Вы тут

На Аўгустоўскім канале адрадзілі свята, якое ладзілі паўтара стагоддзя таму


Балотны футбол, заплыў на абы-чым, канцэрты і конкурсы — такім было свята мора, якое прайшло на Аўгустоўскім канале. Месцам правядзення стаў шлюз Дамброўка. Гэта адзін з пяці шлюзаў, што знаходзяцца на беларускай частцы канала. Тут не толькі прыгожы ландшафт, але і прывабны куток для адпачынку.


Фота БелТа.

Тварам у бруд? Гэта весела!

Ахвотных трапіць на брэндавы фестываль аказалася шмат. Доўгі аўтамабільны ланцужок цягнуўся ўздоўж дарогі. Падчас свята на дзве аўтамабільныя пляцоўкі супрацоўнікі ДАІ пускалі толькі транспарт удзельнікаў, а іх набралася, ні многа ні мала, ажно 500 чалавек. Таксама тут паркаваліся аўтобусы, якія прыбылі з-за мяжы.

Па словах арганізатараў, сюды з'ехалася каля трох тысяч чалавек.

Зранку каманды ўключыліся ў балотны футбол. Трэба сказаць, што з кожным годам іх становіцца больш. Сёлета аб сваім жаданні згуляць у брудзе заявілі амаль 30 камандаў, трэць з якіх — жаночыя. Для гульні на тэрыторыі шлюза існуе адмысловая пляцоўка. Супрацоўнікі МНС пастаянна падліваюць ваду на чорны пясок. У некаторых месцах бруд даходзіць да калена гульцоў. Здаецца, што гэта іх не палохае, а, наадварот, дадае азарту. На брудных тварах зіхацяць усмешкі. У камандзе Аксаны з Іўя разам з ёй гуляюць дзве дачкі-школьніцы з біблейскімі імёнамі — Эсфір і Авігея. Кажуць, што з задавальненнем гуляюць у балотны футбол, атрымалі шмат адрэналіну, а гразевыя ванны нават карысныя для здароўя.

Каля пляцоўкі шмат фатографаў. Сапраўды, тут можна «злавіць» нямала эмацыянальных кадраў. Арганізатары свята паведамілі, што налета будзе яшчэ цікавей — каманды згуляюць у балотны футбол у касцюмах па родзе сваёй дзейнасці. Чыноўнікі — у гальштуках, кухары — у каўпаках...

Паблукалі, але даехалі

Не магла прайсці міма гіравікоў-сілачоў. Чэмпіёны свету па гіравым спорце Сяргей Мацко і Яўген Назарэвіч правялі паказальныя выступленні. Не толькі моцным, але і валявым аказаўся Валерый са Смаргоні, які працуе інструктарам па фізультурна-масавай рабоце. Ён нават нацёр мазалі, але не здаўся і падняў 24-кілаграмовую гіру 110 разоў. Трэба сказаць, што гродзенская каманда гіравікоў — адна з наймацнейшых у краіне.

Самы масавы старт правялі веласіпедысты. Аматараў набралася каля сотні. Ім прапанавалі новы маршрут «Шляхам яцвягаў» у 24 км. Удала праехалі яго прадстаўнікі Астраўца. Некаторыя з іх працуюць на атамнай станцыі і ездзяць на работу менавіта на такую адлегласць. Юрый наогул упершыню наведаў канал і застаўся задаволены. Праўда, былі і такія, што крыху блукалі, бо з'ехалі не на той маршрут, хоць ён і быў прамаркіраваны. Дарэчы, новы маршрут уваходзіць у сетку «Аўгустоў Вела» і буйнога міжнароднага маршруту «Грын Вела».

Па словах арганізатараў, асноўны лейтматыў свята — спартыўна-забаўляльны. З актыўным адпачынкам звязаны і сам Аўгустоўскі канал. Як вобразна выказаўся начальнік упраўлення спорту і турызму аблвыканкама Алег Андрэйчык, чалавек павінен адчуць подых прыроды, цурчанне вады, прасякнуцца гісторыяй гэтага ўнікальнага гідратэхнічнага збудавання. І самы лепшы спосаб для гэтага — веласіпед альбо карабель.

