24 Верасень, панядзелак

Вы тут

У Мінску стартавала акцыя «Клас» кіроўцу


Цікавая і карысная ва ўсіх сэнсах акцыя запушчана 15 жніўня сталічным ДАІ і мабільнай праграмай па ПДР «АўтаКлас». Накіравана яна на тое, каб зменшыць колькасць ДТЗ на дарогах, у прыватнасці, на нерэгулюемых пешаходных пераходах. Сутнасць у тым, каб пешаходы дзякавалі кіроўцы, які прапусціў іх на пераходзе, жэстам: падымалі вялікі палец — ставілі яму «клас». Такая абавязковая мадэль узаемнай ветлівасці, якая павінна прыйсціся даспадобы і аўтамабілістам, і пешаходам.


Як заўважыў намеснік начальніка УДАІ ГУУС Мінгарвыканкама Андрэй Зыранаў, за першае паўгоддзе адбылося 106 ДТЗ з удзелам пешаходаў. Пытанне ўзаемнай ветлівасці важнае перш за ўсё на пешаходных пераходах. Часта бывае так, што пешаход ідзе па «зебры» па ўсіх правілах дарожнага руху і «забывае» аб машынах, а кіроўца, па няўважлівасці або з іншай прычыны, налятае на яго. Неабходна, каб і аўтамабіліст, і пешаход бачылі адзін аднаго, не выпускалі з-пад увагі і зводзілі да нуля магчымасць ДТЗ. Таму вітаюцца любыя акцыі, здольныя знізіць аварыйнасць і павысіць увагу ўдзельнікаў дарожнага руху.

Як растлумачыла адзін з арганізатараў акцыі, выканаўчы дырэктар ТАА «Аўтамабайл» Вераніка Гапеева, асноўная ідэя — устанаўленне дыялогу паміж кіроўцам і чалавекам, які пераходзіць вуліцу. А паколькі вярбальны дыялог у гэтым выпадку немагчымы, знайшоўся выхад у выглядзе візуальнага дыялогу. Гэта значыць, пешаход, які крочыць па нерэгуляваным пераходзе, павінен паглядзець на кіроўцу і паказаць яму «клас» — падняць вялікі палец рукі. Сказаць своеасаблівае «дзякуй». Такім чынам, у пешаходаў з'явіцца звычка дзякаваць кіроўцам і ўважліва чакаць, пакуль кіроўца іх прапусціць. А кіроўцам, у сваю чаргу, будзе больш прыемна прапускаць пешаходаў, і яны таксама будуць больш пільныя.

У падтрымку гэтай акцыі па горадзе развесяць білборды і ўсталююць дарожныя знакі з хэштэгам #клас_вадзіцелю — яркія і пацешныя малюнкі «палец уверх», а таксама іншыя выявы. «Візуалы» паставяць так, каб не адцягваць увагу кіроўцы: на пешаходных дарожках паблізу ажыўленых нерэгулюемых пераходаў. Якіх-небудзь змяненняў у ПДР не адбудзецца. Акцыя носіць адукацыйны і выхаваўчы характар і скіравана больш на пешаходаў. Хоць, як было сказана, яна заклікана павысіць культуру паводзінаў абсалютна ўсіх удзельнікаў руху. Таму як ні ўдасканальвай тэхнічны бок працэсу, маральна-этычны аспект заўсёды стаіць на першым месцы. Людзі павінны быць перш за ўсё ветлівыя і ўважлівыя ў адносінах адзін да аднаго, і гэта вельмі важная, калі не першарадная, умова бяспекі дарожнага руху.

Акцыя «Клас кіроўцу» будзе доўжыцца 21 дзень. За гэты час у людзей фарміруецца новая звычка, і арганізатары спадзяюцца, што жэст «клас» кіроўцу, які прапусціў пешахода, стане добрай традыцыяй у нашага насельніцтва. Работнікамі ДАІ будзе праводзіцца адпаведная работа сярод аўтамабілістаў, каб яны з разуменнем рэагавалі на незвычайную ініцыятыву.

Пакуль акцыя пройдзе на сталічных дарогах. Але арганізатары плануюць распаўсюдзіць сваю ідэю па ўсёй Беларусі. Улічваючы, што пачынанне гэта датычыцца кожнага з нас і накіравана на нашу бяспеку, можна не сумнявацца, што планы будуць увасоблены ў жыццё.

Сяргей КУЛАКОЎ

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.