24 Верасень, панядзелак

Вы тут

Варыкацэле: выдаляць ці не?


Сярод мужчын, у якіх выяўлена бясплоддзе, 40 % пакутуюць на варыкацэле. Хвароба звычайна пачынаецца ў падлеткавым узросце, і на гэтым этапе важна яе не прапусціць. Як гэта зрабіць і каму варта пагаджацца на аперацыю, а ў якіх выпадках яе рабіць не абавязкова, расказала загадчык 1-га педыятрычнага аддзялення 3-й гарадской дзіцячай клінічнай паліклінікі Мінска Галіна ЦІЖ.


— Варыкацэле з'яўляецца адной з дастаткова распаўсюджаных праблем, якія ўзнікаюць у юнакоў у падлеткавым узросце, — кажа Галіна Міхайлаўна. — Захворванне сустракаецца прыкладна ў 15 % падлеткаў і дарослых мужчын. Развіваючыся з узросту палавога выспявання, з часам яно можа прывесці да бясплоддзя. Небяспека захворвання ў тым, што яно, здараецца, не выклікае ніякіх сімптомаў. А вось дыягнастуецца даволі проста — падчас звычайнага медыцынскага агляду.

Гэтак жа, як і пры варыкозным расшырэнні вен на нагах, гэта захворванне развіваецца, калі дрэнна функцыянуюць клапаны ў венах, што вядзе да адваротнага току крыві. Варыкацэле — гэта варыкознае пашырэнне вен семявага канаціка ў яечку. Такая паталогія ўзнікае часцей за ўсё ва ўзросце 14—15 гадоў, хутка дасягае пэўнай ступені і больш не прагрэсуе. Захворванне ўзнікае з-за павышэння ціску ў венах і часцей за ўсё звязана з асаблівасцямі іх анатамічнага размяшчэння. Прычым з-за ўласцівасці ходу левай вены варыкацэле часцей узнікае злева. Садзейнічаюць узнікненню варыкацэле доўгія празмерныя нагрузкі, а таксама захворванні, якія павышаюць унутрыбрушны ціск.

Ёсць чатыры ступені варыкацэле. Першаснае звычайна да пэўнага моманту праходзіць амаль бессімптомна, аднак у большасці выпадкаў менавіта яно з'яўляецца асноўнай прычынай мужчынскай бясплоднасці ва ўсім свеце. Болевыя адчуванні ў паху, як правіла, адсутнічаюць, і на гэтай стадыі захворванне можна выявіць толькі пры дапамозе ультрагукавога даследавання.

Пры другой стадыі хваробы расшыраныя вены намацваюцца ў становішчы стоячы, у становішчы лежачы варыкацэле не вызначаецца. Боль звычайна ўзнікае пасля гарачага душу, пасля падняцця цяжару і пры напружванні мышцаў брушнога прэса. Балючасць можа адрознівацца рознай інтэнсіўнасцю, як правіла, яна не надта моцная, носіць распіраючы ці цягнучы характар і суправаджацца павышанай патлівасцю, смыленнем у машонцы. Болі, як правіла, узнікаюць пры знаходжанні ў вертыкальным становішчы ці падчас фізічнай нагрузкі, калі венозны ціск вышэйшы. У стане лежачы яны праходзяць. Для другой ступені характэрныя шматлікія ўскладненні.

Пры трэцяй ступені расшыраныя вены намацваюцца ў любым становішчы стоячы і седзячы, з'яўляецца прыпухласць скуранога покрыва, якая выклікана запаленчым працэсам. Скура машонкі набывае барвовае адценне, сама машонка павялічваецца ў памерах і робіцца асіметрычнай. Пры чацвёртай ступені расшыраныя вены відаць падчас візуальнага агляду.

— Варыкацэле першай ступені не патрабуе лячэння, — кажа Галіна Ціж. — Варта толькі пазбягаць працяглай хадзьбы і падняцця цяжкіх прадметаў.

А вось на астатніх стадыях існуюць толькі аператыўныя спосабы лячэння. Калі вам калі-небудзь давядзецца чуць пра лячэнне без аперацыі — не верце, бо эфектыўнага кансерватыўнага лячэння гэтай хваробы не існуе. З трэцяй і чацвёртай ступенямі хваробы яго не пазбегнуць. Прычым калі захворванне праяўляе сябе болямі ці бясплоддзем, аперацыя павінна быць праведзена абавязкова. Таксама яе праводзяць, калі варыкацэле выяўляецца ў падлетка ці маладога мужчыны. Калі размова ідзе пра мужчыну ва ўзросце, які не мае скаргаў, то рабіць аперацыю неабавязкова.

А вось прафілактыцы варыкацэле варта ўдзяляць увагу ў любым узросце. Яго лепш папярэдзіць, чым лячыць, і зрабіць гэта можна, прытрымліваючыся даволі простых рэкамендацый. Падчас заняцця спортам не трэба перагружаць сябе празмернымі сілавымі нагрузкамі. Ад курэння і алкаголю таксама лепш адмовіцца, бо яны негатыўна ўплываюць на сценкі сасудаў, пашкоджваючы іх. Неабходна сачыць за вагой, паколькі лішні тлушчавы пласт аказвае ўзмоцнены ціск на вены, з-за чаго іх сценкі расцягваюцца. Штогод трэба праходзіць прафілактычны агляд ва ўрача-хірурга — спецыяліст можа знайсці гэта захворванне на ранняй стадыі і прызначыць лячэнне.

Алена КРАВЕЦ

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.