Вы тут

Касмічная майстэрня скульптара Міско


У гэтыя дні ў майстэрні-музеі народнага мастака Беларусі Івана Міско пабываў касманаўт Алег Навіцкі. Яны абмеркавалі мадэль барэльефа, які ўпрыгожыць будучы абеліск на мінскай вуліцы Касманаўтаў. Адкрыццё шасціметровай стэлы плануюць правесці ў верасні падчас работы Міжнароднага касмічнага кангрэса.


Сучасны Ікар — адзін з насельнікаў майстэрні-музея.

— Фотаздымак з газеты «Звязда» пабываў на арбіце Зямлі ў кабіне касмічнага карабля, — згадаў касманаўт Алег Навіцкі ў майстэрні народнага мастака Беларусі скульптара Івана Міско. Размова адбывалася за сталом, на якім стаялі кубачкі з гарачай гарбатай (па рэцэпце маэстра скульптуры) і ляжалі духмяныя яблыкі (касманаўт прывёз пачастунак з саду маці).

Размаўлялі галоўным чынам пра будучую стэлу. У гэтыя дні Іван Міско завяршае работу над унікальным манументальным партрэтам траіх беларускіх касманаўтаў — на рэльефе кожнага будуць відаць уласныя подпісы саміх герояў. Каб нанесці такі подпіс на яшчэ мяккі матэрыял мадэлі абеліска, Алег Навіцкі быў запрошаны ў майстэрню вядомага скульптара.

Касманаўт Навіцкі пакінуў уласны подпіс на скульптурным партрэце.

Я памятаю, як выглядала гэта майстэрня больш за сорак гадоў таму. У той час малады мінскі скульптар Іван Міско, захоплены тэмай пакарэння космасу, працаваў над партрэтам Юрыя Гагарына. Аднойчы ён запрасіў мяне прыйсці да яго з цікавай нагоды: у госці прыедзе маці першага касманаўта Зямлі. Памятаю, як уважліва ўглядалася Ганна Цімафееўна ў абрысы гіпсавага партрэта, доўга гутарыла са скульптарам пра свайго сына.

Менавіта ў той момант іх сустрэчы я зрабіў гэты здымак. Лёс фота аказаўся ўдалым: пасля шматлікіх публікацый за многія гады ён «даляцеў» да касмічнай арбіты ў складзе невялічкага фотаархіва самых памятных для касманаўтаў фотадакументаў. Потым мой рэпарцёрскі архіў неаднойчы папаўняўся чарговымі фотасюжэтамі — іх герой Іван Міско быў і застаецца верным сваёй галоўнай тэме: стварае ўнікальную калекцыю партрэтаў касманаўтаў. Вось і гэты фотасюжэт расказвае чытачам «Звязды» пра некаторыя падзеі, якія бачыла на сваім вяку старая майстэрня, пра яе гаспадара — сусветна вядомага скульптара і яго славутых гасцей.

Алег Навіцкі і Іван Міско перад уваходам у майстэрню-музей.

На дзвярах — подпісы касманаўтаў і славутых асоб, якія пабывалі ў скульптара.

З тых далёкіх часоў да непазнавальнасці змяніўся ўнутраны і знешні выгляд майстэрні. Яе «засялілі» партрэты герояў новай эры чалавецтва (дарэчы, не толькі зорных пілотаў). На фасадзе з'явілася выява чалавека ў скафандры, перад уваходам падняліся тры бярозкі, пасаджаныя касманаўтамі-беларусамі.

Дарэчы, з газетай «Звязда» Іван Міско цесна супрацоўнічаў яшчэ ў пачатку сямідзясятых. Будучы «касмічны скульптар» ахвотна рабіў для нашага выдання графічныя партрэты славутых беларускіх працаўнікоў. Гэтыя партрэты разам з заметкамі, якія пісалі звяздоўцы, друкаваліся пад рубрыкай «Зоркі рэспублікі».

Касманаўт і скульптар аглядаюць мадэль барэльефа для будучага абеліска.

Яблыкі з малой радзімы — самыя смачныя, лічыць касманаўт.

Як бачыце, творчы дыяпазон майстра за дзесяцігоддзі прасцёрся ад зорак зямных да касмічных.

Яўген ПЯСЕЦКІ

Дадаць каментар

Выбар рэдакцыі

Грамадства

Зміцер Жылуновіч. Таварыш пясняр

Зміцер Жылуновіч. Таварыш пясняр

Ён быў аўтарам Маніфеста аб абвяшчэнні Савецкай Беларусі, першым прэм'ер-міністрам рэспублікі, яго двойчы выключалі з партыі, ён мог стаць першым народным паэтам...

Грамадства

Прэзідэнт зрабіў кадравыя прызначэнні

Прэзідэнт зрабіў кадравыя прызначэнні

Аляксандр Лукашэнка даў згоду на прызначэнне рэктараў і кіраўнікоў раёнаў і прадпрыемстваў.

Калейдаскоп

Чым здзівіў Беларускі тыдзень моды

Чым здзівіў Беларускі тыдзень моды

Пазнаёміцца з навінкамі ад беларускіх дызайнераў можна было на тыдні моды, які праходзіў у Мінску з 7 да 11 лістапада.