Вы тут

Як стаць найлепшым?


Знайсці матывацыю. Нават на канікулах.

Увесну прайшоў заключны этап рэспубліканскай алімпіяды па 17 прадметах, у якой прынялі ўдзел 1460 вучняў з Беларусі, Літвы, Польшчы, Расіі, Украіны. Дыпломамі было ўзнагароджана 87 чалавек, лідзіравалі ў камандным заліку школьнікі з Мінска, а таксама з Гродзенскай і Гомельскай абласцей. Быць найлепшым не так проста: для гэтага вучні прыкладаюць вялікія намаганні. У кожнага героя — свая гісторыя...


Анастасія Слуцкер атрымала дыплом першай ступені на алімпіядзе па грамадазнаўстве. Яна выпускніца 10 класа сталічнай гімназіі № 8.

— Грамадазнаўства першапачаткова было ў спісе прадметаў, якія мне падабаліся і якія трэба здаваць пры паступленні, але калі б не настаўнік, то я наўрад ці дайшла б да алімпіяды. Самае складанае — прымусіць сябе чытаць і вучыць. Але нежаданне кагосьці падвесці давала мне матывацыю, — расказвае Анастасія. — Калі даведалася пра курсы перад рэспубліканскай алімпіядай, паставілася да іх вельмі скептычна, але ў канцы алімпіяды маё меркаванне змянілася. А галоўны «ўдар» пры падрыхтоўцы прыйшоўся на канікулы, калі даводзілася ахвяраваць асабістым часам.

Аляксандра Маляўка з Гродна скончыла 11 клас ліцэя № 1, яна дасягнула вышынь у вывучэнні «навукі зорак» — астраноміі. Двойчы заваявала дыплом першай ступені на рэспубліканскай алімпіядзе, сёлета стала абсалютным пераможцам. Мае пахвальны водгук ІOAA-2017 (міжнароднай алімпіяды па астраноміі і астрафізіцы), дыплом другой ступені Санкт-Пецярбургскай астранамічнай алімпіяды.

— Шчыра прызнацца, у самым пачатку думкі аб удзеле ў рэспубліканскай і тым больш міжнароднай алімпіядзе здаваліся далёкімі ад рэальнасці, больш захапляў сам працэс вывучэння прадмета. Ці цяжка давалася падрыхтоўка? Ёсць колькасць укладзеных сіл і часу, плюс твая зацікаўленасць у выніку, — расказвае Аляксандра. — Зразумела, нельга адмаўляць наяўнасць схільнасці да пэўнага роду дзейнасці, калі адчуваеш сябе «на сваім месцы». Думаю, астраномія і стала тым заняткам, дзе мне ўдалося адчуць, што я іду ў правільным кірунку і раблю гэта ў добрай кампаніі. Калі моцна захацець і правільна арганізаваць свой час, можна сумясціць практычна ўсё. Нават рашыць дзвесце задач, паралельна выканаць пяць практычных работ і вывучыць на памяць верш (усё да заўтрашняй раніцы). Але, нагружаючы мозг, нельга забываць і аб целе, фізічных нагрузках — цяпер я займаюся ў трэнажорнай зале.

Ганна Волкава — выпускніца 10 класа сталічнай гімназіі № 21. Поспехаў дзяўчына дабілася ў вывучэнні беларускай мовы і літаратуры, узяўшы дыплом першай ступені на заключным этапе рэспубліканскай алімпіяды.

— Насамрэч, я заўсёды разумела, што мяне цікавіць вывучэнне моў, літаратуры і гісторыі, таму, канешне, і маю поспехі менавіта па гэтых школьных прадметах. Нельга, зразумела, не адзначыць вялікую падтрымку з боку маёй настаўніцы беларускай мовы і літаратуры, яе педагагічны талент, прагу да сваёй працы і ўменне ўбачыць патэнцыял у сваіх навучэнцаў. А два месяцы рэспубліканскіх збораў далі мне той пласт ведаў, якія ніколі не атрымаць на звычайных занятках у школе, — дзеліцца Ганна. — Што датычыцца матывацыі: яе трэба шукаць толькі ўнутры сябе самога. Калі ты сапраўды нечага жадаеш, то ўсё зробіш так, як трэба. Два месяцы перад алімпіядай я размаўляла толькі на беларускай мове. Бацькі падтрымліваюць мяне ў любым пачынанні, за што ім вялікі дзякуй.

Але ж алімпіяда — гэта не толькі адукаванасць і падрыхтоўка вучняў: важную ролю адыгрывае настаўнік. Ён і закладвае веды ў галовы маладых талентаў, прывівае любоў да прадмета.

Настаўнік геаграфіі сталічнай гімназіі № 8 Іван Васілевіч Булва, які сам у 2003—2005 гадах быў абсалютным пераможцам рэспубліканскіх алімпіяд па геаграфіі, раіць «зялёным алімпіяднікам»: «Не губляйце час нават летам. Самападрыхтоўка дапаможа менш напружвацца падчас наступнага навучальнага года. Зазірайце ў падручнікі за старшыя класы. Таксама падтрымлівайце стасункі са старэйшымі таварышамі-алімпіяднікамі — яны дапамогуць не толькі добрай парадай, але і патрэбнай літаратурай. Абавязкова знайдзіце курсы па вашым прадмеце, якія на міжшкольным узроўні праводзяць выкладчыкі з універсітэтаў».

Анастасія Сурынава, выпускніца 10 класа гімназіі № 8 г. Мінска

Выбар рэдакцыі

Грамадства

Водар лаванды вабіць на Веткаўшчыну

Водар лаванды вабіць на Веткаўшчыну

Як выглядае «беларускі Праванс», дакладна ведаюць жыхары глыбінкі Гомельскай вобласці.

Эканоміка

«Прадам утульную кватэру, а куплю яшчэ лепшую». А пра падаткі вы не забыліся?

«Прадам утульную кватэру, а куплю яшчэ лепшую». А пра падаткі вы не забыліся?

Адна мая добрая знаёмая вырашыла палепшыць свае жыллёвыя ўмовы — прадаць сваю двухпакаёвую кватэру і купіць трохпакаёвую.

Калейдаскоп

Усходні гараскоп на наступны тыдзень

Усходні гараскоп на наступны тыдзень

БЛІЗНЯТЫ. Калі ёсць цікавыя ідэі, то менавіта цяпер яны будуць запатрабаваныя і нарэшце ажыццёвяцца. Тыдзень прынясе знаёмствы з новымі людзьмі, спатканні, вандроўкі і шмат яркіх уражанняў. Асабістае жыццё рэзка зменіцца, прычым менавіта так, як вы марылі. Вы больш не будзеце самотныя, сітуацыя вырашыцца на вашу карысць.

Грамадства

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

«Верхавіна лета» прайшла, і ўжо мала хто памятае, што першая дэкада чэрвеня была халаднаватай і з замаразкамі.