Вы тут

У краіне ўжо практычна сабралі першы мільён тон збожжа


Па аператыўнай інфармацыі Міністэрства сельскай гаспадаркі і харчавання, 24 ліпеня ўбрана 951,1 тысячы тон збожжавых культур, што складае 15,5 % ад усёй уборачнай плошчы. Сярэдняя ўраджайнасць — 28,8 ц/га. Плануецца, што мільён тон будзе сабраны да канца гэтага тыдня.


Брэстчына лідзіруе

Варта нагадаць, што сёлета масавая ўборка пачалася раней у параўнанні з мінулым годам. У жніве лідзіруе Брэсцкая вобласць, дзе сабралі 446,4 тысячы тон збожжавых і зернебабовых культур пры сярэдняй ураджайнасці ў 29,1 ц/га. Следам ідзе Гродзенская вобласць. Там хлебаробы намалацілі 264,6 тысячы тон збожжа. На трэцім месцы размясцілася Мінская вобласць з ураджаем 133,4 тысячы тон. Чацвёртую пазіцыю займае Гомельшчына, дзе ўбралі 94,3 тысячы тон збожжавых і зернебабовых. Аграрыі Віцебскай і Магілёўскай абласцей сабралі 10,93 тысячы тон і 1,8 тысячы тон адпаведна. Лідзіруюць па ўраджайнасці гаспадаркі Гродзенскай вобласці, дзе ў сярэднім яна склала 31,8 ц/га.

Першыя экіпажы-тысячнікі

Першы экіпаж-тысячнік на ўборцы ўраджаю збожжавых і зернебабовых культур ужо з'явіўся ў Брэсцкай вобласці. Прычым экіпаж сямейны — Валерый і Таццяна Кухты намалацілі больш за 1050 тон у ААТ «Белавежскі» Камянецкага раёна.

У цэлым жа на Брэстчыне ў лідарах знаходзіцца Брэсцкі раён, дзе ўбрана больш за 57 % плошчаў. Далей па спісе Бярозаўскі (53,5 %), Пружанскі (53 %) і Камянецкі (47,3 %) раёны. Самая высокая ўраджайнасць зафіксавана ў Баранавіцкім раёне (34,9 ц/га). Пры гэтым аграрыі адзначаюць, што для Баранавіцкага раёна гэта невялікая ўраджайнасць. Уборка таксама адрозніваецца і тэрытарыяльна: у паўднёвай частцы ўжо ўбралі збожжа практычна з паловы плошчаў, а паўночныя рэгіёны знаходзяцца толькі на пачатковай стадыі (убрана каля 16 % плошчаў).

Напярэдадні першы ў Мінскай вобласці 1 тысячу тон збожжа намалаціў экіпаж са Слуцкага раёна. Добра папрацавалі браты Аляксандр і Уладзімір Анціпцавы з дзяржпрадпрыемства «Саўгас «Рачкавічы» Беларускай чыгункі.

Поўным ходам ідзе ўборачная ва ўсёй Гродзенскай вобласці. У рэгіёне ўжо ўбралі больш за 21 % плошчаў. У лідарах Зэльвенскі (38 %), Свіслацкі (35 %) і Воранаўскі (34 %) раёны. У Гродзенскім і Карэліцкім раёнах з аднаго гектара збіраюць па 45,6 ц і 43,4 ц адпаведна.

Сочаць за тэхнікай анлайн

А ў Мінскай вобласці ў анлайн-рэжыме плануецца адсочваць работу сельгастэхнікі. Як адзначыў начальнік упраўлення механізацыі і інвестыцый камітэта па сельскай гаспадарцы і харчаванні Мінаблвыканкама Васіль Сысоеў, ноу-хау будзе працаваць з дапамогай датчыкаў сачэння, якія ўсталяваныя на рухавіках трактароў. Гэта дазволіць назіраць за ўзворваннем у анлайн-рэжыме.

Датчыкі дазволяць правесці аналіз загрузкі трактара, ацаніць яго работу, адзначыць, колькі гадзін ён быў у полі, які аб'ём работы выканаў, ці мелі месца прастоі і несанкцыянаваныя аперацыі.

Інавацыя стала магчымай дзякуючы з'яўленню новых трактароў у гаспадарках вобласці: усяго плануецца закупіць 150,
з іх 44 ужо паступілі ў распараджэнне гаспадарак.

Ілья КРЫЖЭВІЧ

Загаловак у газеце: Блізкія да першага мільёна

Выбар рэдакцыі

Грамадства

Жыццёвы шлях Якава Крэйзера. Першы камдзiў, якi атрымаў Зорку Героя, заслужыў яе, абараняючы Барысаў

Жыццёвы шлях Якава Крэйзера. Першы камдзiў, якi атрымаў Зорку Героя, заслужыў яе, абараняючы Барысаў

У пачатковы перыяд Вялiкай Айчыннай вайны зацятыя баi разгарнулiся пры абароне Барысава — старадаўняга беларускага горада на Бярэзiне. 

Грамадства

Схадзіць на «Куфар» і застацца без грошай. На папулярным сайце можна сустрэць махляра, замаскіраванага пад пакупніка

Схадзіць на «Куфар» і застацца без грошай. На папулярным сайце можна сустрэць махляра, замаскіраванага пад пакупніка

«Лічбавыя жулікі», якія здымаюць грошы з чужых банкаўскіх карт, звычайна маскіруюцца пад інтэрнэт-рэсурсы, вартыя даверу.