Вы тут

Вянкі ў Прыморскім парку


У святочнай канцэртнай праграме “Ад Ліга да Купалля”, што ладзілася ў Ліепаі, паўдзельнічалі актывісты беларускай суполкі “Мара”


Да Купальскіх традыцый беларусы далучаюцца змалку

Беларускае Купалле ў латышскім горадзе Ліепая ў “чыстым выглядзе” не святкуецца. Ды ўсё ж у прадаўняй веры нашых продкаў моцныя карані, а якраз Купалле ёсць яркім водблескам той магутнай культуры. Калі суботнім вечарам 7 ліпеня ў Ліепаі ў Прыморскім парку ладзілася праграма “Ад Ліга да Купалля” — а гэта былі сімвалічныя абрады, вясёлыя народны гульні, а таксама канцэртныя нумары — то сярод ліепайчан было шмат і мясцовых беларусаў. На свяце выступаў ансамбль беларускай песні “Паўлінка” Ліепайскай беларускай суполкі “Мара”. Гучалі ў парку песні на латышскай і беларускай мовах: пра жыццё, каханне, прыроду. Акрамя музычнага прадстаўлення, можна было пабачыць некаторыя беларускія абрады, карагоды з народных традыцый святкавання Купалля. Многія падключаліся да такіх дзеяў, удзельнічалі ў конкурсах. Напрыклад, дзяўчат і жанчын запрасілі звіваць вянкі з травы, кідаць іх у ваду. Мы вадзілі карагод вакол Лебядзінай сажалкі, а таксама завязвалі стужачкі жаданняў на дрэва, яшчэ апырсквалі адзін аднаго вадой.

Прадстаўніца Ліепайскай украінскай суполкі “Світанак” Рыма Думбаева потым казала мне, што актывісты суполкі “Мара” стварылі для гледачоў прыгожае свята з нацыянальным каларытам. Спадабалася ёй ідэя: уключыць у канцэртную праграму й некаторыя Купальскія абрады, звязаныя з вадою, травою, ваджэннем карагодаў. Варта дадаць, што сцэнарыст усіх імпрэз “Мары” і “Паўлінкі” — наша таленавітая Жанна Буйніцкая, у большасці выпадкаў яна ж і вядучая, як тое было й на гэты раз. Яна ж і ўсімі арганізацыйнымі пытаннямі займалася, ладзячы суботнюю вечарыну беларускай суполкі. А правесці конкурсы, абрады, падбадзёрыць ды павесці за сабой гледачоў ёй дапамаглі дзеці ўдзельнікаў ансамбля: дачка Жанны Анастасія, а таксама дачка й сын Мікалая Грынюка Вольга й Андрэй. Яны былі ў гушчыні падзей, каля гледачоў, а сама Жанна вяла канцэрт і запрашала ўсіх да ўдзелу з астраўка Лебядзінай сажалкі — гэткай умоўнай сцэны, якой там няма…

Тамара Шулцэ (у цэнтры) з сяброўкамі з “Паўлінкі”

Суботнія вечары ў Прыморскім парку, якія ладзіць Упраўленне культуры Ліепайскай думы ў летнія месяцы, праходзяць з 2012 года па ініцыятыве прадстаўнікоў самакіравання ды арганізацый этнаменшасцяў. На вечарах выступаюць гурты з этнасуполак, мясцовыя музыкі. Сёлета гасцей і жыхароў Ліепаі радуюць культурныя й фальклорныя гурты беларускага, а таксама нямецкага, рускага, польскага, літоўскага і ўкраінскага таварыстваў, латышскі музыка Нормунд Карпічс.

На фотаздымку, які дасылаю, мы бачым удзельніц свята, гэта Ірына Бяляева, Раіса Дзямешка, Тамара Шулцэ, Таццяна Данілюк, Людміла Жунда. Удзельніцы гурта “Паўлінка” — гэта Ірына, Раіса, Таццяна і Людміла. У самім гурце, дарэчы, спяваюць яшчэ 3 жанчыны і 3 мужчыны. А Тамара Шулцэ — гэта старшыня нашай суполкі “Мара”, у ансамблі яна пакуль не спявае.

Анжэла Фаміна, г. Ліепая

Фота Мікалая Грынюка

Дадаць каментар

Выбар рэдакцыі

Грамадства

Школа заўтрашняга дня. У трэндзе — медыянавыкі, гейміфікацыя і сторытэлінг

Школа заўтрашняга дня. У трэндзе — медыянавыкі, гейміфікацыя і сторытэлінг

У мінулыя выхадныя сталічны бізнес-клуб «Імагуру» ўжо другі раз прымаў на сваіх плошчах педагагічную неканферэнцыю. 

Культура

Гісторыкі спадзяюцца знайсці дакладную дату заснавання Мірскага замка

Гісторыкі спадзяюцца знайсці дакладную дату заснавання Мірскага замка

Вызначыць дакладны час з'яўлення на Беларусі вядомага абарончага збудавання дагэтуль немагчыма, хоць розных гіпотэз існуе шмат.

Спорт

Уладзімір Шантаровіч: Кажуць, я — геній, і мне гэта вельмі не падабаецца

Уладзімір Шантаровіч: Кажуць, я — геній, і мне гэта вельмі не падабаецца

Як трэнер пабудаваў сістэму, якая выхоўвае алімпійскіх чэмпіёнаў.

Грамадства

Як дзяўчаты з асаблівасцямі развіцця ўпершыню ствараюць модную калекцыю

Як дзяўчаты з асаблівасцямі развіцця ўпершыню ствараюць модную калекцыю

У лістападзе ў Мінску пройдзе Беларускі тыдзень моды.