Вы тут

У Гомелі спрабавалі спагнаць грошы за бясплатныя электралічыльнікі


Кожны сумленны грамадзянін ведае, што за паслугі, якія яму аказваюць, трэба плаціць. Часта мы робім гэта аўтаматычна. Дарэчы, высвятляецца, дарма. Бо іншым разам з нас спрабуюць спагнаць грошы за тое, за што мы плаціць не абавязаны. Менавіта ў такую сітуацыю трапілі жыхары дома № 22 па вуліцы Цімафеенкі ў Гомелі.


Пры правядзенні капітальнага рамонту ў іх доме людзей папрасілі заплаціць за ўсталяванне новых сучасных лічыльнікаў электраэнергіі. Грамадзяне засумняваліся, што такое патрабаванне адпавядае закону. Тым больш, высветлілася, што ў аналагічных выпадках такія ж лічыльнікі ставілі бясплатна. Жыхары ўрэшце адмовіліся плаціць па 118 рублёў за замену прыбораў уліку электраэнергіі. Іх можна зразумець, бо аддаваць такія грошы з кожнай кватэры — занадта многа.

Сярод сваякоў жыхароў дома знайшоўся кампетэнтны чалавек, які і растлумачыў астатнім, што можна пазмагацца за свае правы з дапамогай скаргаў. Людзі сабраліся і адправілі калектыўны зварот у адрас КЖРЭУП «Чыгуначнае» і яшчэ некалькі інстанцый. Гэта і прынесла плён.

Высветлілася, што камунальнікі, на якіх «наязджалі» жыхары, знаходзіліся ў сітуацыі, калі, з аднаго боку, павінны былі выконваць прад'яўленыя ім тэхнічныя ўмовы і ўсталёўваць агульнае абсталяванне для аўтаматызаванай сістэмы кантролю і ўліку энергаспажывання за свой кошт. З другога — у бюджэце капрамонту дома на гэта не былі прадугледжаны сродкі.

Каб разруліць праблему, былі праведзены сумесныя нарады з адпаведнымі спецыялістамі Гомельскага гарвыканкама і РУП «Гомельэнерга».

Больш падрабязна нюансы справы растумачыў намеснік генеральнага дырэктара дзяржаўнага аб'яднання «Жыллёва-камунальная гаспадарка Гомельскай вобласці» Алег СПІРЫДОНАЎ:

— Пры распрацоўцы праектна-каштарыснай дакументацыі на капітальны рамонт гэтага дома былі атрыманы тэхнічныя ўмовы РУП «Гомельэнерга» на ўсталяванне ў гэтым доме сістэмы АСКУЭ (аўтаматызаванай сістэмы кантролю і ўліку энергаспажывання). Такім чынам, па гэтых тэхнічных умовах індукцыйныя індывідуальныя прыборы для ўліку электрычнай энергіі патрабавалася замяніць на электронныя. Грамадзяне некалькі разоў праводзілі агульныя сходы і адмовіліся ўсталёўваць за свой кошт новыя электронныя прыборы. Справа ў тым, што лічыльнікі АСКУЭ зніжаюць страты толькі РУП «Гомельэнерга»: пры іх усталяванні спецыялістам арганізацыі не трэба хадзіць і знімаць паказчыкі — уся інфармацыя відаць на камп'ютары. Грамадзянам і КЖРЭУП «Чыгуначнае» такія лічыльнікі без патрэбы. Дарэчы, пры правядзенні капітальнага рамонту не прадугледжана выдзяленне сродкаў для ўсталявання новых электралічыльнікаў АСКУЭ.

Аднак у тэхнічных умовах, выдадзеных РУП «Гомельэнерга», значылася: агульнае абсталяванне — за кошт сродкаў капрамонту, а прыборы індывідуальнага ўліку — за кошт грамадзян. Людзей такі варыянт заканамерна не задаволіў. Да таго ж высветлілася, што лічыльнікі ў гэтым доме прайшлі паверку ў 2015 годзе. Паколькі паверачны інтэрвал складае восем гадоў, яны могуць яшчэ некалькі гадоў выкарыстоўвацца. Кіраўніцтву РУП «Гомельэнерга» мы накіравалі адпаведны ліст, атрыманы з Гомельскага аблвыканкама. У ім змяшчаецца парада пры правядзенні капітальнага рамонту не выдаваць такія тэхнічныя ўмовы і патрабаванні пра замену лічыльнікаў, якія нядаўна прайшлі паверку. На сённяшні дзень прынята рашэнне аб змяненнях у праектна-каштарысную дакументацыю па электралічыльніках сістэмы АСКУЭ, а РУП «Гомельэнерга» апламбуе існуючыя ў грамадзян індукцыйныя індывідуальныя прыборы і прыме іх на свой улік.

Ірына АСТАШКЕВІЧ

Выбар рэдакцыі

Культура

Як у Чавускім раёне праводзіліся святыя вечары

Як у Чавускім раёне праводзіліся святыя вечары

Традыцыя варажыць на нарачонага прыйшла з язычніцкіх часоў.

Грамадства

Мастацкі кіраўнік «Песняроў» пра радасці і складанасці сямейнага жыцця

Мастацкі кіраўнік «Песняроў» пра радасці і складанасці сямейнага жыцця

«Я лічу, што мужчына можа заводзіць сям'ю, калі ў яго ўжо ёсць сваё жыллё або выразная перспектыва, калі яно з'явіцца».

Грамадства

Небяспечныя гульні. На што трэба звярнуць увагу бацькам падлеткаў

Небяспечныя гульні. На што трэба звярнуць увагу бацькам падлеткаў

Днямі суд Першамайскага раёна Мінска абвясціў прысуд удзельнікам вечарынкі, падчас якой 19-гадовая дзяўчына загінула ад ужывання псіхатропу

Эканоміка

Падрыхтаваны праект новага ўказа аб аднаўляльных крыніцах энергіі

Падрыхтаваны праект новага ўказа аб аднаўляльных крыніцах энергіі

Так званая «зялёная» энергетыка ў апошнія гады развіваецца ў нашай краіне хуткімі тэмпамі.