Вы тут

Сяброў вітае Гервачай


Беларусы з латышскага горада Ліепая пабывалі на Купаллі, якое традыцыйна ладзіць штогод Беларуская суполка “Крыніца” з літоўскай Клайпеды.


Беларускае Купалле – гэта свет прыгожых людзей

Купалле — гэта ў беларусаў заўсёды супольнае свята. Яно дае магчымасць кожнаму з нас адчуць сябе жывою часцінкаю грамады, свайго народа. І нават усяго Сусвету. І ў тым пераканаліся мы, пабываўшы на Купаллі ў сяброў. Свята ўжо 14‑ы раз ладзіла Беларуская суполка “Крыніца” з літоўскай Клайпеды. Праходзіла ж яно на гэты раз у ноч з 23 на 24 чэрвеня ў паселішчы Шарнай (Клайпедскі раён), у жывапіснай сядзібе Гервайчай на беразе рэчкі Мінія.

Сядзіба Гервачай — удалая пляцоўка для масавага свята

Пачалося Купалле 23 чэрвеня ў 18 гадзін — з канцэрту. З беларускімі песнямі выступілі ансамблі з Клайпеды: “Купалінка”, што дзейнічае пры суполцы “Крыніца”, ды ансамбль- трыа “Лад”. Далучылі свае галасы ў святочную дзею й госці: ансамбль беларускай песні з Ліепаі “Паўлінка”, спявак з літоўскага Вісагінаса Сяргей Шабадалаў (у якога, дарэчы, родавыя карані з Браслаўшчыны, з Відзаў). Самымі ж далёкімі, але ж вельмі блізкімі ўсім па духу гасцямі на тым Купаллі былі артысты з беларускага горада Ліды і раёна: фальклорны гурт “Гудскі гарамонік”, якім кіруе Андрэй Калышка, і артысткі з Тэатра мініяцюр “Балагур” Святлана Шмукста і Ганна Булай. Святкавалі Купалле разам з намі й прадстаўнікі беларускай суполкі з расійскага Калінінграда.

Кіраўніца гурта “Паўлінка” Жанна Буйніцкая, пабачыўшы “Гудскі гарамонік”, была ў захапленні. Вось бы запрасіць, казала, яго ў Ліепаю! Тады б можна было й і гараджан парадаваць, і нечаму павучыцца ў калег. Мы даведаліся, што самабытнаму гурту з Ліды ўжо 30 гадоў, ён шмат гастралюе па Польшчы, Літве, быў лаўрэатам і дыпламантам многіх конкурсаў рознага ўзроўню, у тым ліку й міжнародных. Акрамя беларускіх і польскіх народных песень, якія мы пачулі, вельмі ўразіла ўсіх, як віртуозна граюць артысты з Ліды на сваіх інструментах: а гэта гармонік, баян, цымбалы, скрыпкі, барабаны, дудка- сапрана, жалейка, дуда. Былі яшчэ ў іх, падказалі нам, і тамбурын, трашчоткі ды скрыпічны кантрабас.

Сяброўкі за Купальскім сталом

Пад час канцэрту гучалі словы падзякі арганізатарам, удзельнікам свята. Выказваючы падзяку й падносячы беларускія сувеніры гурту “Паўлінка”, старшыня суполкі “Крыніца” Мікалай Логвін адзначыў актыўнасць ліепайскіх сяброў, нагадаў пра цеснае супрацоўніцтва з гуртом, якое доўжыцца шмат гадоў. Артысты ж “Паўлінкі” былі аднымі з першых гасцей на тым першым Купаллі, што ўзяліся праводзіць актывісты “Крыніцы”. Дарэчы, адметныя беларускія сувеніры выйгравалі й гледачы, у тым ліку ліепайчане, калі ўдзельнічалі ў Купальскіх конкурсах і гульнях.

Прыгожае вогнішча – адзін з яркіх сімвалаў Купалля

Пасля канцэрта Мікалай Логвін, які разам з сябрамі й ладзіў свята, запрасіў усіх артыстаў за агульны стол на святочную Купальскую вячэру. Там госці з Беларусі, Латвіі, Літвы, Расіі змаглі бліжэй пазнаёміцца. А крыху пазней свята прадоўжылася. Ярка палала Купальскае вогнішча. Былі карагоды вакол яго, танцы, гульні, песні. Сцэнар гэтай часткі Купалля быў падрыхтаваны з улікам народных традыцый. Таму на Купаллі мы шукалі чароўную Папараць- кветку, кідалі ў ваду Купальскія вянкі, скакалі праз вогнішча.

Анжэла Фаміна, г. Ліепая

Фота аўтара


Ад рэдакцыі

Пра літоўскія гастролі напісалі на сваім сайце ў нэце таксама й артысты гурта “Гудскі гармонік”. З тэкста “Купальскае свята з сябрамі ў Клайпедзе” можна даведацца, што шанцуе артыстам- удзельнікам народнага ансамбля народнай музыкі “Гудскі гармонік” у апошнія гады: “Не кожны ж мае шчасце адзначаць такое вясёлае й па-сапраўднаму любімае ўсімі свята Купалле двойчы на год. А мы — маем! І ўсё таму, што ў суседняй Літве і ў нашай Беларусі гэты народны фэст праводзіцца ў розныя даты. Вось і сёлета 23 чэрвеня ў Клайпедзе мясцовая беларуская суполка “Крыніца” зладзіла літоўскае Купалле на беларускі лад. І ўжо другі раз па запрашэнні кіраўніка беларускай дыяспары Мікалая Логвіна завітаў у госці на свята гурт “Гудскі гармонік”. Далей прыводзяцца словы спадара Мікалая пра тое, што Купалле пад Клайпедай стала ўжо традыцыйным і любімым не толькі сярод мясцовых жыхароў, але й гасцей з іншых рэгіёнаў Літвы, суседніх краін. Таму й цяпер у сядзібе Гервайчай было вельмі шматлюдна й весела.

Лідчане заўважаюць: нягледзячы на сталае месца правядзення, кожнае Купалле ў Клайпедзе — адметнае. Ім падалося, што на гэты раз Купальскае свята для ўсіх удзельнікаў прайшло пад знакам асаблівай цеплыні, сяброўства — і неймавернай асалоды ад сустрэч адначасова з далёкімі ды такімі блізкімі па духу людзьмі. На гэты раз “Гудскі гармонік” закрываў канцэрт. У выступленні гурта былі й новыя беларускія народныя песні — з юбілейнай праграмы, што абкаталася перад тым у Лідзе. Як і летась, паміж песнямі гурта да слёз весяліў гледачоў народным сакавітым гумарам Тэатр мініяцюр “Балагур” з Ганчарскага дома культуры Лідскага раёна.

З цеплынёй згадваюць у Лідзе традыцыйныя забавы, абрады Купалля: і пусканне вянкоў на ваду, і скачкі праз велізарнае вогнішча ў надзеі ачысціць душу й цела, а таксама незабыўныя пошукі Папараць- кветкі. А гукі беларускіх песень і мелодый, пішуць лідчане, аж да глыбокай ночы разносіліся над Мініяй у розныя бакі.

Спадзяемся, што, як і планавалася, актывісты суполкі “Крыніца” завіталі ўжо й на беларускае Купалле ў Ліду, што цёплыя сустрэчы сяброў прадоўжыліся. Вось так хораша, гарманічна Купалле збліжае людзей, якія паважаюць і творча прадаўжаюць традыцыі продкаў.

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».