Вы тут

Экспанаты ад Дараганаў


Гэты род шмат чаго зрабіў для Асіповіцкай зямлі. Дзякуючы Восіпу і Мацвею Дараганам у канцы XІX стагоддзя тут была пабудавана ўнікальная чыгуначная ветка ад Асіповіч да Старых Дарог, вопыт пабудовы якой потым распаўсюдзілі па ўсёй Расійскай імперыі.


Акрамя гэтага тут з'явіліся дзве станцыі, масты і шмат чаго сучаснага на той перыяд, што зрабіла Дараганава вельмі перспектыўнай вёскай. Пасля Кастрычніцкай рэвалюцыі гэты род пераехаў за мяжу і сувязь надоўга абарвалася. Некалькі гадоў таму яна была адноўлена, і ў раён прыехаў са Швецыі праўнук Восіпа Дарагана Андрэй разам са сваёй жонкай Ланай. Дзякуючы ім, раённы музей атрымаў багатую калекцыю прадметаў і дакументаў славутага роду. Для іх размяшчэння былі выдзелены пяць залаў у шматпрофільным маладзёжна-падлеткавым цэнтры «Равеснік». Нядаўна сужэнцы зноў наведалі раён, у выніку чаго калекцыя музея папоўнілася яшчэ больш чым сотняй новых экспанатаў, а Свята-Панцеляймонаўская царква ў вёсцы Дараганава — фамільнымі абразамі сямейства.

— Гэта была па-сапраўднаму цёплая сустрэча, — адзначыла дырэктар раённага гісторыка-краязнаўчага музея Антаніна Сцяпанава. — Прыязджалі таксама бацькі Ланы Дараган, якія жывуць у Таліне, госці з музея флоту Санкт-Пецярбурга. Частку экспанатаў Андрэй у свой час перадаў і туды. Зараз ён з жонкай прывёз шмат дакументаў і сямейных фота, некаторыя прадметы быту, жаночыя аксесуары. У гонар гэтай сустрэчы ў залах экспазіцыі роду Дараганаў адбыўся святочны баль. Андрэй прызнаўся, што адчувае сябе на радзіме продкаў як дома. І гатовы сюды вяртацца яшчэ не раз.

Раён арганізаваў для Андрэя і Ланы экскурсію па мясцінах, звязаных з жыццём і дзейнасцю Дараганаў. Яны наведалі храм і святую крыніцу ў Прошчы, школьны музей у аграгарадку Дараганава, вёску Крынка, дзе раней знаходзіўся маёнтак Восіпа Дарагана. Але асабліва сужэнцы радаваліся сустрэчы з тымі людзьмі, якія за гады знаёмства сталі ім амаль роднымі. Шмат чаго для вяртання гістарычных каштоўнасцяў на радзіму зрабіла былая дырэктар школьная музея ў Дараганаве Жанна Караленя. Гэта менавіта дзякуючы ёй была адноўлена сувязь з нашчадкамі знакамітага роду і завязалася доўгатэрміновае плённае супрацоўніцтва. Андрэй і Лана вельмі цёпла адносіліся да Жанны Сямёнаўны. На жаль, гэтым разам сустрэцца ў яе з гасцямі не атрымалася. Вясной таленавітай настаўніцы і шчырай жыццялюбкі не стала — яна заўчасна пайшла з жыцця пасля працяглай хваробы.

Нэлі ЗІГУЛЯ

Выбар рэдакцыі

Грамадства

Што паглядзець у Хоцімску?

Што паглядзець у Хоцімску?

У Хоцімску нават ёсць кола агляду.

Грамадства

«За больш чым сем год былі ўсяго адны суткі без баявога выезду»

«За больш чым сем год былі ўсяго адны суткі без баявога выезду»

Гісторыя кар'еры падпалкоўніка ў адстаўцы Генадзя Цімахоўцава.

Палітыка

Беларусь і ЕС падпішуць візавае пагадненне не пазней за 2 лютага 2020 года

Беларусь і ЕС падпішуць візавае пагадненне не пазней за 2 лютага 2020 года

Верагодна, гэта адбудзецца ўжо ў гэтым лістападзе. 

Грамадства

Як праходзіў ваенна-гістарычны фестываль «Мір-1812»

Як праходзіў ваенна-гістарычны фестываль «Мір-1812»

Трэці раз ваенна-гістарычны фестываль «Мір-1812» на два дні перанёс пасёлак больш чым на два стагоддзі назад.