Вы тут

Эльвіра Герман стала чэмпіёнкай Еўропы ў бегу на 100 м з бар'ерамі


У фінале кантынентальнага форуму ў Берліне беларуска паказала вынік 12,67 сек, у фінішным створы апярэдзіўшы дзвюх саперніц з Германіі. Памэла Дуткевіч заняла другое месца — 12,72 сек, Сіндзі Роледэр стала бронзавым прызёрам — 12,77 сек.


З поспехам беларускую спартсменку павіншаваў Прэзідэнт. «Гэтая выдатная перамога ў саперніцтве з атлетамі сусветнага ўзроўню прынесла шмат станоўчых эмоцый беларускім балельшчыкам», — гаворыцца ў віншаванні. Кіраўнік дзяржавы перакананы, што дзякуючы працавітасці, мэтанакіраванасці, цудоўнай тэхнічнай падрыхтоўцы Эльвіра Герман працягне паспяховае станаўленне ў дарослым спорце, пакараючы вышэйшыя прыступкі п'едэсталаў найбуйнейшых спаборніцтваў. Аляксандр Лукашэнка пажадаў усёй беларускай камандзе моцнага здароўя і новых перамог.

«Падчас выхаду на старт хацела толькі залаты медаль, — адзначае Эльвіра. — На старце сказала сабе: залаты або ніякі. Калі ўсё атрымалася, абрынуўся шквал эмоцый. Побач са мной бегла Памэла Дуткевіч з Германіі, баялася, што яна плячом можа ўлезці першай на фінішы, але гэтага не здарылася. Да гэтага чэмпіянату разам з трэнерам Віктарам Мясніковым прарабілі вялікі аб'ём работы, я ўжо стабільна бегла ў раёне 12,60—12,80 сек. У Берліне паказала свой вынік, хоць перад пачаткам чэмпіянату адчувала праблемы са здароўем. Калі выйшла на старт, пачаўся невялікі дождж, і я падумала пра тое, што гэта добры знак, бо ўмею бегаць пад дажджом».

Нагадаем, у 2016 годзе Эльвіра Герман заваявала залаты медаль маладзёжнага чэмпіянату свету.

Адзначым, што ў фінальным забегу ў Берліне выступіла і Аліна Талай, якая не змагла фінішаваць, дапусціўшы памылку на бар'еры.

Залатая ўзнагарода Герман стала чацвёртай у скарбонцы беларускай каманды на чэмпіянаце Еўропы ў Берліне. Раней бронзавымі прызёрамі сталі Дзмітрый Дзюбін у хадзе на 50 км, у штурханні ядра — Алена Дубіцкая і дзесяціборац Віталь Жук. Дзякуючы «золату» Герман Беларусь перамясцілася на шостае месца ў медальным заліку.

Дар'я ЛАБАЖЭВІЧ

Загаловак у газеце: «Умею бегаць пад дажджом»

Дадаць каментар

Выбар рэдакцыі

Грамадства

Зміцер Жылуновіч. Таварыш пясняр

Зміцер Жылуновіч. Таварыш пясняр

Ён быў аўтарам Маніфеста аб абвяшчэнні Савецкай Беларусі, першым прэм'ер-міністрам рэспублікі, яго двойчы выключалі з партыі, ён мог стаць першым народным паэтам...

Грамадства

Прэзідэнт зрабіў кадравыя прызначэнні

Прэзідэнт зрабіў кадравыя прызначэнні

Аляксандр Лукашэнка даў згоду на прызначэнне рэктараў і кіраўнікоў раёнаў і прадпрыемстваў.

Калейдаскоп

Чым здзівіў Беларускі тыдзень моды

Чым здзівіў Беларускі тыдзень моды

Пазнаёміцца з навінкамі ад беларускіх дызайнераў можна было на тыдні моды, які праходзіў у Мінску з 7 да 11 лістапада.