19 хлопцаў з Маскоўскага раёна Мінска на 9 дзён перабраліся ў 56-ы асобны полк сувязі ВПС і войскаў ППА. Увесь гэты час яны начуюць у казармах, а камандуюць імі сяржанты тэрміновай службы і афіцэры.
— Мы хочам навучыць юнакоў дзеянням ва ўмовах будучай ваеннай службы, — заўважае намеснік начальніка палявога вузла сувязі па ідэалагічнай рабоце маёр Сяргей Паўлаў. — Рыхтаваць маральна і фізічна да гэтага іх лепш за ўсё ужо цяпер. Ім ужо ад 14 да 16 гадоў. Будучыя прызыўнікі! Ды і на занятках па дапрызыўнай падрыхтоўцы ім будзе лягчэй.
Праграма для школьнікаў вельмі насычаная. Непасрэдна на тэрыторыі часці яны вывучаюць агульнавайсковыя дысцыпліны: займаюцца страявой, агнявой, тактычнай і інжынернай падрыхтоўкай. Але і культурны складнік таксама вялікі — спланаваны экскурсіі, паходы па месцах баявой славы...
Таксама мы падрыхтуем нашых выхаванцаў да ваеннай эстафеты. Яна ўключае ў сябе дзесяць пунктаў, на якіх прадстаўлены разнастайныя элементы ваеннай справы. Сярод іх — настройка радыёстанцыі, пошук няспраўных катушак, размініраванне ўчастка, разборка-зборка зброі, снараждэнне магазіна, аказанне першай дапамогі, уменне паставіць палатку на некалькі чалавек... Адным словам, усё, што спатрэбіцца ім у будучыні ў войску.
Сярод сяржантаў, якія камандуюць хлопцамі, — толькі максімальна падрыхтаваныя. Двое з іх працавалі з новым папаўненнем і таму атрымалі вялікую практыку ў зносінах з людзьмі, якія да гэтага не мелі дачынення да вайсковай справы.
— Спачатку была ідэя арганізаваць такі лагер для навучэнцаў, якія стаяць на ўліку ў інспекцыі па справах непаўналетніх, — гаворыць намеснік дырэктара па выхаваўчай рабоце сярэдняй школы № 170 горада Мінска Святлана Жогал. — Каб дапамагчы ім арганізаваць сябе, сфарміраваць новыя рысы характару. Але з часам мы сталі набіраць не толькі такіх юнакоў, але і іншых хлопцаў, якія хочуць вызначыцца з прафесіяй, неяк сябе арганізаваць і дысцыплінаваць.
Анвару Хаджаеву споўнілася 16 гадоў. У ваенна-патрыятычным лагеры ён упершыню.
— Да гэтага я нёс вахту на Пасту № 1, займаў высокія месцы на конкурсах па страявой падрыхтоўцы. Ёсць думкі паступаць у Ваенную акадэмію. Прыцягвае армейская тэма тым, што служылі брат, бацька і дзед. Таксама ўдзельнічаў у парадзе да Дня Незалежнасці. Калі маршыруеш, то на цябе ўсе глядзяць, і ты адчуваеш вялікую адказнасць. За першы дзень тут я навучыўся прыгожа запраўляць ложак. На страявых занятках мы рэпеціравалі пастраенне. Лягчэй мне і на дапрызыўнай падрыхтоўцы.
А вось пятнаццацігадовы Сяргей Царлюкевіч у 56-м палку ўжо другі год запар.
— Летась мне ў школе расказалі пра гэты лагер і спыталі, ці не хачу я сюды з'ездзіць. Я пагадзіўся. І мне спадабалася. Тым больш што дзед — вайсковец, шмат расказваў пра службу. Сябрую і са спортам — ужо даволі даўно займаюся боксам.
Кампетэнтна
Больш за 150 спартыўна-патрыятычных лагераў арганізуецца сёлета ў Беларусі. Мяркуецца, што ў іх паўдзельнічаюць каля 10 тысяч вучняў. Пра гэта заявіў начальнік упраўлення інфармацыі — прэс-сакратар галоўнага ўпраўлення ідэалагічнай работы Міністэрства абароны Уладзімір Макараў.
Іх работа вядзецца па спартыўна-тэхнічным, фізкультурна-спартыўным, ваенна-патрыятычным, абаронна-спартыўным кірунках. Міністэрства адукацыі рэалізуе ваенна-патрыятычныя адукацыйныя праграмы ва ўзаемадзеянні з Мінабароны, МУС, Дзяржпагранкамітэтам і МНС.
Валяр'ян ШКЛЕННІК
Фота Сяргея НІКАНОВІЧА
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
