26 Верасень, серада

Вы тут

Наталля Ляхавец: Хочацца файную сукенку? Даверцеся швачцы!


Яе строй надзявала расійская спявачка Паліна Гагарына. За чатыры гадзіны яна сшыла сукенку для Анфісы Чэхавай, якая той не толькі падышла, але і дужа спадабалася. Нават Аляксандр Саладуха звяртаецца да краўчыхі і дызайнера Наталлі Ляхавец, каб тая падшыла яму кашулі. Простая дзяўчына з беларускай вёскі, якая вучылася шыць на швейнай машынцы суседкі, нават не магла ўявіць, што ў яе не будзе адбою ад заказаў не толькі з Беларусі, але і з іншых краін. Зараз яе можна пазнаць па складаных, неадназначных мадэлях адзення, нечаканых дызайнерскіх рашэннях і ўласным эпатажным вобразе. І калі вырашыце адшукаць найлепшую швачку ў Мінску, то пошукавік першым выдасць яе імя і прозвішча...


— Яшчэ некалькі гадоў таму вы збіраліся зрабіць уласную калекцыю. І ўсё жартавалі, што пакуль яна «ў шафе». Атрымалася за гэты час яе пашыць?

— У мяне няма сваёй калекцыі таму, што я шмат шыю на заказ і фізічна на яе не хапае часу. Хоць у мінулым годзе былі спробы ўсё ж такі яе зрабіць, і нават пяць адзінак ужо гатовыя. Быў спонсар, пайшло каля тысячы долараў на адну толькі тканіну. А для таго каб узяць удзел у паказе, трэба яшчэ дзве тысячы. Каб дарабіць калекцыю, яшчэ столькі ж... Карацей, гэта досыць дарагое задавальненне.

Я часам хаджу на тыдні моды, паказы, але зараз ніхто з беларускіх дызайнераў мне не падабаецца. Іх калекцыі шыюцца для таго, каб пасля рэчы прадаць. З-за гэтага мадэлі атрымліваюцца досыць простыя. Мне ж хочацца ўскладненых мадэляў, незвычайных вобразаў. Такіх, якія, магчыма, у паўсядзённым жыцці і не надзенеш, але яны падыдуць тым, каму, напрыклад, даводзіцца выступаць на сцэне.

— Па чым, калі не па кроі, відаць, што мадэль складаная? І як распазнаць дастойнага дызайнера?

— Важна, якая тканіна выкарыстоўваецца, наколькі шмат дэталяў у вырабе. Таксама часцей за ўсё дызайнеры самі не шыюць калекцыі, а перакладаюць гэтую частку працы на краўчыху. А ад таго, што ў іх няма вопыту пашыву, бываюць памылкі ў мадэляванні і раскроі.

Увогуле ўсе натхняюцца адно адным. Але некаторыя нашы беларускія дызайнеры — занадта ж падрабязна.

Таксама кананічны дызайнер мусіць умець маляваць свае мадэлі адзення. Але мне, напрыклад, больш даспадобы рабіць усё на хаду. Таму я не малюю эскізы, а прыдумваю адразу на тканіне.

Увогуле люблю працаваць у стане афекту. Прыйшоў заказчык, якому ледзь не заўтра патрэбны выраб, і мы спрабуем хутка і адразу ж прыдумаць, што рабіць. Памятаю, што, калі ледзь не месяц шыла калекцыю, так засумавала па заказах, па тым, калі людзі, якія прыходзяць на прымеркі, прыносяць з сабой тканіну — і мы пачынаем ствараць.

— У каго вы натхняецеся?

— Раней вельмі падабаліся калекцыі сясцёр Парфяновіч. Нядаўна хадзіла на паказ дызайнера Святланы Тадорскай, таксама спадабалася, бо яе работа вельмі працаёмкая. А так, калі гляджу паказ мод, бачу мадэлі і разумею, што гэту магу пашыць за гадзіну, а тую за дзве...

— Хто ўнутры вас зараз перамагае: швачка ці дызайнер?

— Калі шчыра, то швачка. Мне так падабаецца шыць! Нават калі даводзіцца пераробліваць, пароць, сядзець над рэччу гадзінамі.

— Што больш даспадобы: працэс ці вынік?

— Вынік не падабаецца тады, калі заказчык камандуе, што і як рабіць. Амаль ніколі так не бывае, каб чалавек здаўся на цябе і даверыў усё рабіць на свой густ. Нядаўна ў мяне адна з беларускіх спявачак шыла сукенку: разам выбралі тканіну, а пасля яна амаль не ўмешвалася ў пашыў, і вынік быў такі, што нам абедзвюм спадабалася.

Часта людзі памыляюцца наконт таго, што ім падыдзе, а што не. Накшталт таго, што ў праблемным месцы больш зацягнем, і я буду выглядаць худым ці стройнай. Але швачцы лепш відаць, як схаваць лішняе і падкрэсліць прыгожае.

— Як ацэньваеце сваю працу ў грашовым эквіваленце?

— Стараюся рабіць гэта адэкватна. Напэўна, таму да мяне так шмат людзей і ходзіць шыць. Часам мае калегі за працу бяруць сярэднямесячную зарплату па краіне. Але я лічу, што гэта зашмат. Праўда, калі тэлефануюць і запытваюць, чаму так дорага, то я прапаную ім звярнуцца да іншага майстра. Калі просяць зрабіць занадта простыя рэчы, таксама не пагаджаюся. Хочацца творчасці...

— ...якую можна праявіць на канцэртных уборах?

