анёла з крыламі.

Грамадства

Быць у трэндзе. На які ўрок вучні пабягуць з радасцю?

Быць у трэндзе. На які ўрок вучні пабягуць з радасцю?

Вучыць пакаленне Z — задача няпростая.