24 Верасень, панядзелак

Вы тут

Палове айцішнікаў — да 31 года


Удзельная вага моладзі сярод працуючых складае 22,6 %. Асноўная доля занята ў крэатыўнай індустрыі. Самы маладзёжны від эканамічнай дзейнасці — інфармацыйныя тэхналогіі (51,4 % работнікаў гэтай галіны — да 31 года). У сферы паслуг па часовым пражыванні і харчаванні маладыя людзі складаюць 38,8 % ад агульнай колькасці работнікаў, інфармацыі і сувязі — 38,1 %, аптовым і рознічным гандлі, рамонце аўто — 31 %, фінансавай і страхавой дзейнасці — 27,5 %.


— Доля грамадзян ва ўзросце да 31 года сярод кіраўнікоў — каля 6 %, сярод спецыялістаў — 42 %, — канстатуе кансультант упраўлення палітыкі занятасці Міністэрства працы і сацыяльнай абароны Жанна ШЧАМЯЛЁВА.

Колькасць моладзі сярод зарэгістраваных беспрацоўных штогод скарачаецца — такая тэндэнцыя звязана з дэмаграфічнай сітуацыяй. На сёння доля гэтай катэгорыі сярод незанятых беларусаў — 28,5 %. Для параўнання: у 2000 годзе паказчык быў роўны 52 %, у 2015-м — амаль 34 %.

У адпаведнасці з заканадаўствам, моладзь, якая ўпершыню выходзіць на рынак працы, адносіцца да сацыяльна ўразлівай катэгорыі, таму для яе прадугледжаны дадатковыя гарантыі занятасці. Напрыклад, браніраванне рабочых месцаў — на гэты год іх «зарэзервавалі» для 3795 чалавек. Такая бронь устанаўліваецца практычна ўсім прадпрыемствам у раёне. За неабгрунтаваны адказ юнаму работніку — штрафныя санкцыі.

Набрацца працоўнага вопыту моладзь можа ў студатрадах. Сёлета ў Беларусі было сфарміравана 884 атрады па сямі профілях дзейнасці: будаўнічым, сельскагаспадарчым, педагагічным, сэрвісным, экалагічным, медыцынскім і вытворчым. Узрост байцоў — ад 14 да 21 года. На 1 жніўня ў складзе студэнцкіх атрадаў адпрацавала 10,5 тысячы чалавек. Індывідуальна ўладкаваны на работу былі больш за тысячу чалавек.

— Каля 500 байцоў працуе ў Расіі — гэта будаўнічыя, педагагічныя і сэрвісныя атрады, — расказвае пра міжнароднае супрацоўніцтва другі сакратар ЦК БРСМ Алег ДЗІКУН. — Упершыню ў нас з'явіўся атрад у Малдове: 31 чалавек выехаў на ўборку ўраджаю. Збіралі персікі, цяпер узяліся за вінаград. Хлопцы і дзяўчаты вельмі задаволеныя. Спадзяюся, гэты кірунак для нас будзе развівацца, і налета туды паедзе 100—200 чалавек. Таксама будзем адпрацоўваць у наступным годзе такі кірунак, як Узбекістан.

Заробкі розныя. Самыя высокія — у будаўнічых атрадах: да 1500 рублёў у месяц. Байцы на атамнай электрастанцыі ў Астраўцы атрымліваюць у сярэднім 700 рублёў. Сярэдні заробак у сельскагаспадарчых атрадах — 300 рублёў, у педагагічных — 200—350. Моладзь, якая шчыруе ў Малдове, можа разлічваць на тысячу рублёў.

У лагерах працы і адпачынку пабывалі 13,3 тысячы школьнікаў. Навучэнцы займаліся добраўпарадкаваннем тэрыторыі, фарбаваннем, рамонтам кабінетаў, праполваннем, пабелам дрэў, пашывам спецадзення і бялізны, вырабам сувеніраў. Сярэднія заробкі дзяцей складаюць ад 80 да 220 рублёў у залежнасці ад колькасці працоўных дзён і формы арганізацыі лагера.

Наталля ЛУБНЕЎСКАЯ

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.