Яшчэ ў канцы мінулага года на пасяджэнні Савета па ўзаемадзеянні органаў мясцовага самакіравання, прысвечаным праблемам жыллёва-камунальнай гаспадаркі, старшыня Савета Рэспублікі Міхаіл Мясніковіч даручыў старанна вывучыць усе болевыя пункты, звязаныя з забеспячэннем жыхароў краіны якаснай пітной вадой. Зараз ідзе дапрацоўка паправак у Закон Рэспублікі Беларусь «Аб пітным водазабеспячэнні», які быў прыняты яшчэ ў 1999 годзе і патрабуе карэкціроўкі з улікам патрабаванняў часу і сітуацыі, якая склалася ў воднай гаспадарцы краіны.
Праект закона чакае папраўкі
Па словах старшыні Пастаяннай камісіі Савета Рэспублікі па рэгіянальнай палітыцы і мясцовым самакіраванні Аляксандра Папкова, была праведзена вялікая работа па дапрацоўцы праекта закона «Аб унясенні змяненняў і дапаўненняў у некаторыя законы Рэспублікі Беларусь па пытаннях пітнога водазабеспячэння». З улікам глыбокага вывучэння найбольш уразлівых месцаў сістэмы водазабеспячэння ва ўсіх рэгіёнах краіны праект закона будзе прадстаўлены са значнымі зменамі.
Напрыклад, у новым заканадаўстве будзе прадугледжана магчымасць будаўніцтва вулічных сетак пітнога водазабеспячэння для жыллёвага фонду з прыцягненнем сродкаў грамадзян.
Таксама прапануецца ўстанавіць абмежаванні для будаўніцтва прамысловымі прадпрыемствамі ведамасных водазаборных збудаванняў, калі ў існуючых сістэм водазабеспячэння ёсць тэхнічныя магчымасці для іх абслугоўвання.
Парламентарыі прапануюць удакладніць паўнамоцтвы Савета Міністраў Беларусі, дэталізаваць кампетэнцыю Міністэрства жыллёва-камунальнай гаспадаркі. У новым праекце закона з'явяцца асобныя артыкулы, якія рэгламентуюць паўнамоцтвы Міністэрства прыродных рэсурсаў і аховы навакольнага асяроддзя і Міністэрства аховы здароўя.
Новы праект закона дапоўнены часткай «Эканамічны механізм рэгулявання ў галіне пітнога водазабеспячэння».
Гаспадарскі падыход да пітной вады
Прыйшоў час падысці да праблемы выкарыстання пітной вады ў нашай краіне па-гаспадарску. Зараз Савет Рэспублікі адстойвае ў зацікаўленых ведамствах чатыры прынцыповыя пазіцыі.
На думку парламентарыяў, у першую чаргу трэба знайсці правільнае рашэнне па забеспячэнні вадой буйных прадпрыемстваў. Бо да гэтага часу ў тэхнічных мэтах у нашай краіне выкарыстоўваецца вада з падземных крыніц.
Па даных Дзяржаўнага воднага кадастра ў 2017 годзе асноўны аб'ём расходу падземнай вады прыходзіўся на сферу жыллёва-камунальнай гаспадаркі (66 % або 537,5 млн м3), на прамысловасць 12,4 % (100,9 млн м3), сельская гаспадарка 14,4 % (116,6 млн м3).
Сітуацыя, калі прадпрыемствы спажываюць пітную ваду для тэхнічных патрэб, пры гэтым забруджваючы навакольнае асяроддзе, скідваючы вытворчыя адходы ў рэкі, недапушчальная.
Пастаянная камісія Савета Рэспублікі па рэгіянальнай палітыцы і мясцовым самакіраванні прапануе заканадаўча ўстанавіць неабходнасць укаранення паралельнай сістэмы трубаправодаў з пітной і тэхнічнай вадой.
Прапануецца таксама ўпарадкаваць адносіны, звязаныя з работай ачышчальных збудаванняў сцёкавых вод. Пакуль на ўзроўні заканадаўчага акта яны не ўрэгуляваныя. Канцэпцыяй удасканалення і развіцця жыллёва-камунальнай гаспадаркі да 2025 года замест існуючых палёў фільтрацыі плануецца будаўніцтва ў рэгіёнах ачышчальных збудаванняў. Прапануецца прыняць законапраект, які будзе рэгуляваць адносіны як у галіне водазабеспячэння, так і водаадвядзення.
Стварыць сістэму кантролю якасці вады
Яшчэ адна праблема, якая патрабуе заканадаўчага рашэння, — бескантрольнае бурэнне свідравін уласнікамі і арандатарамі зямельных участкаў. Гэтае пытанне ініцыявана Міністэрствам прыродных рэсурсаў і аховы навакольнага асяроддзя. На думку ведамства, у Беларусі неабходна стварыць сістэму кантролю рацыянальнага водакарыстання, якая выключае свідраванне водазаборных свідравін і забор вады без адпаведнага дазволу ўпаўнаважанага дзяржаўнага органа, і ўстанавіць парадак выдачы такіх дазволаў.
Сёння ўсе аб'екты і прадпрыемствы сістэмы водазабеспячэння насельніцтва знаходзяцца ў падпарадкаванні жыллёва-камунальнай гаспадаркі. Пасля ліквідацыі Міністэрства меліярацыі і воднай гаспадаркі БССР у рэспубліцы няма дзяржаўнага органа кіравання гэтай галіной, што прывяло да сітуацыі, калі ў краіне няма адзінай і зладжанай палітыкі далейшага развіцця сістэмы воднай гаспадаркі. Пастаянная камісія Савета Рэспублікі па рэгіянальнай палітыцы і мясцовым самакіраванні прапануе стварыць навукова-практычны цэнтр воднай гаспадаркі Беларусі, які будзе каардынаваць усе праблемы водагаспадарчай галіны, у тым ліку і пытанне забеспячэння насельніцтва якаснай пітной водой.
Плануецца, што з улікам усіх заўваг абноўлены праект Закона Рэспублікі Беларусь «Аб унясенні змяненняў і дапаўненняў у некаторыя законы Рэспублікі Беларусь па пытаннях пітнога водазабеспячэння» будзе разгледжаны на восеньскай сесіі парламента.
Наталля БІТЭЛЬ
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
