Вы тут

Ва ўрадзе ацанілі вынікі работы эканомікі за першыя паўгода як пазітыўныя


Падчас пасяджэння Савета Міністраў адзначылі пазітыўную дынаміку ў апрацоўчай прамысловасці, будаўніцтве, гандлі і сельскай гаспадарцы

Ва ўрадзе ацанілі вынікі работы эканомікі за першыя паўгода як пазітыўныя. Пры гэтым тэмп росту ВУП апярэджвае прагнозныя паказчыкі. Пра гэта паведаміў прэм'ер-міністр Андрэй КАБЯКОЎ на пасяджэнні Савета Міністраў, дзе разглядаліся вынікі дзейнасці за першае паўгоддзе, а таксама меры па выкананні задач на 2018 год. Па яго словах, цяпер выконваюцца ўсе найважнейшыя паказчыкі сацыяльна-эканамічнага развіцця, зацверджаныя кіраўніком краіны.


Эканоміка плюсуе

Тэмп росту ВУП за першае паўгоддзе склаў 104,5 % (прагноз 102,8 %). Ва ўсіх рэгіёнах адзначаецца рост валавога рэгіянальнага прадукту і прадукцыйнасці працы. Станоўчы вынік і па многіх відах эканамічнай дзейнасці. У апрацоўчай прамысловасці рост склаў 7,9 %, у будаўніцтве — 7,5 %, у гандлі — 7,8 %, у сельскай гаспадарцы — 3,9 %, у транспартнай дзейнасці — 3,7 %. Вытворчасць машын і абсталявання павялічылася на 19,2 %, транспартных сродкаў — на 13,7 %, прадукцыі дрэваапрацоўкі — на 14,8 %, фармацэўтычнай прадукцыі — на 11,9 %.

Захоўваецца баланс у знешнім гандлі. Сальда па таварах і паслугах (за 5 месяцаў) дадатнае — плюс $310 млн, або 1,4 % да ВУП. Прырост атрыманы за кошт росту экспарту тавараў і паслуг, перш за ўсё ў краіны па-за СНД. Усяго экспарт тавараў і паслуг павялічыўся на $3 млрд (плюс $2,4 млрд — па таварах і $0,6 млрд — па паслугах), у параўнанні з аналагічным перыядам мінулага года.

«Нізкі ўзровень інфляцыі разам з іншымі мерамі макрабалансіроўкі дазваляюць зніжаць кошт крэдытных рэсурсаў для эканомікі. Стабільнасць на валютным, крэдытна-дэпазітным і фінансавым рынках захоўваецца. Давер да нацыянальнай валюты расце», — адзначыў Андрэй Кабякоў.

На ўнутраным валютным рынку за першае паўгоддзе сфарміравалася станоўчае сальда куплі-продажу валюты ў аб'ёме $320 млн. Насельніцтва на чыстай аснове прадало амаль $800 млн, юрыдычныя асобы набылі $480 млн.

А цэны?

Падчас пасяджэння прэм'ер-міністр даручыў міністру антыманапольнага рэгулявання і гандлю Уладзіміру Калтовічу забяспечыць кантроль і разам з губернатарамі аператыўна прымаць усе неабходныя меры па стрымліванні неабгрунтаванага росту цэн.

Андрэй Кабякоў адзначыў, што інфляцыя знаходзіцца на мінімальным узроўні за ўсю гісторыю, і гэта вельмі важны паказчык для забеспячэння макраэканамічнай збалансаванасці. «У насельніцтва аднак фарміруюцца некалькі іншыя ацэнкі на аснове інфляцыйных чаканняў, а «дапамагае» ў гэтым адпаведная інфармацыйная падсілкоўванне», — дадаў Андрэй Кабякоў.

Заробкі сярэднія і «бюджэтныя»

Прэм'ер-міністр адзначыў, што заробкі бюджэтнікаў будуць расці ў межах даручэнняў кіраўніка дзяржавы і магчымасцяў бюджэту.

«Суадносіны заработнай платы бюджэтнікаў да сярэдняй па краіне ўжо складаюць 78,8 %. У чацвёртым квартале гэтага года плануецца выйсці на 80 %», — падкрэсліў кіраўнік урада.

За пяць месяцаў бягучага года рэальныя даходы насельніцтва прыраслі на 7,7 %, рэальная заработная плата па паўгоддзі — на 13 %, у тым ліку ў бюджэтнай сферы — на 15,4 %. Сярэдняя заработная плата па краіне за чэрвень склала BYN953,7. У пазабюджэтным сектары эканомікі сярэдні заробак за студзень — чэрвень склаў BYN996,3. «Выяўляюцца тэндэнцыі, калі заработная плата на прадпрыемствах расце хутчэй, чым прадукцыйнасць працы. Сітуацыю да канца года трэба выпраўляць», — зрабіў даручэнне прэм'ер-міністр.

Гасіць даўгі дзяржсродкамі не выйдзе

«Выкарыстоўваць бюджэтныя сродкі ў якасці інструменту для развязкі пратэрмінаваных даўгоў катэгарычна непрымальна», — адзначыў Андрэй Кабякоў. Па яго словах, у корані не правільна тое, што многія дзяржаўныя прадпрыемствы разлічваюць у гэтым пытанні на бюджэт.

Ён падкрэсліў, што неабходныя рынкавыя інструменты для фінансавага аздараўлення прадпрыемстваў ужо створаны. Прыняты Указ № 200 ад 24 мая 2018 года, які дзейнічае ў адносінах да арганізацый як дзяржаўнай, так і прыватнай формаў уласнасці. Маецца і магчымасць дыскантавання доўгу, яго замены на акцыі, прыцягнення інвестараў.

«Пакуль няма прыкладаў сярод прыватных і дзяржаўных кампаній, якія гэтымі інструментамі скарысталіся. Трэба больш актыўна займацца, таму што самі гэтыя праблемы не растворацца», — канстатаваў Андрэй Кабякоў.

За пяць месяцаў 2018 года пратэрмінаваная запазычанасць па крэдытах і пазыках у цэлым па краіне павялічылася на 1,7 % і склала BYN2,5 млрд, або 3,6 % ад усёй сумы запазычанасці па крэдытах і пазыках.

Ілья КРЫЖЭВІЧ

Выбар рэдакцыі

Грамадства

Карэспандэнт «Звязды» высвятляла, чаму так цёмна на асветленых вуліцах Магілёва

Карэспандэнт «Звязды» высвятляла, чаму так цёмна на асветленых вуліцах Магілёва

Вечарам прайсціся ўздоўж цэнтральнай вуліцы Першамайскай у Магілёве адно задавальненне.

Спорт

Баскетбаліст Бенджамін-Павел Дуду: У Гане мяне называлі белым

Баскетбаліст Бенджамін-Павел Дуду: У Гане мяне называлі белым

Мама Бена — беларуска, тата — ураджэнец Ганы.

Эканоміка

Куды звяртацца, калі грамадзяніну затрымліваюць зарплату?

Куды звяртацца, калі грамадзяніну затрымліваюць зарплату?

Адказ на гэта і іншыя пытанні — у гутарцы з Дзмітрыем Шаўчуком.