Плыў параход і што папала...

Адно з самых любімых відовішчаў у гэты дзень — парад-конкурс на самы арыгінальны плывучы сродак, зроблены з падручных рэчаў. Чаго толькі тут не спусцілі на ваду. І цуда-печку, і бульдозер, і сыр, і нават аўтамабіль хуткай дапамогі...

Разам з тым кожны плывучы сродак, а іх набралася 15, нёс пэўную інфармацыю аб прадпрыемстве альбо раёне. Прыгожае відовішча прыдумалі ў цэнтры сацыяльнага абслугоўвання Зэльвы. Яго работнікі абралі вобразы самураяў і гейшаў, якія плылі на знакаміты Ганненскі кірмаш.

Пра фестываль памідора ўсе прысутныя даведаліся ад Святланы, якая прыплыла з Іўя. Яе плывучы сродак так і называўся «Іўеўскі памідор». Гісторыю пра хлопчыка з бервяна Бураціна прадставілі на плывучай зялёнай паляне работнікі Слонімскага мясакамбіната.

Згодна з умовамі, для плавання нельга выкарыстоўваць звычайныя плывучыя рэчы, у тым ліку надзіманыя матрацы. У асноўным умацоўваліся металічныя бочкі, пластыкавыя каністры і нават ПЭТ-бутэлькі. А гродзенскі бізнесмен Андрэй склаў свой плывучы сродак з паветраных шароў. Іх усяго каля 700, і яны трымаюць груз вагой 300 кг. Для Андрэя гэта магчымасць праверыць шары на трываласць і прарэкламаваць сваю прадукцыю.

У гэтым кірунку арганізатары мяркуюць рухацца і надалей — больш прыцягваць да конкурсу фірмы і карпарацыі. Тут ёсць значны патэнцыял і магчымасці. Удзел у заплыве на абы-чым можа прыняць кожны, хто пажадае. Напрыклад, так зрабіла ветурач Тамара з Воранава. Яна з'явілася ў вобразе Бабы Ягі з катом рэдкай пароды «корніш рэкс» па мянушцы Эрас. Тамара вырашыла нагадаць аб папулярным казачным персанажы, якога новыя пакаленні пачынаюць забываць.

Дарэчы, заплыў уразіў не толькі гледачоў на беразе, але і турыстаў на параходзе. Тут курсіруе некалькі пасажырскіх параходаў, якія карыстаюцца попытам. Таксама на шлюзе Дамброўка можна ўзяць напракат веласіпед, байдарку, лодку і катамаран. Колькасць плывучых сродкаў, якія можна арандаваць, з кожным годам павялічваецца.

Як паведаміў Алег Андрэйчык, свята мора тут пачалі праводзіць яшчэ 150 гадоў таму. Гэта былі ажыўленыя мясціны. Пасля разбурэння канала і шлюзаў усё прыйшло ў заняпад. Зараз былыя традыцыі зноў адраджаюцца. Цяпер на берагах шматлюдна, прыязджаюць цэлымі сем'ямі, частымі гасцямі з'яўляюцца польскія турысты. Дарэчы, такое свята здаўна праводзіцца ў польскім Аўгустове. Цяпер замежныя турысты асвойваюць беларускі бок канала і застаюцца пад добрым уражаннем.

Маргарыта УШКЕВІЧ

Загаловак у газеце: «Брудны» футбол і плывучая печ

Выбар рэдакцыі

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».

Грамадства

Як працуюць сапёры?

Як працуюць сапёры?

Больш за ўсё «сюрпрызаў» з часоў Вялікай Айчыннай вайны было знойдзена ў Докшыцкім, Талачынскім, Асіповіцкім і Лагойскім раёнах.