Вы тут

165-годдзе пажарнай службы Беларусі адзначылі ў Мінску


25 ліпеня 1853 года Мінскае губернскае праўленне і гарадская дума прынялі эпахальнае рашэнне – стварыць першую пажарную часць. У яе склад увайшоў 51 брандмайстар. З цягам часу пажарная справа эвалюцыянавала – ад бочкі на калёсах, якая кіравалася канём, да сучасных цыстэрнаў умяшчальнасцю ў 10-11 тон, верталётаў, катараў… Гэты дзень пасля і стаў святам у прафесійных пажарных.


А ў суботу, напярэдадні Дня пажарнай службы, у Мінску прайшоў вельмі прыгожы парад. За конным разлікам, званок якога не адно дзесяцігоддзе прымушаў жыхароў хвалявацца – дзе што загарэлася? – ішлі аўтамабілі савецкай вытворчасці, якія сталічныя ратаўнікі захавалі і аднавілі. Больш за тое – вярнулі ім афарбоўку ў адпаведнасці з тагачаснымі дзяржаўнымі стандартамі. І калі брычку і “ЗіСы” шмат хто бачыў толькі на вельмі даўніх чорна-белых фота і нямых кінастужках, то ярка-чырвоныя “ЗіЛы” нагадалі шмат каму часы дзяцінства.

Некаторыя аўтамабілі ратаўнікі паказалі публіцы ўпершыню. “Разыначкай” стала гідраўлічная аўталесвіца з вышынёй пад’ёму ў 30 метраў, зробленая яшчэ… у 60-я гады, калі акцэнты будаўніцтва жылых шматпавярховых дамоў у Мінску толькі павярнуліся ў бок класічных цяпер 9-павярховак.

Яшчэ больш маштабная праграма разгарнулася ў парку Горкага. Водная феерыя, ратаванне чалавека са Свіслачы з дапамогай верталёта, дэсант парашутыстаў, святочны салют… І за ўсім гэтым назіралі тысячы гледачоў. Шмат хто з іх прыйшоў на свята разам з дзецьмі. Яны з вялікай ахвотай лазілі па пажарных аўтамабілях, атрымлівалі налепкі, глядзелі верталёты, часалі за вухам сабак-лабрадораў, мерылі пажарную форму і нават каталіся на машыне-перавёртышы!

- Вялікую ўвагу развіццю службы МНС надзяляе кіраўнік дзяржавы. Нашы ратаўнікі гатовы сёння выконваць любыя пастаўленыя перад імі задачы, - падкрэсліў міністр па надзвычайных сітуацыях Уладзімір Вашчанка. – Для гэтага створаны два дзясяткі разнастайных службаў. Але наша аснова – гэта пажарная служба. А сённяшняе свята – гэта даніна памяці тым людзям, якія 165 год таму спрычыніліся да першага кроку ў пажарнай справе. Менавіта тады былі закладзены традыцыі, якія мы шануем і па сёння.

Таму калі вы не трапілі на сёлетні парад ратаўнікоў – абавязкова пастарайцеся завітаць на наступны!

Валяр’ян ШКЛЕННІК

Фота Сяргея НІКАНОВІЧА

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».