— Не толькі. Асобная асалода — шыць уніформу. Напрыклад, для казіно, кавярняў. Гэта толькі на першы погляд падаецца, што ў ёй асабліва няма чаго прыдумаць. Але нават тыповай спадніцы ці камізэльцы можна дадаць незвычайны элемент, зрабіць запах, асіметрыю... Было б жаданне ў заказчыка адзець сваіх супрацоўнікаў не тыпова. Напрыклад, нядаўна прыдумала такую жаночую ўніформу: звычайная чорная сукенка з баскай, са здымнымі белымі манжэтамі, белым поясам, стойкай на шыі і статычным жабо на адзін бок. Адна з самых частых праблем — тканіна пры мыцці фарбуецца. Але ў гэтай форме кантрасныя элементы можна здымаць і мыць асобна.

— Практычна ставіцеся да працы. А ёсць у вас «швейная» мара?

— Так. Хачу пашыць спявачцы Беёнсэ сукенку.

— А яна пра гэта ведае?

— Не, але было б няблага, хутчэй бы зрабілі ёй убор! (Смяецца.)

— Каму з «зорак» ужо даводзілася шыць касцюм?

— Паліне Гагарынай, Анфісе Чэхавай, Лаліце. Зараз прыходзяць шыцца блогеры часцей, чым беларускія ці расійскія зоркі. «Зорнасць» у наш час змянілася.

Але зараз я змяніла сваё стаўленне да таго, што раблю. Гэта адбылося пасля таго, як нарадзіла дачку. Ды і ўвогуле каштоўнасці змяніліся.

— А ў чым галоўная складанасць, калі строй заказваюць спевакі ці спявачкі?

— Нашы айчынныя па звычцы ўсё кантралююць: як іх убор шыецца, з чаго, якая будзе мадэль. Але ж усё гэта — мая непасрэдная праца. І калі хтосьці з артыстаў нарэшце дае свабоду для вырашэння, што і як рабіць, — вы не ўяўляеце, колькі цеплыні і пяшчоты тады ўкладаецца ў выраб.

Хоць насамрэч завышаным кантролем над сітуацыяй я і сама хварэю. Гэта ў нас, беларусаў, такі менталітэт. Напрыклад, я сваёй памочніцы ўсё да дробязей тлумачу і пакуль гэта раблю, ужо ўсё сама пашыю.

— Як ставіцеся да такога папулярнага сёння масмаркету?

— Гэтым зараз вельмі лёгка і выгадна займацца. Настаў той час, калі ў трэндзе ўсё бясформеннае. Яго лёгка пашыць і зрабіць на такое адзенне лякалы. Толькі бяры і шый, галоўнае — файныя тканіны выбірай. І не трэба дакладнай пасадкі. Зручна!

Я раней працавала на швейнай фірме, дзе касцюмы мусілі сядзець як улітыя. Зараз жа ў масавым адзенні на гэта не асабліва звяртаюць увагу. Толькі калі шыюць эксклюзіўныя рэчы, спецыяльна на заказ, тады ўжо па фігуры.

— Цікава, ці накладвае прафесія адбітак: сустракаеце людзей па тым, як яны адзеты?

— Ужо даўно не. І хоць я штодзень шыю, разумею, што не ў адзенні сутнасць. Хоць зрэдку бывае так, што вобраз зачэпіць, і тады я пачынаю разглядаць чалавека. Але гэта рэдкія выпадкі. І калі ўсё ж такі звяртаю ўвагу, то, хутчэй, на аксесуары. Яны куды больш чапляюць.

І зрабіць іх даволі нескладана. Напрыклад, мой муж нядаўна паглядзеў ролікі ў інтэрнэце, як шыць сумкі, рукзакі, кашалькі, і цяпер у нашай сям'і ўсё гэта зроблена ўласнаручна.

— А навучыцца шыць па відэа з YouТube можна?

— Я думаю, што так. Галоўнае — мець уседлівасць. Прыклад з мужам гэтаму доказ.

— Як жа талент і прыродная здольнасць?

— Чалавека можна чаму хочаш навучыць. Любога — шыць. Было б жаданне.

— Дачка, як думаеце, таксама будзе шыць, як падрасце?

— Не ўпэўнена. Хоць было б добра. У мяне не было чалавека, які б як на далоні паднёс: як правільна мадэляваць, краіць, шыць, як выпраўляць памылкі. А ў яе буду я. Вядома, мне б хацелася дзяліцца сваім вопытам з дачкой. Але гэта не галоўнае. Важна, каб добрым чалавекам вырасла...

Бліц-апытанне

— Адпачынак ці праца?

— Праца.

— Творчасць ці майстэрства?

— Майстэрства.

— Дзень ці ноч?

— Ноч.

— Холад ці агонь?

— Холад больш люблю.

— Шыць ці прыдумляць?

— Шыць!

— Салодкае ці кіслае?

— Люблю і тое, і тое. Спачатку з'есці салодкае, а пасля — кіслае.

— Пачуцці ці розум?

— Раз задумалася, значыць, розум.

— Інтуіцыя ці разлік?

— У мяне дрэнна і з тым, і з тым.

— Цела ці душа?

— Душа.

— Музыка ці цішыня?

— Вядома, музыка. (Звяртаецца да памочніцы.) Ганна, зрабі гучней музыку, не чуваць нічога!

— Шчасце ў...

— Прастаце стаўлення да ўсяго на гэтым свеце. Хочаш быць шчаслівым — прасцей стаўся да жыцця.

Вераніка ПУСТАВІТ

Фота Ганны ЗАНКАВІЧ

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Шчырая размова з вядомым педагогам пра бацькоўскія сумненні і страхі

Шчырая размова з вядомым педагогам пра бацькоўскія сумненні і страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.